O le Tusi Muamua o Samuelu 1:1-28
1 Sa iai se tamāloa i Ramata-sofimo*+ i le vaega maugā o Efaraima,+ o Elekana+ lona igoa, o ia o le atalii o Ieroama, le atalii o Eliu, le atalii o Toʻu, le atalii o Sufi, o le tagata Efaraima.
2 E toʻalua ana avā; o le igoa o le tasi o Hana, a o le igoa o le isi o Penina. Sa iai le fanau a Penina, ae e leai se fanau a Hana.
3 Na alu aʻe lea tamāloa mai i lona aai i lea tausaga ma lea tausaga aga‘i i Sailo, e tapuaʻi* ma fai taulaga iā Ieova o ʻau.+ O i inā na auauna ai atalii e toʻalua o Eli, o Hofeni ma Fineaso,+ o ni ositaulaga a Ieova.+
4 I se tasi aso ina ua ofo atu e Elekana se taulaga, ona ia avatu lea o tufaaga iā Penina lana avā, o lana fanau tama uma ma lana fanau teine,+
5 ae ua ia avatu iā Hana se tufaaga faapitoa, ona ua sili atu lona alofa iā Hana; peitaʻi e leʻi foaʻiina mai e Ieova se fanau iā te ia.*
6 Ua faaauau foʻi ona faifai atu iā te ia le isi avā ina ia faatigā ai o ia, auā e leʻi foaʻiina mai e Ieova se fanau iā te ia.
7 O le mea lenā e masani ona faia e Penina i lea tausaga ma lea tausaga, pe a alu aʻe Hana i le fale o Ieova.+ E masani ona ia matuā faalili iā Hana, ma iʻu ai ina tagi o ia ma lē ʻai ai.
8 Ona fai atu lea o Elekana lana tane iā te ia: “Hana e, aiseā ua e tagi ai, aiseā ua e lē ʻai ai, aiseā foʻi ua e matuā faanoanoa ai?* Po ua lē sili ea aʻu iā te oe i lo o fanau tama e toʻasefulu?”
9 Ona tulaʻi lea o Hana ina ua uma ona latou aai ma feinu i Sailo, a o nofo Eli le ositaulaga i le nofoa i le pou o le faitotoʻa o le malumalu*+ o Ieova.
10 Ua matuā tigā le loto o Hana, ona ia tatalo ai lea iā Ieova+ ma ua matuā tagi lava.
11 Ua ia faia se tautoga ma faapea atu: “Ieova o ʻau e, afai e te silasila mai i le tigā o lau auauna, ma manatua mai aʻu, e te lē faagaloina foʻi lau auauna ma foaʻi mai i ai se tama tama,+ ou te foaʻi atu o ia iā te oe Ieova e, i aso uma o lona ola, e lē oo foʻi se tafi i lona ulu.”+
12 Ua umi ona tatalo atu o ia i luma o Ieova, a o le taimi lea ua vaavaai atu ai Eli i lona gutu.
13 A o Hana, ua tautala o ia i lona loto; ua na ona memu o ona laugutu, ae e lē lagona lona leo. Ua manatu Eli ua onā o ia.
14 Ona fai mai lea o Eli iā te ia: “O le ā le umi e te onā ai? Inā alu ese ia seʻia teʻa lou onā.”
15 Ae ua tali atu Hana: “E leai loʻu alii e! O aʻu o le fafine ua ootia le agaga; ou te leʻi inu i se uaina po o se ʻava malosi, ae o loo sasaa atu loʻu loto i luma o Ieova.+
16 Aua e te faia lau auauna e pei o se fafine e lē aogā, auā ua ou tautala atu ona o loʻu lototigā ma le tele o mea ua ou popole ai.”
17 Ona tali mai ai lea o Eli: “Inā alu ia oe ma le filemu, tau ina ia foaʻi mai e le Atua o Isaraelu le mea na e ōle atu ai iā te ia.”+
18 Ua fai atu Hana: “Ia e manatu alofa mai pea i lau auauna.” Ona alu lea o le fafine i lona ala ma ua ʻai, ua lē toe foliga faanoanoa foʻi o ia.
19 Ua latou fealapō i le taeao ma ifo atu i luma o Ieova, ona latou toe foʻi atu lea i lo latou fale i Rama.+ Ona momoe lea o Elekana ma lana avā o Hana, ma ua manatua o ia e Ieova.+
20 Ona tō ai lea o Hana ma ua ia fanaua se tama tama i le tausaga na sosoo ai, ua faaigoa+ foʻi iā te ia o Samuelu,* auā ua ia faapea mai, “na ou talosaga atu iā Ieova mo ia.”
21 Mulimuli ane, ua ō aʻe Elekana ma lona aiga atoa ina ia ofo atu iā Ieova le taulaga e fai i tausaga taʻitasi,+ ma ofoina atu lana tautoga.
22 Ae e leʻi alu aʻe Hana,+ auā na fai atu o ia i lana tane: “E teʻa loa le tama ma le susu, ona ou avatu lea o ia, ma o le a iai o ia i luma o Ieova ma nofo ai pea i inā i aso uma.”+
23 Ona fai mai lea o Elekana lana tane iā te ia: “Ia e faia le mea ua lelei iā te oe. Ia e nofo i le fale seʻia e faate‘a iā te ia mai i le susu. Tau ina ia faataunuuina e Ieova au upu.” Ona nofo lea o le fafine i le fale, ma tausi lana tama seʻia oo ina teʻa o ia ma le susu.
24 Ina ua ia faate‘a iā te ia mai i le susu, ona la ō aʻe ai loa lea i Sailo, faatasi ai ma le povi poʻa e tolu tausaga, o le efa* e tasi o le falaoamata, ma le fagu uaina lapo‘a,+ ma ua ulu atu o ia i le fale o Ieova i Sailo+ faatasi ma le tamaitiiti.
25 Ona latou fasi lea o le povi poʻa ma avatu le tama iā Eli.
26 Ua faapea atu Hana: “Faamolemole loʻu alii e! Ou te tautō atu iā te oe, o aʻu le fafine lea na ta tutū faatasi i inei e tatalo iā Ieova.+
27 O le tama lenei na ou tatalo ai iā Ieova, ma ua ia foaʻi mai le mea na ou ōle atu ai iā te ia.+
28 O aʻu foʻi, ua ou tuuina atu o ia iā Ieova. Ua ou tuuina atu o ia iā Ieova i aso uma lava o lona ola.”
Ona ifo lea o ia* i inā i luma o Ieova.
Faamatalaga Pito i Lalo
^ Po o “i Rama, o le tagata Sufi.”
^ Po o le “ifo.”
^ Epe., “ua punitia e Ieova lona faaautama.”
^ Po o le “aiseā foʻi ua tigā ai lou loto?”
^ E faasino atu i le faleʻie paia.
^ Lona uiga “Suafa o le Atua.”
^ E foliga mai e faasino atu iā Elekana.
