O le Tusi Muamua o Samuelu 10:1-27
10 Ona tago lea o Samuelu i le fagu suāuu ma liligi i le ulu o Saulo,+ ua sogi iā te ia ma faapea mai: “Pe e leʻi faauuina ea oe e Ieova e fai ma taʻitaʻi+ i lona nuu?*+
2 Pe a e alu ese mai iā te aʻu i le asō, e te maua ni tamāloloa se toʻalua e lata ane i le tuugamau o Rasela+ i le laueleele o Peniamina i Salesa, e la te fai mai iā te oe, ‘Ua maua asini na e alu e suʻe, a o lenei ua uma le popole o lou tamā i asini,+ ae ua popole iā te oulua, o loo faapea o ia: “O le ā sa‘u mea e fai e suʻe ai loʻu atalii?”’
3 Ona e alu atu lea mai i inā seʻia e taunuu i le mea o iai le laau telē o Tapora, o i inā e tou te fetaui ai ma ni tagata se toʻatolu o loo ō aʻe i Peteli+ e tapuaʻi ai i le Atua moni, o loo ave e le tasi o tamaʻi ʻoti e tolu, e ave e le isi o falaoa e tolu, ae ave e le isi le fagu uaina lapoʻa.
4 E latou te fesili mai po o ā mai oe ma avatu iā te oe falaoa e lua, ma e ao ona e talia falaoa mai iā i latou.
5 Mulimuli ane, ona e oo ai lea i le aʻega o le Atua moni, lea o loo iai le leoleoga a Filisitia. Pe a e oo atu i le aai, o le a e fetaui i ni perofeta o loo ō ifo mai i le mea maualuga a o latou faia ni valoaga, ma o loo muamua i o latou luma ni tagata ma a latou meafaifaaili e iai uaua, o topa,* o fagufagu, ma kitara.*
6 Ona osofia lea o oe e le agaga o Ieova,+ ma o le a e faia valoaga faatasi ma i latou, e suia foʻi oe e peiseaʻī o se isi tagata.+
7 Pe a oo mai nei faailoga iā te oe, ia e faia le mea ua e manatu i ai e tatau ona faia, auā o loo faatasi le Atua moni ma oe.
8 Ia e muamua ifo iā te aʻu i Kilikala,+ ma ou te alu ifo iā te oe e ofo atu taulaga mū, ma taulaga faifaatasi. Ia e faatali mo aso e fitu seʻia ou alu atu iā te oe, ona ou faailoa atu lea o le mea e ao ona e faia.”
9 Ina ua liliu le tua o Saulo e alu ese mai iā Samuelu, ona suia lea e le Atua o le loto o Saulo; ua taunuu foʻi nei faailoga uma i lea lava aso.
10 Ona ō atu ai lea o Saulo ma lana auauna mai i inā i le aʻega, ma ua fetaui ai o ia ma ni perofeta; ona osofia lea o ia e le agaga o le Atua,+ ma ua ia faia valoaga+ faatasi ma i latou.
11 Ina ua vāai iā te ia i latou uma na iloa muamua o ia, ua ia faia valoaga faatasi ma le ʻauperofeta, ona faapea ane lea o le tasi i le isi: “O le ā le mea ua tupu i le atalii o Kiso? Po o Saulo ea foʻi o se tasi o le ʻauperofeta?”
12 Ona fai mai lea o se tasi tagata mai i inā: “A o ai tamā o isi perofeta nei?” O le mea lea ua iai se faaupuga masani* e faapea: “Po o Saulo ea foʻi o se tasi o le ʻauperofeta?”+
13 Ina ua uma ona ia faia valoaga, ona alu aʻe lea i le mea maualuga.
14 Mulimuli ane, ua fai mai le uso o le tamā o Saulo iā te ia ma lana auauna: “O fea na lua ō i ai?” Ona ia fai atu lea: “Na ma ō e suʻe asini,+ ae ma te leʻi mauaina. Ona ma ō lea iā Samuelu.”
15 Ua fesili mai le uso o le tamā o Saulo: “Faamolemole, seʻi taʻu mai iā te aʻu, o le ā se tala a Samuelu na fai atu iā te oulua?”
16 Ona tali atu lea o Saulo i le uso o lona tamā: “Na ia taʻu mai iā i maʻua ua maua asini na leiloloa.” Ae e leʻi faailoa atu e Saulo iā te ia e faatatau i lona tulaga o se tupu, lea na talanoa atu ai Samuelu.
17 Ona faapotopoto faatasi lea e Samuelu le nuu i luma o Ieova i Mesepa,+
18 ua faapea atu i le fanauga a Isaraelu: “O le mea lenei ua fetalai mai ai Ieova le Atua o Isaraelu, ‘O aʻu na ou aveina aʻe Isaraelu mai i Aikupito, ma lavea‘ia outou mai i lima o Aikupito,+ ma lima o malo uma na faasauā iā te outou.
19 A o outou, ua outou teena i le aso nei lo outou Atua+ o Lē na faaola iā te outou mai i o outou puapuaga ma mafatiaga uma, ma ua outou faapea mai: “E leai, ia e tofia se tupu e pule iā i matou.” O lenei, inā laulaututū mai ia o o outou ituaiga i luma o Ieova, ma o outou ʻauaiga e taʻitoʻaafe.’”
20 Ona faalatalata mai lea e Samuelu o ituaiga uma o Isaraelu,+ ma ua filifilia ai le ituaiga o Peniamina.+
21 Ua ia faalatalata mai aiga uma o le ituaiga o Peniamina, ma ua filifilia ai le aiga o Matere. Mulimuli ane, ona filifilia lea o Saulo le atalii o Kiso.+ Ua latou ō atu e suʻe o ia, ae e leʻi maua.
22 Ona latou fesili atu lea iā Ieova:+ “Po ua sau ea i inei le tagata?” Ona fetalai mai lea o Ieova: “O loo lafi o ia i le vā o oloa.”
23 Ona latou taufetuli atu lea ma aumai o ia mai i inā. Ina ua tū o ia i le ogatotonu o le nuu, e sili atu lona umī ma e gata ifo tagata uma i ona tauʻau.+
24 Ona fai atu lea o Samuelu i le nuu atoa: “Po ua outou vāai atu ea i lē ua filifilia e Ieova,+ e leai lava se tasi e tusa ma ia i le nuu uma?” Ona alalaga ai lea o le nuu, ua faapea atu: “Ia soifua le tupu!”
25 Ua taʻu atu e Samuelu i le nuu o mea e manaʻomia e le tupu+ mai iā i latou ma tusia i se tusi, ma tuuina atu i luma o Ieova. Ona aauina ese atu lea e Samuelu o le nuu uma, e taʻitasi ma alu i lona fale.
26 A o Saulo, ua alu o ia i lona aiga i Kipea, ua ō foʻi ma ia o tagata totoa o ē na pāʻia o latou loto e Ieova.
27 Ae ua faapea ane tagata lē aogā: “E faapefea ona faaolaina i tatou e lenei tagata?”+ Ua latou ʻinoʻino iā te ia, ua latou lē aumaia foʻi ni meaalofa iā te ia.+ Ae e na te leʻi fai atu se tala.*
Faamatalaga Pito i Lalo
^ Epe., “tofi.”
^ O se meafaifaaili e tagitagi. O le upu Peretania, o le tambourine.
^ O se meafaifaaili anamua e ese mai i le kitara i aso nei. O le upu Peretania, o le harp.
^ Po o “se faataoto.”
^ Epe., “Ae ua pei o ia o se tagata e lē tautala.”
