O le Tusi Muamua o Samuelu 14:1-52
14 Ua oo i le tasi aso, ona fai atu lea o Ionatana+ le atalii o Saulo i le auauna e aveina ana auupega: “Sau ta ō ma sopo atu i le leoleoga a Filisitia o loo i le isi itu.” Ae e na te leʻi taʻuina atu i lona tamā.
2 Sa nofo Saulo i le faatausiʻusiʻuga o Kipea+ i lalo o le laau o le rimoni, lea na i Mekerona; ua faatasi foʻi ma ia o tagata e pe tusa ma le toʻa 600.+
3 (O le taimi lea o loo iā Akia le efota.+ O ia o le atalii o Akitopo+ le uso o Ikapoti,+ le atalii o Fineaso,+ o le atalii lea o Eli+ le ositaulaga a Ieova i Sailo.)+ E leʻi iloa e le nuu ua alu Ionatana.
4 I le vā o auala na taumafai Ionatana e sopo atu ai i le leoleoga a Filisitia, sa iai se papa ma‘ai e pei o se nifo i le isi itu, ma le papa ma‘ai e pei o se nifo i le isi foʻi itu; o le igoa o le tasi papa o Posese, a o le igoa o le isi o Sene.
5 Ua faasaga le tasi pito papa i le itu i mātū e feagai ma Mekemase, ae ua faasaga le isi i le itu i saute e feagai ma Kepa.+
6 Ua fai atu Ionatana i lē e aveina ana meatau: “Sau seʻi o ta sopo atu i le leoleoga a lenei nuu lē peritomeina.+ Atonu e fesoasoani mai Ieova iā i taʻua, auā e lē faigatā iā Ieova ona faaolaina, e ala i ni tagata e toʻatele pe toʻaitiiti.”+
7 Ona fai mai lea o lē e aveina ana meatau iā te ia: “Ia faia le mea e te loto i ai. Inā alu ia i le mea e te manaʻo i ai, ma ou te faatasi ma oe i mea uma e te finagalo i ai.”
8 Ua fai atu Ionatana: “Seʻi o ta ō atu i le nuu ma faailoa atu i taʻua iā i latou.
9 Afai latou te fai mai iā i taʻua, ‘Ia tutū i inā seʻia matou ō atu iā te oulua!’ ona ta tutū ai lea, aua neʻi o ta ō aʻe iā i latou.
10 Ae afai e latou te faapea mai, ‘Ō mai ia tatou te tau!’ ona ta ō aʻe ai lea auā e tuuina mai lava i latou e Ieova i o ta lima, ma o le faailoga lenā mo i taʻua.”+
11 Ua la faailoa atu i laʻua i le leoleoga a Filisitia. Ona fai ane lea o Filisitia: “Faauta! O tagata Eperu nei ua ō mai i fafo mai i lua na latou lalafi ai.”+
12 Ona tali atu lea o tagata o le leoleoga iā Ionatana ma lē e aveina ana meatau: “Ō mai i luga iā i matou, lua te vāai i le mea e matou te faia iā te oulua!”+ Ona fai atu lea o Ionatana i lē e aveina ana meatau: “Ia e mulimuli mai iā te aʻu, auā e tuuina mai lava i latou e Ieova i lima o Isaraelu.”+
13 Ona aʻe lea o Ionatana i ona lima ma ona vae, ae mulimuli atu iā te ia o lē e aveina ana meatau; ona osofa‘ia lea e Ionatana o Filisitia, ae ua mulimuli atu iā te ia o lē e aveina ana meatau ma fasiotia i latou.
14 I le osofa‘iga muamua a Ionatana ma lē e aveina ana meatau, na la fasiotia ai le pe ā ma le to‘a 20 tagata i le mamao e pe ā ma le ‘afa eka le umi.*
15 Ua fefefe le ʻautau o loo i le fanua ma tagata uma o le leoleoga; ua fefefe foʻi ʻautau na auina atu e osofa‘ia Isaraelu.+ Ua lūlūina le eleele, ma ua tupu ai le gatete mai i le Atua.
16 Ua iloa atu e tagata vāai a Saulo i Kipea+ o Peniamina le vāvāō i itu uma.+
17 Ona fai atu lea o Saulo i tagata na latou faatasi: “Faamolemole, ia faitau ina ia iloa po o ai ua alu ese mai iā i tatou.” Ina ua latou faitauina, ona iloa ai lea e lē o iai i inā Ionatana ma lē e aveina ana meatau.
18 Ua fai atu Saulo iā Akia:+ “Ia aumai i inei le Atolaau a le Atua moni!” (Auā sa iai le Atolaau a le Atua moni i le fanauga a Isaraelu i lenā taimi.*)
19 A o tautala atu Saulo i le ositaulaga, ae ua atili ai ona faateteleina le vāvāō o le ʻautau a Filisitia. Ona fai atu lea o Saulo i le ositaulaga: “Inā tuu ia o lau mea o loo fai.”*
20 Ua faapotopoto faatasi Saulo ma le nuu uma sa iā te ia, ma ua latou ō atu i le taua. Ona latou iloa ai lea o tagata Filisitia ua taʻitasi ma faaoo le pelu i lona uso i inā; ua matuā tele foʻi le fenuminumia‘i.
21 E oo lava i tagata Eperu o ē na ʻau muamua iā Filisitia ma ō aʻe ma i latou i le togālauapi, ua latou liliu mai e ʻau ma Isaraelu o ē na faatasi ma Saulo ma Ionatana.
22 Ua faalogo tagata uma o Isaraelu na lalafi+ i le vaega maugā o Efaraima, ua sosola Filisitia, ona latou tuliloa fo‘i lea o i latou i le taua.
23 Ua faaola e Ieova Isaraelu i lea aso,+ ma ua oo ane le taua i Petavene.+
24 Ae ua matuā vaivai tagata o Isaraelu i lenā aso, ona ua fai atu Saulo i le nuu ia tautō e faapea: “Ia malaia le tagata e ʻaina se meaʻai* a o leʻi oo i le afiafi, ma seʻia ou tauimasui atu i oʻu fili!” E leai se tasi o le nuu na ʻaina se meaʻai.+
25 Ua ō mai le nuu uma i le vaomatua, ma o loo iai le meli i luga o le eleele.
26 Ina ua ō mai le nuu i le vaomatua, ona latou vaaia ai lea o loo tafe ai le meli, ae e leai se tasi ua tuu lona lima i lona gutu, auā ua fefefe le nuu i le tautoga.
27 Ae e leʻi faalogo Ionatana a o faatautō e lona tamā le nuu,+ o lea ua ia tuu atu ai le tumutumu o le tootoo sa i lona lima, ua loloi i le meli ma toe faafoʻi mai lona lima i lona gutu, ma ua faafouina ai lona malosi.*
28 Ona fai mai lea o le tasi tagata: “Ua faatautō e lou tamā le nuu e faapea, ‘Ia malaia le tagata e ʻaina se meaʻai i le asō!’+ O le mea lea ua vaivai ai le nuu.”
29 Ae ua fai atu Ionatana: “Ua mafatia le nuu ona o loʻu tamā. Vaai i le faafouina o lo‘u malosi ina ua ou ʻai i sina meli itiiti.
30 Pe ana ʻaina e le nuu+ i le asō mea na vetea a o latou fili, semanū e sili atu lo tatou manumalo iā Filisitia!”
31 Ua faaauau ona latou fasia Filisitia i lenā aso e amata mai i Mekemase e oo i Ailona,+ ma ua matuā vaivai le nuu.
32 Ua feosofi faavave atu le nuu i mea na faoa, ma ave mamoe, o povi, o tamaʻi povi poʻa, ma fafasi i latou i luga o le eleele, ona aai ai lea o le nuu i aano o manu o loo iai le toto.+
33 Ona faailoa atu lea iā Saulo e faapea: “Faauta! Ua agasala le nuu iā Ieova auā ua latou aai ma le toto.”+ Ona ia fai mai lea: “Pagā lo outou lē faamaoni. Inā fuli vave mai ia iā te aʻu se maa telē.”
34 Mulimuli ane, ona fai mai lea o Saulo: “Ia outou ō atu i le nuu ma faapea atu iā i latou, ‘Ia taʻitasi ma aumai lana povi poʻa ma lana mamoe e fasi i inei ma aai ai, ae aua neʻi outou agasala iā Ieova i le ʻaina ma le toto.’”+ Ona taʻitasi lea o le nuu ma aumai lana povi poʻa i lenā pō, ma fasia ai i inā.
35 Ua faia foʻi e Saulo se fata faitaulaga mo Ieova.+ O le fata faitaulaga muamua lea na ia fausia mo Ieova.
36 Mulimuli ane, ua fai mai Saulo: “Seʻi o tatou ō ifo e tuliloa Filisitia i le pō, ma faaumatia i latou seʻia oo ina malama le taeao. Aua foʻi neʻi o tatou faatotoeina se tasi o i latou.” Ona latou fai atu lea: “Ia faia mea uma e lelei i lou finagalo.” Ua fai ane le ositaulaga: “Seʻi o tatou faalatalata atu i le Atua moni i inei.”+
37 Ona fesili atu lea o Saulo i le Atua: “Po ou te alu ifo ea e tuliloa Filisitia?+ Po o le a e tuuina mai ea i latou i lima o Isaraelu?” Ae e leʻi tali mai le Atua iā te ia i lenā aso.
38 Ona fai mai lea o Saulo: “Ō mai ia i inei outou uma o alii sili o le nuu, ma vaai po o le ā le agasala ua faia i le asō.
39 Ou te tautō iā Ieova le Atua soifua, o lē na laveaʻiina Isaraelu, e tusa lava pe na māfua i loʻu atalii o Ionatana, o le a oti lava o ia.” E leai foʻi se isi o le nuu na tali atu iā te ia.
40 Ona ia fai mai lea iā Isaraelu uma: “E tou te iai i le tasi itu, a o i maʻua ma loʻu atalii o Ionatana, e ma te iai i le isi itu.” Ona fai atu lea o le nuu iā Saulo: “Inā faia ia le mea e te finagalo i ai.”
41 Ua fai atu Saulo iā Ieova: “Le Atua e, o Isaraelu, inā tali mai ia e ala i le Tumema!”+ Ona filifilia lea o Ionatana ma Saulo, ae ua lē taʻusalaina le nuu.
42 Ua fai mai Saulo: “Ia outou faia le vili*+ e filifili ai po o aʻu, po o loʻu atalii o Ionatana.” Ona filifilia lea o Ionatana.
43 Ua fai mai Saulo iā Ionatana: “Seʻi taʻu mai iā te aʻu, o le ā lau mea ua fai?” Ona taʻu atu lea e Ionatana iā te ia e faapea: “Na ou ʻaina sina meli itiiti sa i le tumutumu o le tootoo sa i loʻu lima.+ O aʻu lenei! Ia ou oti!”
44 Ona fai mai lea o Saulo: “Tau ina ia matuā faasalaina a‘u e le Atua,* pe afai e te lē oti lava Ionatana.”+
45 Ae ua fai atu le nuu iā Saulo: “Pe e tatau ea ona oti Ionatana, o lē na aumaia lenei manumalo* tele+ i Isaraelu? Ia mamao lava lea mea! E matou te tautō iā Ieova le Atua soifua, e lē paʻū i le eleele se lauulu e tasi o lona ulu; auā sa galulue o ia ma le Atua i lenei aso.”+ Ona laveaʻiina lea e le nuu o Ionatana, e leʻi oti foʻi o ia.
46 Ua lē toe tuliloaina Filisitia e Saulo, ma ua ō Filisitia i lo latou nuu.
47 Ua faamausalī e Saulo lona tofi o se tupu i Isaraelu, ma siitaua i ona fili i itu uma, o le fanauga a Moapi,+ o Amonī,+ o Etoma,+ o tupu o Sopa,+ ma Filisitia;+ na ia faatoʻilaloina i latou i mea uma na ia alu i ai.
48 Ua tau o ia ma le lototele ma ua ia faatoʻilaloina Amaleka,+ ma laveaʻi Isaraelu mai i lima o ē na faoa a latou mea.
49 O atalii nei o Saulo, o Ionatana, o Iesivi, ma Makisua.+ E toʻalua foʻi ona afafine; o le igoa o lē e matua o Merapa,+ a o le laʻitiiti o Mekala.+
50 O le igoa o le avā a Saulo o Ainoama, o le afafine o Aimaasu. O le igoa o lana taʻitaʻiʻau o Apineru+ le atalii o Neru, o le uso o le tamā o Saulo.
51 O Kiso+ o le tamā lea o Saulo, a o Neru+ o le tamā o Apineru, o le atalii lea o Apielu.
52 Ua faaauau ona vevela le taua ma Filisitia i aso uma o Saulo.+ Pe a iloa e Saulo se tagata malosi po o se tagata toa, e na te faaopoopoina mai o ia i lana ʻautau.+
Faamatalaga Pito i Lalo
^ E faasino atu i le telē o se fanua e mafai ona suatia i le aso, e ni povi poʻa se lua.
^ Epe., “i lenā aso.”
^ Epe., “Ia tuu ese lou lima.”
^ Epe., “falaoa.”
^ Epe., “ma ua malamalama ai ona mata.”
^ Tagaʻi i le Uiga o Upu.
^ Epe., “Ia faia e le Atua ma ia faaopoopo i ai.”
^ Po o le “faaolataga.”
