O le Tusi Muamua o Samuelu 15:1-35
15 Ona fai atu lea o Samuelu iā Saulo: “Na auina mai aʻu e Ieova e faauu oe e fai ma tupu e pule i lona nuu o Isaraelu.+ O lenei, ia e faalogo mai i afioga a Ieova.+
2 O le mea lenei ua fetalai mai ai Ieova o ʻau, ‘Ou te tauimasui atu i le mea na faia e Amaleka iā Isaraelu, ina ua siitaua iā i latou i le ala a o ō aʻe mai i Aikupito.+
3 O lenei, inā alu ia ma fasia tagata Amaleka+ ma faaumatia i latou,+ ma mea uma ua iā i latou. Aua neʻi e faasaoina i latou;* e ao ona e faaumatia i latou,+ o tane ma fafine, o tamaiti ma pepe, o povi poʻa ma mamoe, o kamela ma asini.’”+
4 Ona aami lea e Saulo o le nuu ma faitau i latou i Tilaima, e toʻa 200,000 fitafita o ē e savavali, ae e toʻa 10,000 tagata o Iuta.+
5 Ua oo atu Saulo i le aai o Amaleka, ma lalafi ai i le vanu.*
6 Ua fai atu Saulo i tagata Keni:+ “Inā outou ō ese ia mai i tagata Amaleka, ina neʻi oʻu tafiesea outou faatasi ma i latou.+ Auā na outou alolofa faamaoni i le fanauga uma a Isaraelu+ i le taimi na latou ō aʻe ai mai i Aikupito.” Ona ō ese lea o tagata Keni mai i Amaleka.
7 Mulimuli ane, ona fasia lea e Saulo o Amaleka,+ e amata mai i Havila+ seʻia oo i Sura,+ lea e sosoo ma Aikupito.
8 Ua ia puʻe ola Akako+ le tupu o Amaleka, ae na ia faaumatia le nuu uma i le pelu.+
9 Ae ua faasaoina e Saulo ma le nuu, o Akako ma manu aupito i lelei o le lafu mamoe, o le lafu povi, o manu pepeti, o mamoe poʻa, ma mea uma ua lelei;+ ua lē mananaʻo e faaumatia. Ae ua latou faaumatia mea uma ua leaga ma lē mananaʻo i ai.
10 Ona oo mai lea o le afioga a Ieova iā Samuelu, e faapea:
11 “Ua ou faanoanoa lava i loʻu tofia o Saulo e fai ma tupu, auā ua liliuese o ia i le mulimuli mai iā te aʻu, ua ia lē tausia foʻi aʻu upu.”+ Ua mafatia Samuelu i lenei fetalaiga, ma ua tagi atu iā Ieova i le pō atoa.+
12 Ua vave tulaʻi Samuelu i le taeao e faafetaiaʻi iā Saulo. Ae ua oo atu le tala iā Samuelu e faapea: “Na alu Saulo i Karamelu,+ ma ia faatū ai se maa faamanatu e faamamaluina ai o ia lava.+ Ona ia toe liliu lea ma alu ifo i Kilikala.”
13 Mulimuli ane, ona oo atu lea o Samuelu iā Saulo, ae ua fai mai Saulo iā te ia: “Ia faamanuia Ieova iā te oe. Ua ou faia le afioga a Ieova.”
14 Ae ua fai atu Samuelu: “O ā la nei lafu mamoe ma lafu povi ou te faalogo atu o loo fetagisi mai?”+
15 Ona fai mai lea o Saulo: “Na aumaia mai i tagata Amaleka, auā na faasaoina e le nuu o* manu e aupito i lelei o le lafu mamoe ma le lafu povi, ina ia faaaogā i taulaga iā Ieova lou Atua; ae na matou faaumatiaina mea uma na totoe.”
16 Ona fai atu lea o Samuelu iā Saulo: “Faatali! Seʻi oʻu taʻuina atu le mea na fetalai mai ai Ieova iā te aʻu anapō.”+ Ona ia fai mai lea: “Ia saunoa!”
17 Ua fai atu Samuelu: “Pe e leʻi faauuina ea oe e Ieova e fai ma tupu i Isaraelu, ma avea oe ma ulu o ituaiga o Isaraelu,+ a o e manatu faatauvaa iā te oe lava?+
18 Mulimuli ane, na auina atu oe e Ieova i se tofiga ma fetalai atu, ‘Inā alu ia ma faaumatia tagata agasala o Amaleka,+ ia e tau foʻi ma i latou seʻia e faaumatia i latou.’+
19 Aiseā la ua e lē usitaʻi ai i le siʻufofoga o Ieova? Nai lo o lea, ua e oso vave atu ma le matapeʻapeʻa i mea na faoa+ ma faia le mea leaga i luma o Ieova.”
20 Ae ua fai mai Saulo iā Samuelu: “Na ou usitaʻi lava i le siʻufofoga o Ieova. Na ou alu i le tofiga na auina ai aʻu e Ieova, ma na ou aumaia Akako le tupu o Amaleka, ma faaumatia tagata Amaleka.+
21 Ae ua aumaia e tagata mai i le vete* o mamoe ma povi, o manu e aupito i lelei o mea na tatau ona faaumatia, e fai ai taulaga iā Ieova lou Atua i Kilikala.”+
22 Ona fai atu lea o Samuelu: “Pe e sili ea le fiafia o Ieova i taulaga mū ma isi taulaga,+ i lo o le fiafia i le usiusitaʻi i le siʻufofoga o Ieova? Faauta! E sili atu le usiusitaʻi i lo o le taulaga,+ e sili atu foʻi le faalogo i lo o le ga‘o+ o mamoe poʻa;
23 auā e tutusa le fouvale+ ma le agasala o le faia o valovaloga faataulāitu,+ e tutusa foʻi le faamaualuga ma mana faataulāitu, ma le ifo i tupua.* Talu ai ua e teena le afioga a Ieova,+ e faapena foʻi ona ia teena oe mai i le avea ma tupu.”+
24 Ona fai mai lea o Saulo iā Samuelu: “Ua ou agasala, auā ua ou solia le faatonuga a Ieova ma au upu, ona ua ou fefe i le nuu ma ou faalogo ai i a latou upu.
25 Faamolemole, ia faamagalo laʻu agasala, ma seʻi o ta toe foʻi ina ia ou ifo atu iā Ieova.”+
26 Ae ua fai atu Samuelu iā Saulo: “Ta te lē toe foʻi ma oe, auā ua e teena le afioga a Ieova, ua teena foʻi oe e Ieova mai i le avea pea ma tupu o Isaraelu.”+
27 Ua liliu Samuelu o le a alu, ae ua tago atu Saulo i le pito o lona ofu talaloa, ona masae ai lea.
28 Ona fai atu lea o Samuelu iā te ia: “Ua saeia e Ieova le pulega o le malo o Isaraelu mai iā te oe i le asō, ae e na te tuuina atu lava i lou uso a tagata o lē e sili atu i lo o oe.+
29 E lē gata i lea, e lē pepelo lava+ Lē e Mamalu o Isaraelu+ pe suia foʻi ona manatu,* auā e lē o Ia o se tagata e suia ai ona manatu.”*+
30 Ona ia fai mai lea: “Ua ou agasala. Ae faamolemole, seʻi e faamamaluina aʻu i luma o toeaina o loʻu nuu ma luma o Isaraelu. Ia ta toe foʻi, ma ou te ifo lava iā Ieova lou Atua.”+
31 Ua mulimuli atu Samuelu i tua o Saulo, ona ifo lea o Saulo iā Ieova.
32 Ona fai atu lea o Samuelu: “Ia outou aumai iā te aʻu Akako le tupu o Amaleka.” Ona sau toa‘i* ai lea o Akako, auā ua faapea ifo Akako iā te ia lava: “E moni lava e lē fasiotia aʻu.”
33 Ae ua fai atu Samuelu: “E pei ona faavauvau o fafine ua leai ni fanau ona o lau pelu, e faapena foʻi ona sili ona faavauvau o lou tinā i fafine ua leai ni fanau.” Ona tipitipi ai lea e Samuelu o le tino o Akako i luma o Ieova i Kilikala.+
34 Ona alu ai lea o Samuelu i Rama, ae ua alu aʻe Saulo i lona aiga i Kipea.
35 E leʻi toe vaai lava Samuelu iā Saulo seʻia oo i le aso na oti ai o ia, auā ua faavauvau Samuelu iā Saulo.+ Ae ua faanoanoa Ieova i lona tofia o Saulo e fai ma tupu iā Isaraelu.+
Faamatalaga Pito i Lalo
^ Po o le “e alofa mutimutivale i ai.”
^ Po o le “ālia.”
^ Po o le “na alolofa mutimutivale le nuu i.”
^ Tagaʻi i le Uiga o Upu.
^ Epe., “tupua o terafimi,” e faasino atu i atua o aiga; faatagata.
^ Po o le “pe salamō foʻi o Ia.”
^ Po o le “e salamō ai.”
^ Pe atonu “mautinoa.”
