O le Tusi Muamua o Samuelu 16:1-23
16 Mulimuli ane, ona fetalai mai lea o Ieova iā Samuelu: “O le ā le umi e te faavauvau ai ona o Saulo,+ ae ua ou teena o ia mai i le avea ma tupu o Isaraelu?+ Inā faatumu ia o lau fagu nifo i le suāuu+ ma e alu. Ou te auina atu oe iā Iese+ le tagata Peteleema, auā ua ou filifilia mai i ona atalii se tupu mo aʻu.”+
2 Ae ua fai atu Samuelu: “E faapefea ona ou alu? Afai e faalogo i ai Saulo, o le a ia fasiotia aʻu.”+ Ua fetalai mai Ieova: “Ia e alu ma ave se tamaʻi povi, ma faapea atu, ‘Ua ou sau e fai le taulaga iā Ieova.’
3 Ia valaaulia Iese e alu ane i le taulaga; ona ou faailoa atu lea iā te oe o le mea e te faia, e te faauuina foʻi mo aʻu o lē ou te fai atu ai iā te oe.”+
4 Ona faia lea e Samuelu e pei ona fetalai mai ai Ieova. Ua alu atu o ia i Peteleema,+ ona fefefe ai lea o toeaina o le aai ina ua feiloaʻi ma ia, ma ua latou fai mai: “Pe e te sau ea ma le filemu?”
5 Ona ia tali atu lea: “Ua ou sau ma le filemu. Ua ou sau e fai le taulaga iā Ieova. Inā sauni* ia outou, ma ia tatou ō e fai le taulaga.” Ona ia faapaiaina lea o Iese ma ona atalii, ma fai atu iā i latou e ō mai i le taulaga.
6 A o latou ō mai, ua ia iloa atu Eliapo,+ ona ia faapea ane lea: “E moni lava o loo i luma o Ieova o lē e na te faauuina.”
7 Ae ua fetalai mai Ieova iā Samuelu: “Aua e te vaai i ona foliga, po o le maualuga o lona tino,+ auā ua ou teena o ia. Auā e lē vaai le Atua e pei o le vaai a tagata, auā o le tagata e vaai i le tino, a o Ieova e vaai i le loto.”+
8 Ona valaau lea o Iese iā Apinatapa+ e alu ane i luma o Samuelu, ae ua ia fai atu: “E leʻi filifilia foʻi e Ieova lenei tagata.”
9 Ona valaau lea o Iese ina ia alu ane Saama,+ ae ua ia fai atu: “E leʻi filifilia foʻi e Ieova lenei tagata.”
10 Ona fai atu lea o Iese ia ō ane ona atalii e toʻafitu i luma o Samuelu; ae ua fai atu Samuelu iā Iese: “E leʻi filifilia e Ieova se tasi o i latou nei.”
11 Mulimuli ane, ua fai atu Samuelu iā Iese: “Po o tama uma nei?” Ua fai mai o ia: “Ua toe o le uii,+ o loo ia leoleoina mamoe.”+ Ona fai atu lea o Samuelu iā Iese: “Inā aami atu ia iā te ia, auā tatou te lē aai seʻia sau o ia.”
12 Ua ia aami iā te ia ma ua sau ai o ia. O ia o se tauleʻaleʻa e enaena le paʻu, e mata manaia toe aulelei.+ Ona fetalai mai lea o Ieova: “Inā tulaʻi ia ma faauu iā te ia, auā o ia lava lenā!”+
13 Ona tago lea o Samuelu i le fagu nifo o loo iai le suāuu,+ ua faauu iā te ia i luma o ona uso. Ua amata mai i lea aso ona osofia Tavita e le agaga o Ieova.+ Mulimuli ane, ua tulaʻi Samuelu ma alu atu i Rama.+
14 Ua teʻa ese le agaga o Ieova mai iā Saulo,+ ae ua faatigāina o ia e se agaga leaga* mai iā Ieova.+
15 Ua fai atu auauna a Saulo iā te ia: “Ua faatigāina oe e se agaga leaga mai i le Atua.
16 Faamolemole, seʻi poloaʻi mai lo matou alii i au auauna o loo i ou luma, ina ia matou saʻili se tagata tomai e tā le kitara.+ Pe afai e oo mai iā te oe le agaga leaga mai i le Atua, ona tā lea e lenā tagata o le kitara, ma toe lelei ai ou faalogona.”
17 Ona fai mai lea o Saulo i ana auauna: “Faamolemole, seʻi saʻili mai mo aʻu se tagata e poto e tā le kitara, ma aumai o ia iā te aʻu.”
18 Ona tali atu lea o se tasi o auauna: “Faauta! E iai se atalii o Iese le tagata Peteleema e poto e tā le kitara, ma o ia o se tagata toa malosi e lototele.+ E mauupu o ia toe aulelei,+ ma o loo iā te ia foʻi Ieova.”+
19 Ona aauina atu lea e Saulo o avefeʻau iā Iese, ma faapea atu: “Ia e auina mai iā te aʻu lou atalii o Tavita, o lē o loo leoleo i mamoe.”+
20 Ona faaee lea e Iese i se asini o falaoa, o le fagupaʻu* uaina, ma le tamaʻi ʻoti e auina atu iā Saulo, faatasi ai ma lona atalii o Tavita.
21 Ua alu atu Tavita iā Saulo ma auauna iā te ia.+ Ua matuā alofa Saulo iā te ia, ua avea foʻi o ia ma lē e aveina ana meatau.
22 Ona avatu lea o le feʻau a Saulo iā Iese e faapea: “Faamolemole, seʻi nofo pea Tavita e auauna mai iā te aʻu, auā ua ou fiafia lava iā te ia.”
23 Pe a oo iā Saulo le agaga leaga mai i le Atua, ona tago lea o Tavita i le kitara ma tā, ma ua mapu ai Saulo ma toe lelei ai ona faalogona, ona alu ese ai lea o le agaga leaga mai iā te ia.+
Faamatalaga Pito i Lalo
^ Epe., “faapaia.”
^ Po o “faanaunauga leaga.” Na faataga e Ieova le loto o Saulo e faatigāina o ia lava.
^ O lenei fagupaʻu na fai mai i paʻu o manu.
