O le Tusi Muamua o Samuelu 21:1-15
21 Mulimuli ane, ua alu atu Tavita i Nove+ iā Aimeleka le ositaulaga; ona fefe ai lea o Aimeleka ina ua feiloaʻi ma Tavita, ma ua faapea mai: “Aiseā ua e sau ai na o oe, ae e leai se tasi lua te toʻalua?”+
2 Ona fai atu lea o Tavita iā Aimeleka le ositaulaga: “Na poloaʻia aʻu e le tupu e faia se mea, ae ua ia faapea mai, ‘Aua neʻi iloa e se tasi le mea ua ou auina atu i ai oe, ma le mea ua ou poloaʻia ai oe.’ Na matou tuutala ma o‘u tauleleʻa e matou te feiloa‘i i se nofoaga patino.
3 O lenei, afai e iai ni au falaoa se lima, ia aumai iā te aʻu, po o so o se mea lava ua e maua.”
4 Ae ua tali mai le ositaulaga iā Tavita e faapea: “E leai se falaoa masani o iai, ae o loo iai le falaoa paia;+ e mafai ona avatu pe afai e lē o toe faatasi tauleleʻa ma fafine.”*+
5 Ona tali atu lea o Tavita i le ositaulaga: “E lē o toe faatasi fafine ma i matou, e pei lava o le taimi muamua ina ua ou alu i le taua.+ Pe afai e paia tino o taulele‘a e tusa lava pe e ō i malaga masani e tau, pe e lē sili ea la ona paia o latou tino i le asō, aemaise i lenei malaga faapitoa?”
6 Ona avatu ai lea e le ositaulaga iā te ia o le falaoa paia,+ auā ua leai se falaoa e na o le falaoa e laulauina lea na aveese mai i luma o Ieova, ina ia sui i falaoa fou i le aso na aveese ai.
7 Sa iai i lenā aso se tasi o auauna a Saulo, ua taofia* i luma o Ieova, o lona igoa o Toeka+ le tagata Etoma,+ o le leoleo mamoe sili a Saulo.
8 Ua fai atu Tavita iā Aimeleka: “Po o iā te oe se tao po o se pelu? Ou te leʻi aumaia laʻu pelu po o aʻu auupega, auā na faanatinati le feʻau a le tupu.”
9 Ona fai mai lea o le ositaulaga: “O loo iai i inei le pelu a Koliata+ le Filisitia o lē na e fasiotia i le vanu* o Ele,+ o loo afīfī i se ʻie i tua o le efota.+ Afai e te manaʻo e ave mo oe, inā ave ia auā e leai se isi mea, ua na o lea.” Ona fai atu lea o Tavita: “E leai se isi pelu e tusa ma lenā. Ia aumai iā te aʻu.”
10 Ona tulaʻi lea o Tavita i lenā aso ma faaauau ona sola ese+ mai iā Saulo, ua oo atu iā Akisa le tupu o Kata.+
11 Ua fai atu auauna a Akisa iā te ia: “Pe e lē o Tavita ea lenei o le tupu o le nuu? Pe e lē o ia lea na latou pepese ai a o sisiva, ma faapea atu:‘Ua fasia e Saulo le faitau afe,A o Tavita e faitau sefulu afe’?”+
12 Ua teu e Tavita nei upu i lona loto, ma ua matuā fefe+ ai o ia ona o Akisa le tupu o Kata.
13 Ua ia faafoliga atu ua faalētonu lona mafaufau+ i o latou luma ma ua faatagā valea. Ua ia tusitusi foʻi i faitotoʻa o le pā, ma faatafe ifo lona fāua i lana ʻava.
14 Ona fai mai lea o Akisa i ana auauna: “Seʻi tou vaai atu i le tagata ua valea. O le ā le mea ua outou aumai ai o ia iā te aʻu?
15 Po ua lē lava ea tagata vālea ua iā te aʻu, ua outou toe aumaia ai lenei tagata valea? Pe e tatau ea ona sau o ia i loʻu fale?”
Faamatalaga Pito i Lalo
^ Po o le “pe afai ua ʻalofia e tauleleʻa le faia o feusuaʻiga.”
^ Atonu ona o se tautoga, o se tulaga ua lē mamā ai, pe masalomia foʻi ua lepela.
^ Po o “le fanua laugatasi.”