O le Tusi Muamua o Samuelu 22:1-23
22 Ua alu ese Tavita mai i inā+ ma sola atu i le ana i Atulame.+ Ina ua faalogo i ai ona uso ma le aiga atoa o lona tamā i lea mea, ona latou ō ifo ai lea iā te ia i inā.
2 Ua faapotopoto atu foʻi iā te ia o tagata uma ua puapuagatia, o tagata uma ua iai aitalafu, ma tagata uma ua mafatia, ua fai o ia ma o latou taʻitaʻi; sa iā te ia tagata e tusa ma le toʻa 400.
3 Mulimuli ane, ua alu ese Tavita mai i inā ae agaʻi atu i Mesepa i Moapi, ma fai atu i le tupu o Moapi:+ “Faamolemole, seʻi outou nonofo atu ma loʻu tamā ma loʻu tinā, seʻi oʻu iloa po o le ā se mea e faia e le Atua iā te aʻu.”
4 Ua ia tuu atu i laʻua i le tupu o Moapi, ona la nonofo ai lea ma ia i aso uma na nofo ai Tavita i le nofoaga na lafi ai.+
5 Mulimuli ane, ua fai mai Kato+ le perofeta iā Tavita: “Aua e te nofo pea i le nofoaga o loo e lafi ai. Ia e alu ese, ma ia e alu i le nuu o Iuta.”+ Ona alu lea o Tavita ma ua oo atu i le vaomatua o Hareta.
6 Ua faalogo Saulo ua vaaia Tavita ma tagata o loo faatasi ma ia. O le taimi lea o loo nofo Saulo i Kipea+ i lalo o le laau o le tamarisi i le mea maualuga, ma lana tao o loo i lona lima, ua tutū foʻi ana auauna uma i ona tafatafa.
7 Ona fai mai lea o Saulo i ana auauna o loo tutū i ona tafatafa: “Faamolemole, inā faalogo mai ia outou tagata Peniamina. Pe e avatu ea e le atalii o Iese+ iā te outou uma ni fanua ma ni togāvine? Pe na te tofia ea outou uma e fai ma taʻitaʻi o le taʻitoʻaafe ma taʻitaʻi o le taʻitoʻaselau?+
8 Auā ua outou foua aʻu, o outou uma lava; e leai se tasi na ia taʻu mai iā te aʻu le feagaiga ua osia e loʻu atalii ma le atalii o Iese,+ e leai foʻi se tasi o outou e alofa mai iā te aʻu ma taʻu mai e faapea, ua faaoso e loʻu lava atalii laʻu auauna e faasagatau mai iā te aʻu, ma lamalama iā te aʻu e pei ona faia i le aso nei.”
9 Ona tali atu lea o Toeka+ le tagata Etoma o lē na tofia e vaaia auauna a Saulo i inā, ua faapea atu:+ “Na ou vaai i le atalii o Iese o alu atu i Nove, iā Aimeleka le atalii o Akitopo.+
10 Na ia fesili iā Ieova mo Tavita ma avatu iā te ia meaʻai. Na ia avatu fo‘i iā te ia le pelu a Koliata le Filisitia.”+
11 Ona auina atu loa lea e le tupu o le feʻau iā Aimeleka le atalii o Akitopo le ositaulaga, ma ositaulaga uma o le aiga o lona tamā sa iai i Nove. Ona latou ō mai uma lea i le tupu.
12 Ua fai mai Saulo: “Faamolemole, faalogo mai ia oe le atalii o Akitopo!” Ona ia tali atu lea: “O aʻu lenei, loʻu alii e.”
13 Ona fai mai lea o Saulo iā te ia: “Aiseā ua e foua ai aʻu, o oe ma le atalii o Iese, i lou avatu iā te ia o meaʻai ma le pelu, ma e fesili atu foʻi i le Atua mo ia? Ua faasagatau mai o ia ma lamalama iā te aʻu e pei ona faia i le aso nei.”
14 Ona tali atu lea o Aimeleka i le tupu: “O ai ea se tasi o au auauna e maufaatuatuaina* e pei o Tavita?+ O ia o le tane a le afafine o le tupu,+ o le taʻitaʻi o leoleo e puipuia oe, ma e faaaloalogia foʻi i lou aiga.+
15 Pe na faatoʻā amata ea i le asō ona ou fesili i le Atua mo ia?+ E mamao lava ma a‘u le mea o loo e fai mai ai! Ia aua neʻi faia e le tupu se mea i lana auauna ma le aiga atoa o loʻu tamā, auā e lē iloa e lau auauna se mea e tasi o nei mea uma.”+
16 Ae ua fai mai le tupu: “E te oti lava+ Aimeleka, o oe ma le aiga atoa o lou tamā.”+
17 Ona fai mai lea o le tupu i leoleo* na tutū i ona tafatafa: “Inā liliu atu ia ma fasioti ositaulaga a Ieova, auā ua latou ʻau iā Tavita. Na latou iloa foʻi o loo sola o ia ae latou te leʻi faailoa mai iā te aʻu!” Peitaʻi, e leʻi mananaʻo auauna a le tupu e faaoo o latou lima i ositaulaga a Ieova.
18 Ona fai mai lea o le tupu iā Toeka:+ “Inā e liliu atu ia ma fasi ositaulaga!” Ona liliu faavave atu lea o Toeka le tagata Etoma+ ma fasia ositaulaga. Na ia fasiotia i lenā aso tagata e toʻa 85 na oofu i efota e faia i ʻie lino.+
19 Na ia fasia foʻi le aai o ositaulaga o Nove+ i le pelu, o tane ma fafine, o tamaiti ma pepe, o povi, o asini, ma mamoe.
20 Ae ua sao se tasi o atalii o Aimeleka, le atalii o Akitopo, o Aviata+ lona igoa, ua sola ese o ia ma mulimuli atu iā Tavita.
21 Ona taʻu mai lea e Aviata iā Tavita: “Ua fasiotia e Saulo ositaulaga a Ieova.”
22 Ona fai atu lea o Tavita iā Aviata: “Na ou iloa lelei lava i lenā aso,+ auā sa iai i inā Toeka le tagata Etoma, e na te taʻuina atu lava lenei mea iā Saulo. E tuuaʻia lava aʻu i le feoti o tagata uma i le aiga o lou tamā.
23 Sau ta te nonofo. Aua e te fefe, auā o lē e saʻili e fasiotia oe, o loo saʻili foʻi e fasiotia aʻu; ou te puipuia oe.”+