O le Tusi Muamua o Samuelu 24:1-22
24 Ua foʻi mai Saulo mai i le tuliloaga o Filisitia, ona latou taʻu atu lea iā te ia e faapea: “Faauta! O loo iai Tavita i le toafa o Enokati.”+
2 Ua ave e Saulo o tagata e toʻa 3,000 na filifilia mai iā Isaraelu uma, ua ō atu e saʻili iā Tavita ma ona tagata i luga o papa e tataa ai ʻoti o le mauga.
3 Ua oo atu o ia i le pā maa o le lotoā o mamoe i le ala na iai le ana. Ona ulu atu lea o Saulo e faaalu lona otaotavale,* ae o loo nonofo Tavita ma ona tagata i le muliana.+
4 Ona fai mai lea o tagata o Tavita iā te ia: “O le aso lenei ua fetalai mai ai Ieova iā te oe, ‘Faauta! ua ou tuuina atu lou fili i lou lima,+ ma ia e faia iā te ia e tusa ma le mea ua e loto i ai.’” Ona tulaʻi lea o Tavita ma alu atu lemū, ua sesele ese le pito o le ofu tele o Saulo.
5 Ae ina ua uma, ua tuia pea le loto* o Tavita+ auā ua ia sesele ese le pito o le ofu tele o Saulo.
6 Ona ia fai atu lea i ona tagata: “Ia mamao mai i le silafaga a Ieova lo‘u faia o lenei mea i loʻu alii ua faauuina e Ieova, i le faaoo atu o loʻu lima iā te ia, auā o ia o lē ua faauuina e Ieova.”+
7 Ua taofia e Tavita ona tagata i nei upu, e na te leʻi faatagaina fo‘i i latou e osofa‘ia Saulo. Ae ua tulaʻi Saulo mai i le ana, ma alu atu i lona ala.
8 Ona tulaʻi lea o Tavita, ua alu i fafo mai i le ana ma valaau atu iā Saulo e faapea: “Loʻu alii e, le tupu!”+ Ua tepa mai Saulo i ona tua, ona faapaʻū lea o Tavita i le eleele ma ifo atu iā te ia.
9 Ua fai atu Tavita iā Saulo: “Aiseā e te faafofoga ai fua i upu a tagata e faapea, ‘Faauta! o loo saʻili Tavita e faia se mea leaga iā te oe’?+
10 E pei ona e silasila i ai i lenei aso, ua tuuina mai oe e Ieova i loʻu lima i le ana; na fai mai foʻi se tasi ou te fasioti iā te oe,+ ae ua ou alofa iā te oe ma ou fai atu i ai, ‘Ou te lē faaooina lava loʻu lima i loʻu alii, auā o ia o lē ua faauuina a Ieova.’+
11 Loʻu tamā e, silasila mai foʻi i le pito o lou ofu tele o loo i loʻu lima, auā na ou sesele ese le pito o lou ofu tele ae ou te leʻi fasioti iā te oe. O le mea lea e te iloa ma silafia ai, ou te lē mana‘o e faia se mea leaga iā te oe pe fouvale iā te oe, ou te leʻi agasala foʻi iā te oe,+ ae ua e lamalama e faauma loʻu ola.+
12 Ia faamasino Ieova i lo taʻua vā;+ ma ia tauimasui atu Ieova iā te oe ona o aʻu,+ ae e lē oo atu lava loʻu lima iā te oe.+
13 E pei ona fai mai o le muagagana i aso anamua, ‘E tupu mai le leaga i ē e amioleaga,’ ae ou te lē faaooina lava loʻu lima iā te oe.
14 O ai ea a‘u ua maliu mai ai le tupu e tuliloa? Ua na o a‘u o se ta‘ifau mate ma se ʻutu fiti.+
15 Ia fai Ieova ma faamasino, e na te faamasino i lo taʻua vā, e iloilo e ia le mea ua tupu, e tū foʻi o ia mo aʻu,+ e na te faamasinoina aʻu ma laveaʻi aʻu mai i lou lima.”
16 Ina ua uma ona tautala atu Tavita iā Saulo i nei upu, ona fai mai lea o Saulo: “O lou leo ea lea loʻu atalii e, Tavita?”+ Ona tagi leotele ai lea o Saulo.
17 Ua fai mai o ia iā Tavita: “Ua sili atu lou amiotonu nai lo o aʻu, auā ua e taui mai iā te aʻu i le lelei, ae ua ou taui atu iā te oe i le leaga.+
18 Ua e faaali mai i le asō le mea lelei ua e faia iā te aʻu, ina ua tuuina atu aʻu e Ieova i lou lima, ae e te leʻi fasiotia aʻu.+
19 Auā pe e iai se tagata e na te mauaina lona fili, ae e na te auina ese atu o ia ma le filemu? O lea, o le a tauia oe e Ieova i le lelei,+ ona o le mea ua e faia iā te aʻu i le aso nei.
20 Faauta! ua ou iloa lelei lava e fai oe ma tupu,+ ma o le a faatumauina le malo o Isaraelu iā te oe.
21 Ia e tautō mai iā te aʻu i luma o Ieova,+ e te lē tafiesea laʻu fanau pe a mavae atu aʻu, e te lē tineia foʻi loʻu igoa i le aiga o loʻu tamā.”+
22 Ua tautō Tavita iā Saulo, ona alu ai lea o Saulo i lona fale.+ Ae ua ō aʻe Tavita ma ona tagata i le nofoaga na lalafi ai.+
