O le Tusi Muamua o Samuelu 26:1-25
26 Mulimuli ane, ua ō atu tagata o Sifi+ iā Saulo i Kipea,+ ua faapea atu: “Pe e lē o lafi ea Tavita i le aʻega o Hakila e feagai ma Iesimoni?”*+
2 Ua tulaʻi Saulo ma alu ifo i le toafa o Sifi, na iā te ia foʻi tagata e toʻa 3,000 ua filifilia o Isaraelu, ina ia saʻili iā Tavita i le toafa o Sifi.+
3 Ua tolauapi Saulo i tafatafa o le auala i le aʻega o Hakila, lea e feagai ma Iesimoni, a o nofo Tavita i le toafa. Ua ia iloa ua mulimuli mai Saulo iā te ia i le toafa.
4 Ona aauina atu lea e Tavita o sipai e vaavaai, ina ia iloa ai po o sau moʻi Saulo.
5 Mulimuli ane, ua tulaʻi Tavita ma alu atu i le mea o loo tolauapi ai Saulo, ma ua iloa atu e Tavita le mea o loo taoto ai Saulo, faapea foʻi ma lana taʻitaʻiʻau o Apineru,+ le atalii o Neru. Ua taoto Saulo i le mea e tolauapi ai fitafita, ae ua tolauapi fitafita e siʻosiʻomia o ia.
6 Ona fai atu lea o Tavita iā Aimeleka le tagata Hetī,+ ma Apisai+ le tama a Seruia,+ le uso o Ioapo, e faapea: “O ai e ma te ō ifo iā Saulo i le togālauapi?” Ona faapea mai lea o Apisai: “Ou te alu ifo faatasi ma oe.”
7 Ona ō lea o Tavita ma Apisai i le mea o loo tolauapi ai fitafita, ua la maua atu o loo taoto Saulo o loo moe i le mea e tolauapi ai, ma o loo sunu‘i lana tao i le eleele i tafatafa o lona ulu, a o taooto Apineru ma fitafita uma o loo siʻosiʻomia o ia.
8 Ona fai mai lea o Apisai iā Tavita: “Ua tuuina mai e le Atua i le asō lou fili i lou lima.+ Faamolemole, tuu mai iā te aʻu seʻi oʻu tutu‘i iā te ia i le tao i le eleele, e na o le faatasi lava, ou te lē tutu‘i faalua iā te ia.”
9 Peitaʻi, ua fai atu Tavita iā Apisai: “Aua e te fasiotia o ia, auā po o ai ea e na te faaoo lona lima i lē ua faauuina a Ieova,+ ae e lē nofosala ai?”+
10 Ua toe fai atu Tavita: “Ou te tautō iā Ieova le Atua soifua, e fasia lava o ia e Ieova,+ pe oo mai le aso+ e oti ai o ia, pe e alu atu foʻi i se taua ma oti ai.+
11 Ae ia mamao mai i le silafaga a Ieova, ona faaoo atu loʻu lima i lē ua faauuina a Ieova!+ O lenei, inā tago ia faamolemole i le tao o loo i tafatafa o lona ao ma le faguvai, ma ta ō loa.”
12 Ona ave lea e Tavita o le tao ma le faguvai sa i tafatafa o le ulu o Saulo, ma la ō ese loa. E leai se tasi na vaai,+ pe iloa, pe na ala foʻi, auā ua momoe i latou uma, ona o le moegase mai iā Ieova na oo iā i latou.
13 Ona alu lea o Tavita i le isi itu ma tū i le tumutumu o le mauga e mamao, e mamao lava lo latou vā.
14 Ona valaau atu lea o Tavita i fitafita ma Apineru+ le atalii o Neru: “Apineru e, seʻi e tali mai ia!” Ae ua tali mai Apineru: “O ai ea oe e te valaau mai ai i le tupu?”
15 Ona fai atu lea o Tavita iā Apineru: “Pe e lē o oe ea o le toa? O ai foʻi i Isaraelu e tutusa ma oe? Aiseā la na e lē leoleo lelei ai i lou alii le tupu? Auā na alu atu le tasi fitafita ina ia faaumatia lou alii le tupu.+
16 E lē lelei lenei mea ua e faia. Ou te tautō iā Ieova le Atua soifua, ua tatau ona outou feoti auā ua outou lē leoleoina lo outou alii, o lē ua faauuina a Ieova.+ O lenei, seʻi vaai! O fea o iai le tao ma le faguvai+ a le tupu sa i tafatafa o lona ao?”
17 Ua mātauina e Saulo o le leo lea o Tavita, ma ua faapea mai: “Po o lou leo ea lea loʻu atalii e, Tavita?”+ Ona fai atu lea o Tavita: “O loʻu leo lava lea, loʻu alii e, le tupu.”
18 Ua toe faapea atu o ia: “Aiseā ua tulituliloa ai e loʻu alii lana auauna,+ o le ā ea se mea ua ou faia, ma pe e iai ea se mea ua ou nofosala ai?+
19 Faamolemole, ia faafofoga mai loʻu alii le tupu, i upu a lana auauna: Afai ua faaoso oe e Ieova e faasagatau mai iā te aʻu, ia talia e ia se taulaga i meaʻai* mai iā te aʻu. Ae afai ua faaoso oe e tagata,+ ia malaia i latou i luma o Ieova, auā ua latou tuliesea aʻu i le asō ina ia ou lē faatasi ma tagata* o Ieova,+ ua latou faapea mai, ‘Inā alu ia e auauna i isi atua!’
20 O lenei, aua neʻi masaa loʻu toto i le eleele i luma o Ieova; auā ua sau le tupu o Isaraelu e saʻili se ʻutu fiti,+ e tai pei ua ia tuli i le manulele o le koli i luga o mauga.”
21 Ona fai mai lea o Saulo: “Ua ou agasala.+ Inā toe foʻi mai ia loʻu atalii e, Tavita, ou te lē toe faia lava se mea leaga iā te oe, auā ua e faapelepeleina loʻu ola+ i lenei aso. Faauta! Ua ou gaoioi ma le valea, ua ou matuā sesē lava.”
22 Ona tali atu lea o Tavita: “O le tao lenei a le tupu, ia sau se tauleʻaleʻa e avatu.
23 O Ieova e na te taui atu i tagata taʻitoʻatasi e tusa ma lana amiotonu+ ma lona faamaoni, auā ua tuuina mai oe e Ieova i loʻu lima i le aso nei, ae ou te leʻi manaʻo e faaoo loʻu lima i lē ua faauuina a Ieova.+
24 Faauta! e pei ona ou faapelepeleina lou ola i lenei aso, ia faapea foʻi ona faapelepeleina e Ieova loʻu ola, ma laveaʻi iā te aʻu mai i puapuaga uma.”+
25 Ona fai mai lea o Saulo iā Tavita: “Ia faamanuia le Atua iā te oe loʻu atalii e, Tavita. O le a e faia mea silisili, ma o le a e manumalo.”+ Ona alu lea o Tavita i lona ala, ae ua toe foʻi Saulo i le mea e nofo ai o ia.+
Faamatalaga Pito i Lalo
^ Pe atonu “ma le toafa.”
^ Epe., “ma le tofi.” E ono aofia ai tagata ma le laueleele na latou nonofo ai.
^ Po o “taulaga i fatu.” Tagaʻi i le faamatalaga pito i lalo o le Levitiko 2:1.
