O le Tusi Muamua o Samuelu 27:1-12
-
Tuuina atu Sekeleka iā Tavita e tagata Filisitia (1-12)
27 Ae ua faapea ifo Tavita i lona loto: “E iai lava se aso e fasiotia ai aʻu e Saulo. E sili la ona ou sola atu+ i le nuu o Filisitia, ona lē toe saʻili lea o Saulo iā te aʻu i nuu uma o Isaraelu,+ ma ou sao ai mai i lona lima.”
2 Ua tulaʻi Tavita, ma ua latou ō ma tagata e toʻa 600+ na iā te ia, iā Akisa+ le atalii o Maoka, le tupu o Kata.
3 Ua nonofo faatasi pea Tavita ma Akisa i Kata, o Tavita ma ona tagata, e taʻitasi ma lona aiga. Sa faatasi o ia ma ana avā e toʻalua, o Ainoama+ le Isereelu, ma Apikaila+ le Karamelu, o lē sa avea ma avā a Napalu.
4 Ona taʻu atu lea iā Saulo ua sola atu Tavita i Kata, ona lē toe alu lea o ia e saʻili iā te ia.+
5 Ua fai atu Tavita iā Akisa: “Pe a tusa ai ma lou finagalo, ia tuu mai iā te aʻu faamolemole se nofoaga i se aai i nuu maotua ou te nofo ai. Aiseā e nofo ai fua lau auauna i le aai o le tupu faatasi ma oe?”
6 Ona tuuina atu lea e Akisa iā te ia o Sekeleka+ i lenā aso. O le mea lea ua fai ai le nuu o Sekeleka mo tupu o Iuta, e oo mai i le asō.
7 O le umi* na nofo ai Tavita i nuu maotua o Filisitia, e tausaga ma masina e fā.+
8 Ua fai ma masani a Tavita ma ona tagata le ō e osofaʻi tagata Kasuri,+ o tagata Kisera, ma tagata Amaleka,+ auā ua latou nonofo i fanua e amata mai i Telama e oo atu i Sura,+ ma alu ifo ai i le nuu o Aikupito.
9 Pe a osofaʻia e Tavita ia nuu, e na te lē faasaoina se tane po o se fafine,+ ae e na te aveina lafu mamoe, o lafu povi, o asini, o kamela, ma ofu, ona ia toe foʻi atu lea iā Akisa.
10 Pe a fesili mai Akisa: “O fea na outou osofaʻia i le asō?” E tali atu Tavita: “O le itu i saute* o Iuta,”+ po “O le itu i saute o le nuu o tagata Ieramaelu,”+ po “O le itu i saute o le nuu o tagata Keni.”+
11 E leʻi faasaoina e Tavita se tane po o se fafine e aumai i Kata, auā ua ia faapea ifo: “Neʻi o latou taʻuina atu i tatou e faapea, ‘O le mea lenei na faia e Tavita.’” (O le mea foʻi lenei na ia faia i le taimi atoa na nofo ai o ia i le nuu maotua o Filisitia.)
12 Ua talitonu Akisa iā Tavita, ma ua ia faapea ifo: ‘Ua matuā inosia o ia e lona nuu o Isaraelu; ma o le a fai pea o ia ma aʻu auauna.’
