O le Tusi Muamua o Samuelu 29:1-11
-
Lē maufaatuatuaina Tavita e tagata Filisitia (1-11)
29 Ua faapotopoto faatasi e Filisitia+ a latou ʻautau uma i Afeka, ae ua tolauapi Isaraelu i le vaipuna i Isereelu.+
2 Ua ō ane alii o Filisitia faatasi ma a latou ‘autau i vaega e taʻitoʻaselau ma taʻitoʻaafe, ae ua mulimuli atu Tavita ma ona tagata faatasi ma Akisa.+
3 Ua fai mai ta‘ita‘i o Filisitia: “Aiseā ua iai ai nei tagata Eperu i inei?” Ona fai atu lea o Akisa i ta‘ita‘i o le ‘autau a Filisitia: “O Tavita lenei le auauna a Saulo le tupu o Isaraelu, o lē na ma faatasi i le tausaga e tasi pe sili atu foʻi.+ Ou te le‘i maua iā te ia se mea leaga e tasi mai i le aso na sola mai ai iā te aʻu, e oo mai i le asō.”
4 Ona feita ai lea o ta‘ita‘i o Filisitia iā Akisa, ma ua latou fai mai iā te ia: “Ia e fai atu i le tagata e toe foʻi+ i le mea na e tofia e nofo ai; aua neʻi o tatou ō ifo faatasi ma ia i le taua, ina neʻi faasagatau mai o ia iā i tatou i le taua.+ Auā o le ā se mea e faalelei ai lenei tagata ma lona alii? Pe e lē o ulu ea o o tatou tagata?
5 Pe e lē o Tavita ea lea na latou pepese ai a o sisiva, ma faapea atu:
‘Ua fasia e Saulo le faitau afe,A o Tavita e faitau sefulu afe’?”+
6 Ona aami lea e Akisa+ o Tavita ma faapea atu iā te ia: “Ou te tautō iā Ieova le Atua soifua, ua e amio saʻo, ma ua lelei foʻi iā te aʻu lo ta ō faatasi i le taua,+ auā ou te le‘i maua lava se mea leaga iā te oe mai i le aso na e sau ai, e oo mai i le asō.+ Ae e lē maufaatuatuaina oe e alii o Filisitia.+
7 O lenei, inā toe foʻi ia ma le filemu, ma aua e te faia se mea e lē fiafia ai alii o Filisitia.”
8 Ae ua fai mai Tavita iā Akisa: “Aiseā? O le ā se mea ua ou faia? O le ā foʻi se mea leaga ua e silafia i lau auauna mai i le aso na ou sau ai iā te oe, e oo mai i le asō? Aiseā o le a ta lē ō ai e tau ma fili o loʻu alii le tupu?”
9 Ua tali atu Akisa iā Tavita: “Ua ou iloa e ese lou lelei e pei o se agelu a le Atua.+ Ae ua fai mai ta‘ita‘i o Filisitia, ‘Aua neʻi o tatou ō aʻe faatasi ma ia i le taua.’
10 O lenei, ia outou tulaʻi i le taeaopō ma auauna a lou alii na outou ō mai faatasi. Ia outou tulaʻi ma usu i le taeaopō pe a malamalama.”
11 Ua vave tulaʻi Tavita ma ona tagata, ua ō i le taeaopō ma toe foʻi atu i le nuu o Filisitia; ae ua ō aʻe Filisitia i Isereelu.+
