O le Tusi Muamua o Samuelu 31:1-13
-
Feoti Saulo ma ona atalii e toʻatolu (1-13)
31 Ua tau Filisitia ma Isaraelu,+ ma ua sosola tagata Isaraelu mai i luma o Filisitia, ua paʻuʻū foʻi le to‘atele ua fasia i le pelu i le mauga o Kilepoa.+
2 Ua tuliloa atu e Filisitia o Saulo ma ona atalii; ona fasia lea e Filisitia o atalii o Saulo, o Ionatana,+ o Apinatapa, ma Makisua.+
3 Ua vevela le taua ma Saulo, ua maua atu o ia e tagata fanafana aū, ua matuā manuʻa foʻi o ia ona o tagata fanafana aū.+
4 Ona fai atu lea o Saulo i lē o loo aveina ana meatau: “Inā seʻi ia lau pelu ma tutuʻi ai aʻu, ina neʻi ō mai na tagata lē peritomeina+ ma tutuʻi iā te aʻu, ma matuā faasauā iā te aʻu.” Ae e leʻi loto i ai lē na aveina ana meatau, auā ua matuā fefe lava o ia. Ona tago lea o Saulo i le pelu ma faapaʻū ai i luga.+
5 Ina ua vaai atu lē na aveina ana meatau ua oti Saulo,+ ona faapaʻū foʻi lea o ia i lana pelu, ua la feoti faatasi ai.
6 O lea, na feoti faatasi ai Saulo, o ona atalii e toʻatolu, o lē na aveina ana meatau, ma ona tagata uma i lenā aso.+
7 Ina ua vāai atu tagata o Isaraelu o ē na iai i le vanu,* ma ē na iai i vaipanoa o Ioritana ua sosola ʻautau a Isaraelu, ma ua feoti foʻi Saulo ma ona atalii, ona latou tuua lea o aai ma sosola,+ ae ua ō mai Filisitia ma nonofo ai i inā.
8 I le aso na sosoo ai, ina ua ō atu Filisitia e tatala ofu o ē na fasia, ona latou maua lea o Saulo ma ona atalii e toʻatolu, o loo taatitia i luga o le mauga o Kilepoa.+
9 Ona latou vavaeese lea o lona ulu ma tatala lona ofutau, ua latou auina faataamilo atu foʻi le feʻau+ i le nuu o Filisitia, e faailoa atu ai i fale* o o latou tupua+ ma le nuu.
10 Ona latou tuu lea o lona ofutau i le fale o tupua o Asaira, ae ua latou faamauina lona tino i le pā o Petesani.+
11 Ina ua faalogo ē o nonofo i Iapese-kiliata+ i le mea ua faia e Filisitia iā Saulo,
12 ona tutulaʻi lea o tagata totoa uma ma ō atu i le pō atoa, ma ua latou aveese tino o Saulo ma ona atalii mai i le pā o Petesani. Ua latou ō atu i Iapese ma susunu ai i inā.
13 Ona latou ave lea o o latou ponaivi+ ma tanu i lalo o le laau o le tamarisi i Iapese,+ ma latou anapopogi mo aso e fitu.
