O le Tusi Muamua o Samuelu 5:1-12
5 Ina ua faoa e Filisitia le Atolaau+ a le Atua moni, ona latou aveina lea mai i Epenesa agaʻi i Asetota.
2 Ua fetagofi Filisitia i le Atolaau a le Atua moni ma avatu i le malumalu* o lo latou atua o Takono, ma tuu i tafatafa o Takono.+
3 Ona fealapō lea o tagata Asetota i le aso na sosoo ai, ma vaaia le faatagata o Takono ua paʻū faō i le eleele i luma o le Atolaau a Ieova.+ Ona latou fetagofi lea iā Takono ma toe faatū i le mea na tū ai.+
4 Ina ua latou feala i le taeaopō o le isi aso, vaai! ua paʻū faō i le eleele le faatagata o Takono i luma o le Atolaau a Ieova, ua motu ese le ulu o Takono ma ona tapulima e lua, ma o loo taatitia i le faitotoʻa o le fale. E na o le ogātino* na totoe ai.
5 O le mea lea e lē solia ai le faitotoʻa o le fale o Takono i Asetota, e ositaulaga ma i latou uma e ō atu i le fale o Takono e oo mai i aso nei.
6 Ua mamafa le aao o Ieova i tagata o Asetota, ua ia faatigāina i latou e ala i le taia o tagata i Asetota ma ona itu uma i silailalo.+
7 Ina ua iloa e tagata Asetota le mea ua tupu, ona latou faapea ane lea: “Aua neʻi tuua iā i tatou le Atolaau a le Atua o Isaraelu, auā ua mamafa lona aao iā i tatou atoa ma Takono lo tatou atua.”
8 Ona latou aami lea ma faapotopoto o alii uma o Filisitia ma faapea atu: “O le ā se mea e tatou te faia i le Atolaau a le Atua o Isaraelu?” Ua latou faapea mai: “Ia ave i Kata+ le Atolaau a le Atua o Isaraelu.” Ona latou ave lea o le Atolaau a le Atua o Isaraelu i inā.
9 Ina ua uma ona latou aveina le atolaau i inā, ona oo mai lea o le aao o Ieova i le aai ma ua matuā fenuminumia‘i ai. Ua ia taia foʻi tagata o le aai e mai i tamaiti e oo lava i tagata matutua, ma ua feosofi ai silailalo iā i latou.+
10 Ona latou auina atu lea o le Atolaau a le Atua moni i Ekerona.+ Ina ua oo le Atolaau a le Atua moni i Ekerona, ona alalaga ai lea o tagata Ekerona e faapea: “Ua latou aumaia le Atolaau a le Atua o Isaraelu iā i tatou, ina ia fasiotia ai i tatou ma lo tatou nuu!”+
11 Ona latou aami lea ma faapotopoto o alii uma o Filisitia ma faapea atu: “Inā auina ese atu ia le Atolaau a le Atua o Isaraelu ma ia toe faafoʻi atu i lona nuu, ina neʻi fasiotia ai i tatou ma lo tatou nuu.” Auā ua matataʻu le aai atoa ina neʻi latou feoti; ua matuā mamafa foʻi le aao o le Atua moni i inā,+
12 ma o tagata foʻi e leʻi feoti na taia i silailalo. Ua alu aʻe pea i le lagi le alaga a le aai mo se fesoasoani.
