O le Tusi Muamua o Samuelu 6:1-21
-
Faafoʻi e Filisitia le Atolaau i Isaraelu (1-21)
6 Sa iai le Atolaau+ a Ieova i le nuu o Filisitia mo masina e fitu.
2 Ua aami e Filisitia o ositaulaga ma faataulāitu,+ ua faapea atu: “O le ā se mea e matou te faia i le Atolaau a Ieova? Inā taʻu mai ia iā i matou, pe faapefea ona matou auina ese atu le atolaau i lona nuu.”
3 Ona latou tali mai lea: “Afai e tou te auina ese atu le atolaau o le feagaiga a Ieova le Atua o Isaraelu, aua neʻi outou auina ese atu e aunoa ma se taulaga. E tatau ona outou toe faafoʻi atu faatasi ma se taulaga o le nofosala.+ Ona faamālōlōina ai lea o outou, e tou te iloa ai foʻi le māfuaaga ua lē teʻa ese ai lona aao iā te outou.”
4 Ona latou fai atu lea: “O le ā le taulaga o le nofosala e matou te avatu iā te ia?” Ua latou fai mai: “E tusa ma le aofaʻi o alii o Filisitia,+ ia outou avatu silailalo auro e lima ma isumu auro e lima, auā ua taia outou uma ma o outou alii i lenei mala.
5 Ia outou faia ni faatusa o o outou silailalo, ma ni faatusa o isumu+ ua faatamaʻiaina ai le nuu, ma ia outou faamamaluina le Atua o Isaraelu. Atonu e na te faamāmā ai lona aao iā te outou, o lo outou atua, ma lo outou laueleele.+
6 Aiseā foʻi e faamaaa ai o outou loto e pei ona faamaaa e Aikupito ma Farao o o latou loto?+ Ina ua Ia faasalaina i latou,+ ona latou tuuina atu lea o Isaraelu e ō, ma latou ō ai loa.+
7 O lenei, inā fai ia se taavale toso fou, ma ave ni povi fafine se lua o loo fesusui a la tama, e leʻi faaeeina i ai se avega. Ia outou nonoa povi i le taavale toso, ae ia toe faafoʻi a la tama i le falepovi.
8 Ia outou ave foʻi le Atolaau a Ieova ma tuu i luga o le taavale toso, ma ia tuu i totonu o se pusa i tafatafa o le atolaau, o mea ua faia i le auro e avatu iā te ia o se taulaga o le nofosala.+ Ona outou auina ese atu lea, ma tuu atu e alu.
9 Ia outou vaavaai: Afai e alu aʻe le atolaau i Pete-semesa,+ i le ala o lona nuu, o ia lava na faaoo maia lenei malaia tele; ae afai e leai, ua tatou iloa ai e leʻi paʻi mai le aao o lo latou Atua iā i tatou; ae o se faalavelave faafuaseʻi na tupu iā i tatou.”
10 Ona faapea lava lea ona faia e tagata. Ua latou ave povi fafine e lua o loo fesusui a la tama, ma nonoa i le taavale toso, ae ua loka a la tama i le falepovi.
11 Ona latou tuu lea o le Atolaau a Ieova i luga o le taavale toso, atoa ma le pusa o loo iai isumu auro, ma faatusa o o latou silailalo.
12 Ua ō atu saʻo povi i le auala i Pete-semesa.+ Ua ō atu i le ala tele ma o loo fetagisi, e leʻi liliu fo‘i i le itu taumatau po o le itu tauagavale. O loo mulimuli atu i tua o povi alii o Filisitia, o loo savavali e oo atu i le tuaoi o Pete-semesa.
13 O loo faia e tagata o Pete-semesa le seleselega o saito i le fanua laugatasi.* Ina ua latou tetepa aʻe ma iloa ai le Atolaau, ona latou matuā olioli ai lea.
14 Ua oo le taavale toso i le fanua o Iosua le tagata Pete-semesa ma tū ai i inā e lata i se maa telē. Ona latou taisi lea o laau o le taavale toso e fai ma fafie, ma latou ofoina atu povi+ o se taulaga mū iā Ieova.
15 Ona ave ifo lea e sa Levī+ o le Atolaau a Ieova ma le pusa sa iai, lea na iai mea na faia i auro, ma latou tuuina i luga o le maa telē. Ona ofoina atu lea e tagata Pete-semesa+ o taulaga mū, ma faia taulaga iā Ieova i lenā aso.
16 Ina ua iloa atu e alii e toʻalima o Filisitia lenei mea, ona latou toe foʻi ai lea i Ekerona i lenā aso.
17 O silailalo auro nei na avatu e Filisitia o se taulaga o le nofosala iā Ieova:+ e tasi mo Asetota,+ e tasi mo Kasa, e tasi mo Asekelona, e tasi mo Kata,+ ma le tasi mo Ekerona.+
18 O isumu auro foʻi e tusa ma le aofaʻi o aai uma o Filisitia, o aai o alii e toʻalima, e amata mai i aai malupuipuia e oo atu i nuu maotua.
O le maa telē lea na tuu ai i luga le Atolaau a Ieova, ua fai ma molimau e oo mai i le asō i le fanua o Iosua le tagata Pete-semesa.
19 Ona fasia lea e le Atua o tagata Pete-semesa, auā ua latou vaavaai i le Atolaau a Ieova. Ua ia fasiotia foʻi tagata o le nuu e to‘a 50,070,* ona faavauvau ai lea o le nuu auā ua matuā toʻatele lava tagata ua fasiotia e Ieova.+
20 Ua faapea ane tagata Pete-semesa: “O ai e mafai ona tū atu i luma o lenei Atua paia+ o Ieova, ma pe e mafai ona alu ese o ia mai iā i tatou ae alu atu i isi?”+
21 Ona latou aauina atu lea o ni avefeʻau i ē o nonofo i Kiriata-iarima,+ ua faapea atu: “Ua faafoʻi mai e Filisitia le Atolaau a Ieova. Inā ō mai ia, ma avatu iā te outou.”+
Faamatalaga Pito i Lalo
^ E faasino atu i le fanua laugatasi i le pito i lalo o se vanu.
^ Epe., “tagata e toʻa 70, o tagata e toʻa 50,000.”
