O le Tusi Muamua o Samuelu 7:1-17
7 Ua ō mai tagata o Kiriata-iarima ma ave aʻe le Atolaau a Ieova i le fale o Apinatapa+ i luga o le aʻega, ma ua latou faapaiaina Eleasaro lona atalii e leoleoina le Atolaau a Ieova.
2 Ua mavae le tele o aso, ua atoa le 20 tausaga talu ona iai le Atolaau i Kiriata-iarima, ma ua amata ona sa‘ili atu aiga uma o Isaraelu iā Ieova.+
3 Ua fai atu Samuelu i aiga uma o Isaraelu: “Afai e tou te toe foʻi atu iā Ieova ma o outou lotoatoa,+ inā tuu ese ia atua ese+ ma tupua o Asaira+ mai iā te outou, ma uaʻi atoatoa atu o outou loto iā Ieova ma auauna tau lava o ia,+ ona ia lavea‘ia lea o outou mai i lima o Filisitia.”+
4 Ona tuu ese ai lea e le fanauga a Isaraelu o faatusa o Paala ma Asaira, ae e na o Ieova+ lava ua latou auauna atu i ai.
5 Ua fai atu Samuelu: “Ia faapotopoto faatasi mai Isaraelu uma i Mesepa,+ ina ia ou tatalo iā Ieova mo outou.”+
6 Ona latou faapotopoto faatasi ai lea i Mesepa, ua latou utu mai foʻi vai ma sasaa i luma o Ieova ma anapopogi ai pea i lenā aso.+ Ua latou faapea ane: “Ua matou agasala iā Ieova.”+ Ua faamasino+ Samuelu i le fanauga a Isaraelu i Mesepa.
7 Ua faalogo Filisitia ua faapotopoto faatasi le fanauga a Isaraelu i Mesepa, ona ō aʻe lea o alii o Filisitia+ e tau ma Isaraelu. Ina ua faalogo le fanauga a Isaraelu i lenei mea, ona latou fefefe ai lea ona o Filisitia.
8 Ona fai mai lea o le fanauga a Isaraelu iā Samuelu: “Aua e te mapu i le valaau atu iā Ieova lo tatou Atua mo se fesoasoani mo i tatou,+ ma faaolaina ai i tatou mai i lima o Filisitia.”
9 Ua ave e Samuelu le tamaʻi mamoe o loo susu ma ofo atu ai le taulaga mū,+ o le taulaga atoa iā Ieova; ona valaau lea o Samuelu iā Ieova mo se fesoasoani ona o Isaraelu, ma ua tali mai Ieova iā te ia.+
10 A o faia e Samuelu le taulaga mū, ae ua faalatalata mai Filisitia e tau ma Isaraelu. Ona faapā mai lea e Ieova o faititili leotetele+ iā Filisitia i lenā aso, ina ia fenuminumia‘i ai i latou;+ ma ua faatoʻilaloina ai i latou i luma o Isaraelu.+
11 Ona ō atu lea o tagata o Isaraelu mai i Mesepa ma tuliloa iā Filisitia, ma ua fasiotia i latou e oo ifo i le itu i saute o Peteka.
12 Ona ave lea e Samuelu o se maa+ ma tuu i le vā o Mesepa ma Iesana, ua faaigoa foʻi iā Epenesa,* auā ua ia faapea ane: “Ua fesoasoani Ieova iā i tatou seʻia oo mai i le aso nei.”+
13 Ua toʻilalo Filisitia, ma e leʻi toe ō mai lava i latou i le laueleele o Isaraelu;+ sa iai pea le aao o Ieova faasaga iā Filisitia i aso uma o Samuelu.+
14 Ua toe tuu mai foʻi iā Isaraelu o aai na faoa e Filisitia mai iā Isaraelu, e mai i Ekerona e oo atu i Kata, na toe maua foʻi e Isaraelu o latou laueleele mai i lima o Filisitia.
Ua filemu fo‘i le vā o Isaraelu ma tagata Amorī.+
15 Sa faamasino pea Samuelu i Isaraelu i aso uma o lona ola.+
16 Sa malaga atu o ia i tausaga ta‘itasi ma faataamilo i Peteli,+ o Kilikala,+ ma Mesepa,+ ua ia faamasino foʻi iā Isaraelu i ia nuu uma.
17 Ae e toe foʻi lava o ia i Rama,+ auā o i inā sa iai lona aiga ma na ia faamasinoina ai fo‘i Isaraelu i inā. Ua ia faia ai foʻi se fata faitaulaga iā Ieova.+
Faamatalaga Pito i Lalo
^ Lona uiga “Maa o le Fesoasoani.”
