O le Tusi Muamua o Samuelu 8:1-22
8 Ua oo ina toeaina Samuelu, ona ia tofia lea o ona atalii e fai ma faamasino iā Isaraelu.
2 O le igoa o lona atalii ulumatua o Ioelu, a o le igoa o le lona lua o Avia;+ ua fai i laʻua ma faamasino i Peresepa.
3 Ae e leʻi savavali ona atalii i ona ala; ua la naunau i polofiti e maua ona o faiga lē saʻo,+ ua la talia foʻi faiga faaalatua,+ ma faia faamasinoga faapiʻopiʻo.+
4 Ona faapotopoto faatasi lea o toeaina uma o Isaraelu, ma ō mai iā Samuelu i Rama.
5 Ua latou fai mai iā te ia: “Faauta! Ua e toeaina, ae e lē o savavali ou atalii i ou ala. O lenei, ia e tofia se tupu e faamasino iā i matou e pei o isi nuu uma.”+
6 Ae ua lē fiafia Samuelu ina ua latou fai mai: “Ia aumai se tupu e faamasino iā i matou.” Ona tatalo lea o Samuelu iā Ieova,
7 ma ua fetalai mai Ieova iā Samuelu: “Ia e faalogo i upu uma ua fai atu ai le nuu iā te oe; auā e lē o oe ua latou tetee i ai, a o aʻu ua latou teena mai i le avea ma o latou tupu.+
8 O loo latou faia pea mea na latou faia i le aso na ou aveina aʻe ai i latou mai i Aikupito e oo mai i le asō; ua latou tuulafoaʻiina pea aʻu+ ae auauna atu i isi atua,+ ma ua faapea foʻi ona latou faia iā te oe.
9 O lenei, ia e faalogo i la latou upu. Ae ia e matuā lapataʻia i latou, ma taʻu atu i ai mea e manaʻomia e le tupu o le a pulea i latou.”
10 Ona faailoa atu lea e Samuelu i ē na talosaga mai iā te ia mo se tupu, o upu uma na fetalai mai ai Ieova.
11 Ua ia fai atu: “O mea nei e manaʻomia e le tupu o le a pule iā te outou:+ E na te aveina o outou atalii+ e ō i ana kariota+ o le taua, e fai ma ana ʻau e tiʻetiʻe i solofanua,+ ma e taufetuli foʻi nisi i luma o ana kariota.
12 E na te tofia foʻi mo ia o alii e pule i ʻau e taʻitoʻaafe+ ma alii e pule i ʻau e taʻitoʻalima sefulu,+ o nisi e suatia lona fanua,+ selesele lana seleselega,+ ma faia ana auupega o le taua ma auupega o ana kariota.+
13 E ave foʻi e ia o o outou afafine ina ia faia uu manogi, kuka, ma fai falaoa.+
14 E na te aveina foʻi o outou fanua, o togāvine, ma togāolive+ e sili ona lelei ma foaʻi atu i ana auauna.
15 E na te aveina mea e sefuluaʻi mai i a outou togāsaito ma a outou togāvine, ma foaʻi atu i ona tagata aloaʻia ma ana auauna.
16 E ave foʻi e ia a outou auauna tane ma a outou auauna fafine, ma a outou lafumanu e sili ona lelei, ma a outou asini, e fai ai ana galuega.+
17 E na te ave foʻi mea e sefuluaʻi mai i a outou lafumanu,+ ma e fai outou ma ana auauna.
18 E iai se aso o le a outou alalaga atu ai ona o le tupu na outou filifilia,+ ae e lē tali mai Ieova iā te outou i lenā aso.”
19 Ae e leʻi fia faalogo le nuu i upu a Samuelu, ma faapea mai: “E leai, ua matou maumaua‘i e fai so matou tupu e pule iā i matou.
20 Ona pei ai lea o i matou o isi nuu uma, e faamasinoina i matou e lo matou tupu, e na te ta‘ita‘iina foʻi i matou, ma tau a matou taua.”
21 Ua faalogo Samuelu i upu uma a le nuu; ona ia toe taʻua lea a o faafofoga mai Ieova.
22 Ua fetalai mai Ieova iā Samuelu: “Ia e faalogo i la latou upu, ma tofia se tupu e pule iā i latou.”+ Ona fai atu lea o Samuelu i tagata o Isaraelu: “Inā taʻitasi ia ma alu i lona aai.”
