O le Tusi Muamua i le Faapotopotoga i Tesalonia 3:1-13
3 O lea, ina ua lē mafai ona matou onosaʻi, ona matou manatu ai lea e sili ona nonofo na o i matou i Atenai;+
2 ua matou auina atu foʻi Timoteo+ lo tatou uso, ma o le auauna a le Atua* o lē e talaʻia le tala lelei e uiga i le Keriso, ina ia faamausalīina* ai outou ma faamāfanafanaina e tusa ma lo outou faatuatua,
3 ina neʻi iai se tasi e faavaivai* ona o nei puapuaga. Auā ua outou iloa, e lē mafai ona tatou ʻalofia na mafatiaga.*+
4 Auā a o matou faatasi ma outou, e masani ona matou muaʻi fai atu iā te outou o le a oo iā i tatou puapuaga, ma o mea lava na ua tutupu e pei ona outou iloaina.+
5 O le mea lea, ina ua ou lē toe lavā onosaʻi, sa ou auina atu Timoteo iā te outou ina ia iloa po o faapeʻī mai lo outou faamaoni,+ ina neʻi iai ni mea na faaosoosoina ai outou e Lē e faaosooso,+ ma e ono iʻuvale ai la matou galuega fitā.
6 A o lenei ua toe foʻi mai Timoteo mai iā te outou,+ ma taʻu mai iā i matou le tala lelei e uiga i lo outou faamaoni ma le alofa, ma o loo faaauau ona outou fiafia pe a manatuaina i matou, ma naunau e fia feiloaʻi iā i matou e pei foʻi ona matou fia feiloaʻi iā te outou.
7 O le mea lea le ʻauuso e, ua faamāfanafanaina ai i matou i lo outou faamaoni, e ui i o matou mafatiaga* ma puapuaga uma.+
8 Auā e faafouina lo matou malosi* pe a outou tutū mausalī i le Alii.
9 Auā e faapefea ona faailoa atu lo matou faafetai i le Atua mo outou, ona o le tele o le olioli ua matou maua i luma o le Atua ona o outou?
10 E matou te matuā faatoga i le pō ma le ao, ina ia feiloaʻi ma outou* ma faaatoatoa mea e lē o atoa ai lo outou faatuatua.+
11 Tau ina ia saunia e lo tatou Atua o le Tamā lea, ma lo tatou Alii o Iesu se ala e matou te oo atu ai iā te outou.
12 Tau ina ia faatuputeleina foʻi e le Alii lo outou alofa, ioe, ia tele lo outou alofa o le tasi i le isi+ ma i tagata uma, e pei foʻi ona matou alolofa atu iā te outou,
13 ina ia faatumauina ai e ia o outou loto, ia lē taʻuleagaina ma ia paia i luma o lo tatou Atua,+ o le Tamā lea, i le faatasi mai o lo tatou Alii o Iesu+ ma le ʻaupaia uma.
Faamatalaga Pito i Lalo
^ Pe atonu “o sē e galulue faatasi ma le Atua.”
^ Po o le “faamalosia.”
^ Ele., “lūlūina.”
^ Po o le “ua tofia i tatou mo lenei lava mea.”
^ Ele., “i mea na matou mana‘omia.”
^ Ele., “ua matou ola.”
^ Ele., “vaai i o outou foliga.”