O le Tusi Muamua i le Faapotopotoga i Tesalonia 5:1-28
5 A o taimi ma tau o tausaga le ʻauuso e, e lē manaʻomia ona tusi atu ai se tasi iā te outou.
2 Auā ua outou iloa lelei, e oo mai lava le aso o Ieova*+ e pei o se gaoi i le pō.+
3 O le taimi lava e latou te faapea ane ai, “Ua filemu ma saogalemu!” ona oo faafuaseʻi mai loa lea o le faaumatiaga iā i latou,+ e pei o le tigā o le fafine tō o le a fanau, ma e latou te lē sao ai lava.
4 A o outou uso e, e tou te lē o iai i le pōuliuli ina neʻi maua mai outou e lenā aso, e pei ona maua o tagata gāoi pe a malamalama,
5 auā o outou uma o atalii o le malamalama ma atalii o le ao.+ E lē o i tatou o ni tagata o le pō, po o tagata o le pōuliuli.+
6 O le mea lea, aua neʻi o tatou momoe pea e faapei o isi,+ ae ia tatou mataala+ ma faaauau ona mafaufau lelei.+
7 Auā o i latou e momoe, e momoe i le pō, ma o i latou e onanā, e onanā i le pō.+
8 A o i tatou o tagata o le ao, ia faaauau ona tatou mafaufau lelei ma ia tatou oofu i le ufifatafata o le faatuatua ma le alofa, atoa ma le faamoemoe i le faaolataga e pei o se puloutau+
9 auā e leʻi filifilia i tatou e le Atua mo le toʻasā, ae ia maua le faaolataga+ e ala i lo tatou Alii o Iesu Keriso.
10 Na maliu o ia mo i tatou,+ auā e tusa lava pe e tatou te feala pe momoe,* ae o le a tatou ola faatasi ma ia.+
11 O le mea lea, ia outou fefaalaeiauaʻi* pea ma atiaʻe e le tasi le isi,+ e pei lava ona outou faia nei.
12 O lenei le ʻauuso e, ua matou talosaga atu iā te outou ina ia faaaloalo i ē o loo galulue fitā mo outou, ma vaavaaia outou i le galuega a le Alii, ma apoapoaʻi atu iā te outou;
13 ma ia matuā manatu mamafa iā i latou ma le alofa ona o la latou galuega.+ Ia outou tausia pea le filemu.+
14 Uso e, e matou te ʻaiʻoi atu ina ia lapataʻi* atu i ē faalogogatā,+ ia faamāfanafana i ē lotomafatia,* ia fesoasoani i ē vaivai, ma ia onosaʻi i tagata uma lava.+
15 Aua neʻi outou taui atu le leaga i le leaga i se tasi,+ ae ia tausisi pea e faia le mea lelei e le tasi i le isi, atoa ma isi tagata uma lava.+
16 Ia olioli pea.+
17 Ia tatalo e lē aunoa.+
18 Ia faafetai i mea uma lava.+ O le finagalo lea o le Atua mo outou e ala iā Keriso Iesu.
19 Aua neʻi outou tineia le mumū o le agaga.+
20 Aua le manatu faatauvaa i valoaga.+
21 Ia faamautinoa i mea uma;+ ia taofimau i le mea e lelei.
22 Ia faamamao mai i mea leaga eseese uma.+
23 Tau ina ia faapaia atoatoa outou e le Atua o le filemu. Uso e, tau foʻi ina ia faasaoina ma ia lē taʻuleagaina lo outou agaga, o le ola, atoa ma le tino, i le faatasi mai o lo tatou Alii o Iesu Keriso.+
24 E faamaoni lē ua valaauina outou, ma e na te faia lava lea mea.
25 Uso e, ia faaauau ona outou tatalo mo i matou.+
26 Ia faafeiloaʻi uso uma i le sogi paia.
27 Ua ou tuu atu iā te outou lenei tiute tauave mai i le Alii, ina ia faitau atu lenei tusi i uso uma lava.+
28 Ia iā te outou le agalelei faifua o lo tatou Alii o Iesu Keriso.
Faamatalaga Pito i Lalo
^ Po o le “momoe i le oti.”
^ Po o le “fefaamāfanafanaa‘i.”
^ Po o le “apoapoa‘i.”
^ Po o “ē lotovaivai.” Ele., “ē lotoiti.”
