O le Tusi Muamua iā Timoteo 1:1-20
1 O aʻu o Paulo, o le aposetolo a Keriso Iesu ona o le poloaʻiga a le Atua lo tatou Faaola, atoa ma Keriso Iesu lo tatou faamoemoe,+
2 o laʻu tusi iā Timoteo,*+ o le atalii moni+ i le faatuatua:
Tau ina ia iā te oe le agalelei faifua, o le alofa mutimutivale, ma le filemu mai i le Atua le Tamā, ma Keriso Iesu lo tatou Alii.
3 E pei ona ou faalaeiau atu iā te oe ina ia e nofo i Efeso, a o oʻu sauni e alu atu i Maketonia, ia faapea lava ona e faia, ina ia e poloaʻi atu i nisi e aua le aʻoaʻo atu i mataupu ese,
4 aua foʻi le faalogo atu i tala sesē+ ma gafa e leai se uiga. O na mea e iʻu ai i mea lē aogā+ ma faatupu ai masalosaloga, nai lo o le faailoa atu o se mea mai i le Atua e tusa ai ma le faatuatua.
5 O le mea moni, o le autū o lenei faatonuga,* o le alofa lea+ mai i se lotomamā ma se lotofuatiaifo lelei, ma le faatuatua+ e lē faatagāfai.
6 Ua liliuese nisi mai i nei mea, ma ua faasesēina ai i latou i talanoaga lē aogā.+
7 Ua latou mananaʻo e avea ma faiaʻoga+ o le tulafono, ae e lē malamalama i mea o loo latou tautatala i ai po o mea foʻi o loo latou finau maumauaʻi i ai.
8 Ua tatou iloa e lelei le Tulafono pe afai e saʻo ona faatatauina e se tasi
9 i le iloaina na faavaeina le tulafono, e lē mo le tagata amiotonu, ae e mo ē e solitulafono+ ma ē e fouvale, o ē e faalēmataʻu ma ē e agasala, o ē e lē faamaoni* ma ē e faaleaga mea paia, o ē e fasiotia tamā ma tinā, ma ē e fasioti tagata,
10 o ē e faia amioga lē mamā taufeusuaʻiga,* o tane e feusuaʻi ma isi tane,* o ē e ave faamalosia tagata, o ē e tala pepelo, o ē e lē tausia a latou folafolaga,* ma mea uma lava e tetee atu i aʻoaʻoga aogā*+
11 e tusa ai ma le tala lelei mamalu a le Atua fiafia, lea na tuuina mai iā te aʻu.+
12 Ou te faafetai iā Keriso Iesu lo tatou Alii, o lē na tuuina mai iā te aʻu le mana, auā ua ia manatu ua ou faamaoni, e ala i lona tofiaina o aʻu i lenei faiva,+
13 e ui lava sa ou upuleaga muamua ma faasauā, ma o se tagata fiasili.+ Peitaʻi, na faaalia le alofa mutimutivale iā te aʻu, auā na ou faia faapea i loʻu lē iloa ma loʻu lē faatuatua.
14 Ae na ou mauaina le tele o le agalelei faifua o lo tatou Alii, atoa ma le faatuatua ma le alofa o Keriso Iesu.
15 E maufaatuatuaina lenei faamatalaga, ma e tatau lava ona taliaina atoatoa: Na maliu mai Keriso Iesu i le lalolagi ina ia faaolaina o ē e agasala,+ ma na sili lava ona ou agasala i lo o i latou.+
16 Peitaʻi, na faaalia mai le alofa mutimutivale iā te aʻu, auā o aʻu na sili lava ona agasala, ae ua faaalia ai e Keriso Iesu lona onosaʻi tele, ina ia avea aʻu ma faaaʻoaʻo iā i latou o ē e faatuatua iā te ia mo le ola e faavavau.+
17 O lenei, ia iai i le Tupu o le vavau,+ o lē e soifua pea+ ma e lē vaaia,+ o le Atua e toʻatasi,+ le viiga ma le mamalu e faavavau, faavavau lava. Amene.
18 Loʻu atalii e, Timoteo, ua ou tuuina atu iā te oe lenei faatonuga* e tusa ma valoaga e faatatau iā te oe, ina ia faaauau ai ona e tau le taua lelei,+
19 ia taofimau i le faatuatua ma se lotofuatiaifo lelei+ lea na lafoaʻia e nisi, ma ua faavaatuʻia ai lo latou faatuatua.
20 E aofia ai Umenaio+ ma Alesana, o ē ua ou tuuina atu iā Satani,+ ina ia aʻoaʻia ai i laʻua e aua le fai upuleaga.
Faamatalaga Pito i Lalo
^ Lona uiga “O Lē e Faamamaluina le Atua.”
^ Po o le “poloaʻiga.”
^ Po o le “lē alolofa faamaoni.”
^ Po o “ē e tautō pepelo.”
^ Po o “aʻoaʻoga e malosi ai; aʻoaʻoga e mālōlōina ai.”
^ Tagaʻi i le Uiga o Upu.
^ Ele., “o tane e momoe ma isi tane.”
^ Po o le “poloaʻiga.”
