O le Tusi Muamua o Tupu 11:1-43
11 Ae ua alofa le tupu o Solomona i le toʻatele o fafine mai i nuu ese,+ e ese mai i le afafine o Farao:+ o fafine mai i Moapi,+ Amoni,+ Etoma, Saitonu,+ ma fafine sa Hetī.+
2 O i latou nei na ō mai mai i nuu ia na fetalai ai Ieova i le fanauga a Isaraelu: “Aua tou te ō atu iā i latou,* aua foʻi neʻi o latou ō mai iā te outou; auā e mautinoa o le a latou faaliliuina o outou loto, ina ia mulimuli atu i o latou atua.”+ Ae ua matuā māfana ma alofa Solomona iā i latou.
3 Ua iā te ia o avā e toʻa 700 o ni purinisese, ma palake e toʻa 300; ua faasolosolo mālie foʻi ona faaliliuina lona loto e ana avā.*
4 Ua oo ina toeaina Solomona,+ ona faaliliuina lea e ana avā o lona loto ina ia mulimuli atu i isi atua,+ ma e leʻi atoatoa foʻi* lona loto iā Ieova lona Atua, e pei o le loto o Tavita lona tamā.
5 Ua mulimuli foʻi Solomona iā Asaira+ le atua fafine o tagata Saitonu, ma Melekoma+ le atua inosia o tagata Amonī.
6 Ua faia e Solomona o mea leaga i luma o Ieova, e leʻi mulimuli atoatoa foʻi o ia iā Ieova e pei ona sa faia e Tavita lona tamā.+
7 Ona faia lea e Solomona o se mea maualuga+ mo Kimosa le atua inosia o Moapi, i luga o le mauga lea na i luma o Ierusalema, faapea foʻi mo Moloka+ le atua inosia o tagata Amonī.+
8 Ua faapea lava ona ia faia mo ana avā uma mai i nuu ese, o ē na faamūina taulaga ma fai taulaga i o latou atua.
9 Ona toʻatamaʻi lea o Ieova iā Solomona, auā ua liliuese lona loto mai iā Ieova le Atua o Isaraelu,+ o lē na faaali faalua mai iā te ia,+
10 ma lapata‘ia o ia i lenei mea, ina ia aua neʻi mulimuli i isi atua.+ Ae e leʻi tausia e ia le mea na poloaʻi mai ai Ieova.
11 Ona fetalai mai lea o Ieova iā Solomona: “Ona ua e faia lenei mea, ma ua e lē tausia laʻu feagaiga ma aʻu tulafono na ou poloaʻiina ai oe, o le a ou sasaeese le malo mai iā te oe, ma ou tuuina atu i se tasi o au auauna.+
12 Peitaʻi, ou te lē faia lenei mea i ou aso ona o Tavita lou tamā. O le a ou sasaeese le malo mai i lou atalii,+
13 ae ou te lē sasaeese le malo atoa.+ E tasi le ituaiga ou te tuuina atu i lou atalii+ ona o Tavita laʻu auauna, ona o Ierusalema foʻi na ou filifilia.”+
14 Ona faatūina lea e Ieova o sē e tetee iā Solomona,+ o Atata le tagata Etoma, e mai i le aigātupu o Etoma.+
15 Ina ua faato‘ilaloina e Tavita tagata Etoma,+ ona alu aʻe lea o Ioapo le taʻitaʻiʻau e tanu i latou na fasiotia, ma na taumafai o ia e fasiotia tane uma i Etoma.
16 (Auā e ono masina na nonofo ai i inā Ioapo ma Isaraelu uma, seʻia tafiesea e ia o tane uma i Etoma.)
17 Ae ua sola ese Atata faatasi ma nisi o tagata Etoma o auauna a lona tamā, ma ua ō atu i Aikupito a o tamaitiiti Atata.
18 Ona latou ō ese lea mai i Mitiana ae ō atu i Parana. Ua latou ave foʻi tagata mai i Parana+ ma ō atu i Aikupito iā Farao le tupu o Aikupito, o lē na foaʻi mai iā te ia se fale, o mea‘ai ma se fanua.
19 Ua fiafia foʻi Farao iā Atata, ma ua ia avatu foʻi iā Atata se avā, o le uso o lana avā o Tapanesa le masiofo.
20 Mulimuli ane, ona fanaua lea e le uso o Tapanesa o se atalii mo Atata, o lona igoa Kenupata, ua tausia aʻe foʻi o ia* e Tapanesa i le fale o Farao, ma sa iai pea Kenupata i le fale o Farao faatasi ma atalii o Farao.
21 Ua faalogo Atata mai i Aikupito ua taoto Tavita faatasi ma ona augātamā,+ ma ua oti foʻi le taʻitaʻiʻau o Ioapo.+ Ona fai atu lea o Atata iā Farao: “Tuu mai aʻu seʻi oʻu alu i loʻu nuu.”
22 Ae ua fai mai Farao: “O le ā ea se mea ua e lē maua a o ta faatasi, ua e manaʻo ai e te alu atu i lou nuu?” Ona faapea atu lea o ia: “E leai se mea, ae ia tuu mai aʻu ou te alu faamolemole.”
23 Ua faatūina mai foʻi e le Atua se isi tagata e tetee iā Solomona,+ o Resona le atalii o Eliata, o lē na sola ese mai i lona alii o Atatesa+ le tupu o Sopa.
24 Ina ua faatoʻilaloina*+ e Tavita tagata o Sopa, ona faapotopoto mai lea e Resona o tagata iā te ia, ma ua avea ai o ia ma taʻitaʻi o le ʻau e faoa mea. Ona latou ō atu lea i Tamaseko+ ma nonofo ai i inā, ma latou pule ai i Tamaseko.
25 Na avea foʻi o ia o sē e tetee iā Isaraelu i aso uma o Solomona, e faaopoopo i le mea leaga na faia e Atata; na matuā ʻinoʻino foʻi o ia iā Isaraelu a o pule o ia i Suria.
26 Sa iai foʻi Ierepoamo+ le atalii o Nepata, o le tagata Efaraima mai i Seleta, o se auauna a Solomona+ ma o Serua le igoa o lona tinā, o se fafine ua oti lana tane. Na ia fouvale foʻi i le tupu.+
27 O le mea lenei na fouvale ai o ia i le tupu: Na faia e Solomona le Mea Maupuʻepuʻe*+ ma sosoo le pā o le Aai a Tavita lona tamā.+
28 O Ierepoamo o se tagata malosi. Ina ua iloa e Solomona e galue malosi le tauleʻaleʻa, ona ia tofia lea o ia e fai ma ovasia+ e vaavaaia tagata mai i le aiga o Iosefa, na faatonuina e faia galuega mamafa.
29 O le taimi lenā na alu ese ai Ierepoamo mai i Ierusalema, ma na maua atu o ia i le auala e le perofeta o Akia+ le tagata Sailo. Na ofu Akia i se ofu fou, ma ua na o i laʻua foʻi i le fanua.
30 Ona tago lea o Akia i le ofu fou o loo ia ofu ai, ma saei i vaega e 12.
31 Ua faapea atu o ia iā Ierepoamo:
“Inā ave ia ma oe o vaega e sefulu, auā o le mea lenei ua fetalai mai ai Ieova le Atua o Isaraelu: ‘Ua ou sasaeese le malo mai i le lima o Solomona, ma ou te tuuina atu lava ituaiga e sefulu iā te oe.+
32 Ae e iai pea iā te ia le ituaiga e tasi,+ ona o Tavita laʻu auauna,+ ma Ierusalema le aai na ou filifilia mai i ituaiga uma o Isaraelu.+
33 O le a ou faia lenei mea ona ua latou tuua aʻu+ ae ifo atu iā Asaira le atua fafine o tagata Saitonu, ma Kimosa le atua o Moapi, ma Melekoma le atua o le fanauga a Amoni, ma ua latou lē savavali i oʻu ala i le faia o le mea tonu i oʻu luma, ma tausia aʻu tulafono ma aʻu faamasinoga, e pei ona sa faia e Tavita lona tamā.
34 Ae ou te lē aveesea uma le malo mai i lona lima, ma ou te faia o ia ma taʻitaʻi i aso uma o lona ola, ona o Tavita laʻu auauna na ou filifilia,+ auā na ia tausia aʻu poloaʻiga ma aʻu tulafono.
35 Ae ou te aveesea le tofi o le tupu mai i le lima o lona atalii, ma tuuina atu iā te oe ituaiga e sefulu.+
36 Ou te tuuina atu i lona atalii le ituaiga e tasi, ina ia iai pea le molī a Tavita laʻu auauna i oʻu luma i Ierusalema,+ o le aai na ou filifilia mo aʻu e tuu ai loʻu igoa.
37 Ou te aveina oe, ma e te pule i mea uma e manaʻo i ai lou loto, e avea foʻi oe ma tupu iā Isaraelu.
38 Afai foʻi e te usiusitaʻi i mea uma ua ou poloaʻi atu ai iā te oe, ma e savali i oʻu ala, ma faia le mea tonu i oʻu luma i le tausia o aʻu tulafono ma aʻu poloaʻiga, e pei ona faia e Tavita laʻu auauna,+ ou te faatasi lava iā te oe. Ou te faia foʻi se aiga tumau mo oe, e pei ona ou faia iā Tavita,+ ou te foaʻi atu foʻi iā te oe Isaraelu.
39 Ou te faamāina foʻi le fanau a Tavita ona o lenei mea,+ ae e lē faaauau ai.’”+
40 Ua lamalama Solomona e fasiotia Ierepoamo, ae ua sola atu Ierepoamo i Aikupito, iā Sesaka+ le tupu o Aikupito,+ ma ua iai pea o ia i Aikupito seʻia oo ina oti Solomona.
41 A o le olaga uma o Solomona, o mea uma na ia faia ma lona atamai, po ua lē o tusia ea i le tusi o le olaga o Solomona?+
42 O le umi* na pule ai Solomona i Ierusalema iā Isaraelu uma, e 40 tausaga.
43 Ona taoto lea o Solomona faatasi ma ona augātamā, ua tanu i le Aai a Tavita lona tamā; ma ua avea Reopoamo+ lona atalii ma tupu e sui iā te ia.
Faamatalaga Pito i Lalo
^ Po o le “E lē tatau ona outou fefaaipoipoaʻi ma i latou.”
^ Po o “ua matuā malosi le taaʻiga a ana avā iā te ia.”
^ Po o le “e leʻi tuutoina atu atoatoa.”
^ Pe atonu “ua faateʻa o ia mai i le susu.”
^ Epe., “fasiotia.”
^ Po o le “Milo.” O se upu Eperu o lona uiga o le “faatumu.”
^ Epe., “O aso.”
