O le Tusi Muamua o Tupu 12:1-33
12 Ua alu atu Reopoamo i Sekema, auā na ō mai tagata Isaraelu uma i Sekema+ e fai o ia ma tupu.+
2 Ina ua faalogo i ai Ierepoamo le atalii o Nepata i lea mea (o le taimi lea o loo iai o ia i Aikupito, auā na sola ese ona o le tupu o Solomona, ma na nofo ai i Aikupito),+
3 ona latou aami lea o ia. Mulimuli ane, ona ō mai lea o Ierepoamo ma le faapotopotoga uma o Isaraelu, ua fai mai iā Reopoamo e faapea:
4 “Na faamamafa e lou tamā a matou avega.+ Ae afai e te faafaigofie le galuega faigatā a lou tamā ma faamāmā le avega mamafa na ia faaee mai iā i matou, ona matou auauna atu lea iā te oe.”
5 Ona ia fai atu lea iā i latou: “Inā ō ia, ma ia outou toe foʻi mai iā te aʻu pe a mavae aso e tolu.” Ona ō ai lea o le nuu.+
6 Ona talatalanoa lea o le tupu o Reopoamo faatasi ma toeaina, o ē na avea ma faufautua iā Solomona lona tamā a o ola o ia, ua faapea atu: “O le ā sa outou fautuaga e tali atu ai i lenei nuu?”
7 Ona latou fai mai lea iā te ia: “O le aso nei, afai e fai oe ma auauna i lenei nuu, ma talia la latou talosaga, ma e tali atu foʻi iā i latou i se auala lelei, ona avea ai pea lea o i latou ma au auauna.”
8 Peitaʻi, ua ia teena le fautuaga a toeaina na avatu iā te ia, ae ua ia talatalanoa ma tauleleʻa na ola aʻe faatasi ma ia, ma ua avea nei ma ana faufautua.+
9 Ua ia fai atu iā i latou: “O le ā sa outou fautuaga e tatou te tali atu ai i lenei nuu, o ē na faapea mai iā te aʻu, ‘Ia faamāmā le avega na faaee mai e lou tamā iā i matou’?”
10 Ona fai mai lea o tauleleʻa na ola aʻe faatasi ma ia: “Ia faapea ona e fai atu i lenei nuu o ē na fai mai iā te oe, ‘Na faamamafa e lou tamā a matou avega, ae ia e faamāmāina mo i matou’; ia faapea ona e fai atu iā i latou, ‘O le a sili atu ona mamafa le avega ou te tuu atu iā te outou nai lo o loʻu tamā.*
11 Na faaee atu e loʻu tamā iā te outou se avega mamafa, ae o le a ou faaopoopo la outou avega. Na aʻoaʻi outou e loʻu tamā i sasa, ae o le a ou aʻoaʻia outou i sasa matuitui.’”
12 Ona ō mai lea o Ierepoamo ma le nuu uma iā Reopoamo i le aso lona tolu, e pei ona fai mai ai le tupu, e faapea: “Ia outou toe foʻi mai iā te aʻu i le aso lona tolu.”+
13 Ona tali atu lea o le tupu i le nuu ma le sauā, ma ua ia teena le fautuaga a toeaina na avatu iā te ia.
14 Ua ia tautala atu iā i latou e tusa ai ma fautuaga a tauleleʻa, e faapea: “Na faamamafa e loʻu tamā a outou avega, ae o le a ou faaopoopo la outou avega. Na aʻoaʻi outou e loʻu tamā i sasa, ae o le a ou aʻoaʻia outou i sasa matuitui.”
15 E leʻi faalogo le tupu i le nuu, auā o lenei mea e mai iā Ieova, ina ia taunuu ai le afioga a Ieova+ na fetalai mai ai e ala iā Akia+ le tagata Sailo, e fai atu iā Ierepoamo le atalii o Nepata.
16 Ina ua iloa e Isaraelu uma ua musu le tupu e faalogo iā i latou, ona tali atu lea o le nuu i le tupu, ua faapea atu: “Pe e iai ea so matou tofi mai iā Tavita? E leai so matou tofi mai i le atalii o Iese. Isaraelu e, inā foʻi atu ia i ou atua. Tavita e, faitalia oe ma lou aiga!” Ona ō ai lea o Isaraelu i o latou fale.*+
17 Ae ua pule pea Reopoamo i le fanauga a Isaraelu, o ē o loo nonofo i aai o Iuta.+
18 Ona auina atu lea e le tupu o Reopoamo o Aturamo,+ o lē na vaavaaia tagata na faatonuina e faia galuega mamafa, ae ua fetogia o ia i maa e Isaraelu uma ma oti ai. Ona alu lea o le tupu o Reopoamo i lana kariota, ua sola atu i Ierusalema.+
19 Ua faaauau pea ona fouvale+ tagata Isaraelu i le aiga o Tavita e oo mai i le aso nei.
20 Ina ua faalogo Isaraelu uma ua toe foʻi mai Ierepoamo, ona latou aami lea o ia e sau i le mea o loo latou faapotopoto ai, ma fai o ia ma tupu iā Isaraelu uma.+ E leai foʻi se tasi na mulimuli i le aiga o Tavita, e na o le ituaiga o Iuta.+
21 Ina ua taunuu Reopoamo i Ierusalema, ona ia faapotopoto loa lea o le aiga uma o Iuta ma le ituaiga o Peniamina, e toʻa 180,000 tagata totoa ua toleniina,* ina ia tau ma le aiga o Isaraelu, ina ia toe faafoʻi mai le tofi o le tupu iā Reopoamo le atalii o Solomona.+
22 Ona tulei mai lea o le afioga a le Atua moni iā Semaia+ le tagata o le Atua moni, ua faapea mai:
23 “Ia fai atu iā Reopoamo le atalii o Solomona le tupu o Iuta, ma le aiga uma o Iuta ma Peniamina, faapea le nuu uma,
24 ‘O le mea lenei na fetalai mai ai Ieova: “Aua tou te ō aʻe e tau ma o outou uso, o le fanauga a Isaraelu. Ia taʻitasi ma foʻi atu i lona fale, auā e mai iā te aʻu lenei mea.”’”+ Ona latou usiusitaʻi ai lea i le afioga a Ieova, ua toe foʻi atu i o latou fale e tusa ma le afioga a Ieova.
25 Ona fausia lea e Ierepoamo o Sekema+ i le vaega maugā o Efaraima ma nofo ai. Ua alu atu foʻi o ia mai i inā ma fausia Penueli.+
26 Ua faapea ifo Ierepoamo i lona loto: “A nei e toe foʻi atu le malo i le aiga o Tavita.+
27 Afai e faaauau ona ō aʻe lenei nuu e fai taulaga i le fale o Ieova i Ierusalema,+ o le a liliu loto o lenei nuu e toe foʻi atu i lo latou alii o Reopoamo le tupu o Iuta. Ona latou fasiotia lea o aʻu, ae toe foʻi atu iā Reopoamo le tupu o Iuta.”
28 Ina ua uma ona talatalanoa le tupu ma ana faufautua, ona faia lea e le tupu o ni tamaʻi povi poʻa auro+ se lua, ma ua faapea atu i le nuu: “E faigatā tele mo outou ona ō aʻe i Ierusalema. Isaraelu e, o lo outou Atua lenei na aveina aʻe outou mai i le nuu o Aikupito.”+
29 Ona ia tuu lea o le tasi i Peteli,+ ae tuu le isi i Tanu.+
30 Na avea lenei mea ma agasala,+ ma ua ō mamao lava le nuu e oo atu lava i Tanu, ina ia tapuaʻi ai i le tamaʻi povi o loo iai i inā.
31 Ua ia faia foʻi fale tapuaʻi i mea maualuluga, ma tofia ositaulaga mai i tagata lautele o ē e lē o ni sa Levī.+
32 Ua faia e Ierepoamo le tausamiga i le masina lona valu i le aso lona 15 o le masina, e pei o le tausamiga sa faia i Iuta.+ Ua ia faia i luga o le fata faitaulaga na ia faia i Peteli,+ ni taulaga e ofoina atu i tamaʻi povi poʻa auro na ia faia, ma ua ia tofia foʻi ositaulaga mo mea maualuluga na ia faia i Peteli.
33 Ua ia faia foʻi taulaga i luga o le fata faitaulaga na ia faia i Peteli, i le aso 15 o le masina lona valu, i le masina na ia filifilia; na ia faia foʻi se tausamiga mo le fanauga a Isaraelu, ma ua alu aʻe ma faia taulaga i luga o le fata faitaulaga e faamū ai taulaga.
Faamatalaga Pito i Lalo
^ Epe., “O le a sili atu ona mafiafia loʻu limatamatama, nai lo o suilapalapa o loʻu tamā.”
^ Epe., “faleʻie.”
^ Epe., “filifilia.”
