O le Tusi Muamua o Tupu 13:1-34
13 Ua sau i Peteli le tagata o le Atua+ mai i Iuta ona o le afioga a Ieova, a o tū Ierepoamo i tafatafa o le fata faitaulaga+ e faamū ai le taulaga.
2 Ona ia valaau atu lea i le fata faitaulaga ona o le afioga a Ieova, ua faapea atu: “Le fata faitaulaga e, le fata faitaulaga e, o le mea lenei ua fetalai mai ai Ieova: ‘Faauta! O le a fanau mai se tama tama e igoa iā Iosia+ i le aiga o Tavita! O le a ia faia taulaga i ou luga i ositaulaga o mea maualuluga, o ē e faamūina taulaga i ou luga, e na te susunuina foʻi i ou luga o ponaivi o tagata.’”+
3 Ua faia e ia se faailoga* i lenā aso, ua faapea atu: “O le faailoga* lenei na fetalai i ai Ieova: Faauta! E vaeluaina le fata faitaulaga, ona masaa mai ai lea i fafo o lefulefu* o loo i ona luga.”
4 Ina ua faalogo atu le tupu i le upu a le tagata o le Atua moni na valaau atu i le fata faitaulaga i Peteli, ona aapa atu lea o le lima o Ierepoamo mai i le fata faitaulaga, ma faapea atu: “Ia outou puʻe iā te ia!”+ Ona gase ai lea o lona lima na aapa atu iā te ia, ma ua lē mafai ona ia toe faafoʻi ane iā te ia.+
5 Ona vaeluaina lea o le fata faitaulaga, ma ua masaa mai i fafo lefulefu mai i le fata faitaulaga, e tusa ma le faailoga* na faia e le tagata o le Atua moni e ala i le afioga a Ieova.
6 Ua faapea atu le tupu i le tagata o le Atua moni: “Faamolemole, ia e ʻaiʻoi atu iā Ieova lou Atua mo lona finagalo malie, ma tatalo mo aʻu ina ia toe lelei loʻu lima.”+ Ona ʻaiʻoi atu lea o le tagata o le Atua moni iā Ieova mo lona finagalo malie, ona toe lelei ai lea o le lima o le tupu e pei ona iai muamua.
7 Ona fai atu lea o le tupu i le tagata o le Atua moni: “Sau ta ō i loʻu fale seʻi fai sina mea‘ai, ma seʻi oʻu avatu se meaalofa iā te oe.”
8 Ae ua fai mai le tagata o le Atua moni i le tupu: “E tusa lava pe e te foaʻiina mai iā te aʻu le ʻafa o lou fale, e ta te lē ō lava faatasi ma oe e ʻai se meaʻai pe inu se vai i lenei nofoaga.
9 Auā o le mea lenei na poloa‘iina ai a‘u e le afioga a Ieova: ‘Aua neʻi e ʻai i se meaʻai pe inu i se vai, aua foʻi e te toe foʻi mai i le auala na e alu atu ai.’”
10 Ona ia alu atu lea i le tasi auala, ma e leʻi toe foʻi mai o ia i le auala na ia alu atu ai i Peteli.
11 Sa iai se tasi perofeta ua toeaina sa nofo i Peteli, ma ua ō atu ona atalii ma faamatala atu iā te ia mea uma na faia e le tagata o le Atua moni i lenā aso i Peteli, ma upu na ia tautala atu ai i le tupu. Ina ua uma ona latou faamatala atu ia mea i lo latou tamā,
12 ona fai mai lea o lo latou tamā iā i latou: “O fea le auala na alu atu ai o ia?” Ona faasino atu lea e ona atalii iā te ia o le auala na alu atu ai le tagata o le Atua moni mai i Iuta.
13 Ua fai mai o ia i ona atalii: “Ia faanofoa le asini.” Ua latou faanofoa le asini, ma ua tiʻetiʻe ai o ia ma alu.
14 Ua ia mulimuli atu i le tagata o le Atua moni ma maua atu o ia o loo nofo i lalo o le laau telē. Ona ia fai atu lea iā te ia: “Po o oe ea o le tagata o le Atua moni o lē na sau mai i Iuta?”+ Ua tali mai o ia: “O aʻu lea.”
15 Ona fai atu lea o ia iā te ia: “Sau ta ō i loʻu fale seʻi ʻai se meaʻai.”
16 Ae ua fai mai o ia: “E lē mafai ona ta toe foʻi pe talia lau valaaulia, e lē mafai foʻi ona ou ʻai i se meaʻai pe inu i se vai i lenei nofoaga.
17 Auā na fetalai mai iā te aʻu le afioga a Ieova, ‘Aua neʻi e ʻai i se meaʻai pe inu i se vai i inā. Aua foʻi e te toe foʻi mai i le auala na e alu atu ai.’”
18 Ona fai atu lea o ia iā te ia: “O aʻu foʻi o le isi perofeta e pei o oe, ma na fai mai le agelu iā te aʻu e ala i le afioga a Ieova, ‘Inā e toe faafoʻi mai ia o ia i lou fale, ina ia ʻai se meaʻai ma inu se vai.’” (Na ia ʻolegia o ia.)
19 Ona la toe foʻi lea ma ia i lona fale, ua ʻai ai o ia ma inu.
20 A o nonofo i laʻua i le laulau, ona oo mai ai lea o le afioga a Ieova i le perofeta toeaina,
21 ma ua ia faailoa atu i le tagata o le Atua moni lea na sau mai i Iuta, e faapea: “O le mea lenei ua fetalai mai ai Ieova: ‘Talu ai ua e fouvale i le faatonuga a Ieova, ma ua e lē tausi i le poloaʻiga na poloaʻi mai ai Ieova lou Atua iā te oe,
22 ae ua e toe foʻi ina ia ʻai se meaʻai ma inu se vai i le nofoaga na ia fetalai mai ai iā te oe, “Aua e te ʻai i se meaʻai pe inu i se vai,” o le mea lea o le a lē tuuina ai lou tino oti i le tuugamau o ou augātamā.’”+
23 Ina ua uma ona ʻai ma inu le tagata o le Atua moni, ona faanofoa lea e le perofeta toeaina o le asini, mo le perofeta na ia toe faafoʻi maia.
24 Ona alu lea o ia i lona ala, ae ua maua atu o ia e se leona i le auala, ua osofaʻia o ia ma oti ai.+ Ua taatia foʻi lona tino oti i le auala, ma ua tū le asini i ona tafatafa, ua tū foʻi le leona i tafatafa o le tino oti.
25 Na iai tagata na ui ane ai i inā, ua latou vaaia le tino oti ua taatia i le auala, ma le leona o loo tū i tafatafa o le tino oti. Ua latou ō atu i le aai lea e nofo ai le perofeta ua toeaina, ma faamatala atu i ai lea mea.
26 Ina ua faalogo i ai le perofeta toeaina, ona ia faapea ane lea: “O le tagata o le Atua moni o lē na fouvale i le faatonuga a Ieova;+ o lea ua tuuina atu ai e Ieova o ia i le leona, ia osofaʻia o ia ma oti ai, e tusa ai ma le afioga a Ieova na ia fetalai mai ai iā te ia.”+
27 Ona fai atu lea o ia i ona atalii: “Ia faanofoa le asini.” Ona latou faanofoa lea o le asini.
28 Ua alu o ia i lona ala ma maua atu le tino oti ua taatia i le auala, faatasi ma le asini ma le leona o loo tutū ai i tafatafa o le tino oti. E leʻi ʻaina e le leona le tino oti, pe osofa‘ia foʻi le asini.
29 Ua sii a‘e e le perofeta le tino oti o le tagata o le Atua moni, ma tuu i luga o le asini, ma aumai o ia i lona aai ina ia tagitu‘i ma tanu iā te ia.
30 Ua ia tuu i lona tuugamau le tino oti, ma ua latou taufaitagitu‘i pea ona o ia: “Loʻu uso e, taʻi leaga!”
31 Ina ua uma ona ia tanu iā te ia, ona ia fai atu lea i ona atalii: “Pe a ou oti, ia outou tanu aʻu i le mea o loo tanu ai le tagata o le Atua moni. Ia tuu foʻi oʻu ivi i tafatafa o ona ivi.+
32 E mautinoa e taunuu le upu mai i le afioga a Ieova, lea na ia valaau atu ai i le fata faitaulaga o loo i Peteli, ma fale tapua‘i uma o loo i mea maualuluga+ i aai o Samaria.”+
33 Ua mavae lenei mea, ae e leʻi liliuese ai Ierepoamo mai i lona ala leaga, ae ua alu atu o ia ma toe tofia ni ositaulaga mo mea maualuluga, mai i tagata lautele.+ Ua ia tofia fo‘i* so o se tasi na mana‘o e avea ma ositaulaga, ina ia fai ma ositaulaga, ma ua ia faapea ane: “Ia avea o ia o se tasi o ositaulaga mo mea maualuluga.”+
34 O lenei agasala a le aiga o Ierepoamo,+ na i‘u ai ina fano ma faaumatia ai i latou mai i le fogāeleele.+
Faamatalaga Pito i Lalo
^ Po o le “vavega.”
^ Po o le “vavega.”
^ Po o “lefulefu ua gaʻoa,” e faasino atu i lefulefu ua gaʻoa mai i taulaga.
^ Po o le “vavega.”
^ Epe., “faatumu lima o.”
