O le Tusi Muamua o Tupu 18:1-46
18 Ua mavae aso e tele, ona oo mai lea o le afioga a Ieova iā Elia i le tausaga lona tolu,+ ua faapea mai: “Inā alu ia ma faailoa atu oe iā Aapo, ma o le a ou faatotō ifo le timu i le fogāeleele.”+
2 Ona alu lea o Elia e faailoa atu o ia iā Aapo, a o matuā faateteleina+ le oge i Samaria.
3 O le taimi lea, ua valaau atu ai Aapo iā Opetaia, o lē e vaavaaia le maota o le tupu. (Sa matuā mataʻu foʻi Opetaia iā Ieova,
4 ma ina ua fasiotia e Iesepela+ perofeta a Ieova, ona ave lea e Opetaia o perofeta e toʻa 100 ma faalalafi i latou e taʻitoʻalima sefulu i le ana, ma avatu iā i latou meaʻai ma vai.)
5 Ona fai atu lea o Aapo iā Opetaia: “Inā alu ia i le nuu i vaipuna uma ma vanu* uma. Atonu tatou te maua ai ni mutia ina ia faasaoina ai ola o solofanua ma asini,* ina ia lē mamate uma ai a tatou manu.”
6 Ona la vaeluaina lea o le nuu e la te feoaʻi ai. Ua alu Aapo na o ia i le tasi ala, ae ua alu Opetaia na o ia i le isi ala.
7 A o alu Opetaia i le ala, ua sau Elia e faafetaiaʻi o ia. Ina ua ia iloa o Elia, ona faapaʻū faō lea o ia ua faapea mai: “Po o oe ea lea o loʻu alii o Elia?”+
8 Ona ia fai atu lea iā te ia: “O aʻu lenei. Inā alu ia ma fai atu i lou alii: ‘O loo i inei Elia.’”
9 Ae ua ia fai mai: “O le ā ea saʻu agasala ua fai, e te tuuina ai lau auauna iā Aapo ina ia fasiotia ai aʻu?
10 Ou te tautō iā Ieova le Atua soifua, e leʻi iai se nuu po o se malo e leʻi aauina atu i ai e loʻu alii nisi e saʻili iā te oe. Ina ua latou fai mai, ‘E lē o iai o ia i inei,’ ona ia faatautō lea o le malo ma le nuu, ina ia faapea mai ua latou lē maua oe.+
11 A o lenei ua e fai mai, ‘Inā alu ia ma fai atu i lou alii: “O loo i inei Elia.”’
12 Pe a ou alu ese mai iā te oe, ona ave lea o oe e le agaga o Ieova+ i se mea ou te lē iloaina, ma pe a ou taʻuina atu iā Aapo ae na te lē maua oe, ona ia fasiotia lava lea o aʻu. Peitaʻi, na mataʻu lau auauna iā Ieova mai lava i lona talavou.
13 Pe e leʻi taʻuina atu ea iā te oe loʻu alii, le mea na ou faia ina ua fasiotia e Iesepela perofeta a Ieova, i loʻu faalalafi o perofeta e toʻa 100 a Ieova, e taʻitoʻalima sefulu i le ana, ma avatu pea meaʻai ma vai iā i latou?+
14 A o lenei ua e fai mai, ‘Inā alu ia ma fai atu i lou alii: “O loo i inei Elia.”’ E na te fasiotia lava aʻu.”
15 Ae ua faapea atu Elia: “Ou te tautō iā Ieova o ʻau le Atua soifua o lē o loo oʻu auauna i ai,* o le asō ou te faailoa atu ai aʻu iā te ia.”
16 Ona alu atu lea o Opetaia e faafetaiaʻi iā Aapo ma taʻu atu iā te ia, ona sau ai lea o Aapo e faafetaiaʻi iā Elia.
17 Ina ua iloa atu Elia e Aapo, ona fai atu lea o Aapo iā te ia: “Po o oe ea lenā, o lē e aumaia le tele o faafitauli iā Isaraelu?”
18 Ae ua ia faapea mai: “Ou te leʻi aumaia faafitauli iā Isaraelu, a o oe ma le aiga o lou tamā na aumaia faafitauli, auā ua outou tuua poloaʻiga a Ieova, ae mulimuli atu pea iā Paala.+
19 O lenei, ia faapotopoto mai Isaraelu uma iā te aʻu i le mauga o Karamelu,+ faapea le to‘a 450 o perofeta a Paala, ma perofeta e toʻa 400 e tapuaʻi i le pou paia,*+ o ē o loo aai i le laulau a Iesepela.”
20 Ona auina atu lea e Aapo o le fe‘au i tagata uma o Isaraelu, ma faapotopoto faatasi perofeta i le mauga o Karamelu.
21 Ona faalatalata atu lea o Elia i le nuu uma, ua faapea atu: “O le ā ea le umi e tou te faalētonu* ai i manatu eseese e lua?+ Afai o Ieova o le Atua moni, ia mulimuli atu iā te ia;+ ae afai o Paala, ia mulimuli atu iā te ia.” Ae e leʻi fai mai e le nuu se upu e tali mai ai iā te ia.
22 Ona toe faapea atu lea o Elia i le nuu: “E na o aʻu lava le perofeta a Ieova o loo totoe,+ a o perofeta a Paala, e toʻa 450 i latou.
23 Ia aumai iā i matou ni tamaʻi povi poʻa se lua, ma ia filifili e perofeta a Paala se tamaʻi povi poʻa se tasi, ma ia latou penaina, ma faaee i luga o fafie ae aua neʻi avane i ai se afi. A o aʻu, ou te saunia le isi tamaʻi povi poʻa, ma ou faaee i luga o fafie, ou te lē avane i ai se afi.
24 Ia latou valaau atu i le igoa o lo latou atua,+ a o aʻu, ou te valaau atu i le suafa o Ieova. O le Atua e tali mai i le afi, o le Atua moni lea.”+ Ona tali mai lea o le nuu uma: “Ua lelei lenā mea.”
25 Ona fai atu lea o Elia i perofeta a Paala: “Ia outou filifili se tamaʻi povi poʻa se tasi ma sauni muamua, auā e toʻatele outou. Ona outou valaau lea i le igoa o lo outou atua, ae aua neʻi outou avane i ai se afi.”
26 Ona latou ave lea o le tamaʻi povi poʻa na tuuina atu iā i latou, ua latou saunia, ma valaau atu pea i le igoa o Paala, e mai i le taeao e oo i le aoauli, e faapea: “Paala e, ia e faafofoga mai iā i matou!” Ae ua leai se leo, ua leai foʻi se tasi e tali mai.+ Ua latou taufai osooso ma sisiva faataamilo i le fata faitaulaga na latou faia.
27 Ua oo i le aoauli, ona tauemu lea o Elia iā i latou, ua faapea atu: “Ia outou valaau leotetele atu ia, auā o ia o se atua;+ atonu o loo manatunatu i se mea po o alu fo‘i i le faleese.* Po o moe foʻi, ma e ao ona fafagu iā te ia!”
28 Ua latou valaau leotetele, ma selei i latou i naifi ma tatui i tao e tusa ma la latou tū masani, ua oo lava ina tafe mai le toto i o latou tino.
29 Ua mavae le tutonu o le lā, ma ua faaauau ona latou gaoioi e pei o ni perofeta, seʻia oo i le afiafi i le taimi e ofo atu ai taulaga i meaʻai, ae ua leai se leo, e leai foʻi se tasi na tali mai, ma e leai se tasi na faalogo mai.+
30 Mulimuli ane, ua fai atu Elia i le nuu uma: “Inā faalatalata mai ia iā te aʻu.” Ona faalatalata atu lea o le nuu uma iā te ia. Ona ia toe faia lea o le fata faitaulaga a Ieova lea na soloia i lalo.+
31 Ua ave e Elia maa e 12 e tusa ma le aofaʻi o ituaiga o le fanauga a Iakopo, o lē na oo mai ai le afioga a Ieova, e faapea: “O le a faaigoa oe iā Isaraelu.”+
32 Ua ia faia i maa se fata faitaulaga+ i le suafa o Ieova. Ona ia eli lea o se ʻautu e faataamilo i le fata faitaulaga, pe tusa ma le telē o se fanua ua lūlūina i sea* e lua o fatu.
33 Ina ua uma, ona ia faatulaga lea o fafie, ma penapena le tamaʻi povi poʻa ma tuu i luga o fafie.+ Ona ia faapea atu lea: “Inā faatutumu mai ia ni faguvai lapopoʻa se fā, ma sasaa i luga o le taulaga mū, ma luga o fafie.”
34 Ua ia toe fai atu: “Ia toe fai.” Ona latou toe faia ai lea. Ae ua ia toe fai atu: “Ia fai faatolu.” Ona latou faia faatolu lea.
35 Ua tafe atu le vai ua soo ai le fata faitaulaga, ua ia faatumu foʻi le ʻautu i le vai.
36 Ua oo i le afiafi i le taimi e ofo atu ai le taulaga i meaʻai,+ ona faalatalata atu lea o le perofeta o Elia i le fata faitaulaga, ua faapea atu: “Ieova e, le Atua o Aperaamo,+ o Isaako,+ ma Isaraelu, ia faailoa atu i le asō o oe o le Atua i Isaraelu, o aʻu foʻi o lau auauna, ma o lau afioga ua ou faia ai nei mea uma.+
37 Ieova e, ia e tali mai iā te aʻu! Ia e tali mai iā te aʻu, ina ia iloa ai e lenei nuu o oe o Ieova o le Atua moni, o oe foʻi e te toe faaliliuina mai o latou loto.”+
38 Ona paʻū ifo lea o le afi mai iā Ieova ma ua faamūina ai le taulaga mū,+ o fafie, o maa, o le efuefu, ma ua mitiia ai foʻi le vai sa i le ʻautu.+
39 Ina ua iloa atu e le nuu uma lenei mea, ona latou faapaʻuʻū faō loa lea, ma faapea ane: “O Ieova o le Atua moni! O Ieova o le Atua moni!”
40 Ua fai atu Elia iā i latou: “Ia pupu‘e i perofeta a Paala! Aua lava neʻi iai se tasi o i latou e sola!” Ona latou pupu‘e lea o i latou, ma ua ave ifo i latou e Elia i le vaitafe* o Kisona,+ ma fasiotia ai i inā.+
41 Ua fai atu Elia iā Aapo: “Inā alu aʻe ia, ia e ʻai ma inu; auā ua gogolo mai timuga tetele.”+
42 Ua alu aʻe Aapo e ʻai ma inu, ae ua alu Elia i le tumutumu o le mauga o Karamelu ma punou i le eleele, ua tuu foʻi ona foliga i le vā o ona tulivae.+
43 Ona ia fai atu lea i lana auauna: “Inā alu aʻe ia faamolemole. Ia vaavaai agaʻi i le sami.” Ona alu aʻe lea o ia ma vaai, ona ia fai mai lea: “E leai lava se mea.” E faafitu ona fai atu Elia, “Inā toe alu ia.”
44 Ina ua foʻi faafitu o ia, ona ia fai mai lea: “Faauta! O loo alu aʻe mai i le sami se ao itiiti e pei o le alofilima o se tagata.” Ona ia fai atu lea: “Ia e alu ma fai atu iā Aapo, ‘Inā alu ia i lau kariota! Ia e alu ifo, ina neʻi taofia oe i timuga tetele!’”
45 Ua oo ina pogisa le lagi i ao, ua agi mai le matagi, ma ua maligi ifo timuga tetele;+ a o loo tiʻetiʻe pea Aapo i lana kariota, ma ua alu atu i lona ala i Isereelu.+
46 Ae ua oo mai le aao o Ieova iā Elia, ona ia fusi lea o lona ofu i lona sulugātiti, ma tamoʻe atu e muamua i luma o Aapo, e oo atu lava i Isereelu.
Faamatalaga Pito i Lalo
^ Po o “ālia.”
^ O le upu Eperu e faasino atu i le tama a le asini poʻa ma le solofanua fafine.
^ Epe., “o loo oʻu tū ai i ona luma.”
^ Tagaʻi i le Uiga o Upu.
^ Epe., “setusetu.”
^ Pe atonu “alu o ia i se malaga.”
^ Po o le “ālia.”
