O le Tusi Muamua o Tupu 20:1-43
20 Ua faapotopoto faatasi e Peniata+ le tupu o Suria+ ana ʻautau uma, atoa ma tupu e toʻa 32 ma a latou solofanua ma kariota. Ua alu aʻe o ia e osofaʻia+ Samaria+ ma tau ma i latou.
2 Ona ia aauina mai lea o avefeʻau i le aai, iā Aapo+ le tupu o Isaraelu ma faapea mai iā te ia: “O le mea lenei ua fai mai ai Peniata,
3 ‘O au siliva ma au auro o aʻu mea ia, o au avā ma ou atalii e sili ona aulelei, e fai mo aʻu.’”
4 Ona tali atu lea o le tupu o Isaraelu e faapea: “Loʻu alii e, le tupu, o aʻu ma mea uma ua iā te aʻu e fai ia mo oe, e pei ona e fetalai mai ai.”+
5 Mulimuli ane, ua toe foʻi mai avefeʻau ma faapea mai: “Ua faapea ona fai mai o Peniata, ‘Na ou auina atu se feʻau iā te oe e faapea: “Ia e aumai iā te aʻu o au siliva, o au auro, o au avā, ma ou atalii.”
6 Ae o se taimi faapenei a taeao ou te aauina atu ai iā te oe aʻu auauna, latou te suʻe lelei i lou fale ma fale o au auauna; o mea uma foʻi e te fiafia i ai e latou te fetagofi i ai, ma latou aveina.’”
7 Ona aami lea e le tupu o Isaraelu o toeaina uma o le nuu, ma faapea atu: “Faamolemole, seʻi outou mātau ma iloa lelei o loo saʻili lenei tagata ia fai se mea leaga iā i tatou; auā ua manaʻo mai o ia i aʻu avā, o oʻu atalii, o aʻu siliva, ma aʻu auro, ma ou te leʻi teena lona manaʻo.”
8 Ona fai mai lea o toeaina uma ma le nuu uma iā te ia: “Aua e te usitaʻi i ai, aua foʻi e te taliaina lona manaʻo.”
9 Ua fai atu o ia i avefeʻau a Peniata: “Ia fai atu i loʻu alii le tupu, ‘O mea uma na e fai mai ai muamua i lau auauna, ou te faia lava; a o le mea lenei, e lē mafai ona ou faia.’” Ona toe ō lea o avefeʻau ma avatu le tala iā te ia.
10 Ona aauina mai lea o nisi e Peniata, ua faapea mai: “Ia matuā faasala aʻu e atua,* pe afai e lava le efuefu o Samaria ina ia tofu le nuu uma o loo mulimuli mai iā te aʻu ma se luuga o efuefu!”
11 Ua toe tali atu le tupu o Isaraelu: “Ia outou fai atu iā te ia, ‘Aua neʻi mitamita iā te ia lava lē o fusi le ofutau, e pei o lē e na te tatalaina le ofutau.’”+
12 Ina ua faalogo o ia i na upu, a o inu o ia ma tupu i o latou faleʻie,* ona ia fai atu loa lea i ana auauna: “Ia sauni e tau!” Ona latou sauni lea e siitaua i le aai.
13 Ae ua faalatalata mai se perofeta iā Aapo+ le tupu o Isaraelu, ma faapea mai: “O le mea lenei ua fetalai mai ai Ieova, ‘Po ua e vaai atu ea i lenei motu o tagata e toʻatele? Ou te tuuina atu i latou i lou lima i le asō, ona e iloa ai lea o aʻu lava o Ieova.’”+
14 Ona fai atu lea o Aapo: “O ai ea e faia?” Ae ua fai mai o ia: “O le mea lenei ua fetalai mai ai Ieova, ‘E faia e auauna a alii sili o itumalo.’” Ua faapea atu Aapo: “O ai e na te amataina le taua?” Ona ia fai mai lea: “O oe!”
15 Ua ia faitauina auauna a alii sili o itumalo, ma e toʻa 232 i latou; ona ia faitauina lea o le ʻautau a Isaraelu, e toʻa 7,000.
16 Ua latou ō atu i le aoauli a o inu Peniata i le faleʻie* ma ua oo ina onā, faatasi ma tupu e toʻa 32 o loo fesoasoani iā te ia.
17 Ina ua ō atu muamua auauna a alii sili o itumalo, ona aauina atu lea e Peniata o ni avefeʻau e vaai po o le ā le mea ua tupu. Ua latou ō mai ma taʻu mai iā te ia: “Ua ō mai tagata mai i Samaria.”
18 Ua fai atu o ia: “Pe afai ua latou ō mai ma le filemu, ia outou pupu‘e ola i latou; pe afai ua latou ō mai e tau, ia outou pupu‘e ola pea i latou.”
19 Ae ina ua ō mai i latou nei mai i le aai, o auauna a alii sili o itumalo, ma le ʻautau o loo mulimuli mai iā i latou,
20 ona taʻitasi lea ma fasioti i lona fili. Ona sosola lea o Suria,+ ma ua tuliloa i latou e Isaraelu, ae ua sola Peniata le tupu o Suria i le solofanua, faatasi ma nisi o tagata tiʻetiʻe solofanua.
21 Ae ua alu atu le tupu o Isaraelu ma faaumatia solofanua ma kariota, ma ua ia matuā faatoʻilaloina* tagata Suria.
22 Mulimuli ane, ua sau le perofeta+ i le tupu o Isaraelu ma faapea mai iā te ia: “Inā alu ia, ia e faamalosi oe lava, ma mafaufau po o le ā le mea e te faia,+ auā o le a sau le tupu o Suria e lua te tau i le amataga o le tausaga e sosoo ai.”*+
23 Ua fai atu auauna a le tupu o Suria iā te ia: “O lo latou Atua, o le Atua o mauga. O le mea lenā ua latou faatoʻilaloina ai i tatou. Ae pe afai e tatou te tau ma i latou i le mea laugatasi, o le a tatou faatoʻilaloina i latou.
24 Ia faia foʻi lenei mea: Ia aveese tupu uma+ mai i o latou tulaga, ma ia tofia kovana e sui iā i latou.
25 Ona e aoaoina mai* lea o se ʻautau e tutusa ma lau ʻautau na faaumatia, o le solofanua e sui ai le solofanua, ma le kariota e sui ai le kariota; seʻi o tatou tau ma i latou i le mea laugatasi, ma e mautinoa o le a tatou faatoʻilaloina i latou.” Ua faalogo foʻi o ia i la latou fautuaga ma faia faapea.
26 Ina ua oo i le amataga o le tausaga,* ona faapotopoto lea e Peniata o Suria, ma ō aʻe i Afeka+ e tau ma Isaraelu.
27 Ae ua faapotopoto foʻi le fanauga a Isaraelu ma ua sauni meaʻai, ona latou ō lea e faafetaiaʻi i latou. Ina ua tolauapi le fanauga a Isaraelu i luma o Suria, na pei i latou o lafu ʻoti itiiti e lua, ae ua tumu le laueleele iā Suria.+
28 Ona faalatalata mai lea o le tagata o le Atua moni i le tupu o Isaraelu, ma faapea mai: “O le mea lenei na fetalai mai ai Ieova, ‘Talu ai ua faapea mai Suria: “O Ieova o le Atua o mauga, ae lē o se Atua o fanua laugatasi,” o le mea lea ou te tuuina atu ai lenei motu o tagata e toʻatele i lou lima,+ ma outou iloa ai o aʻu lava o Ieova.’”+
29 Na latou tolauapi faafesagaʻi mo aso e fitu, ma na amata le taua i le aso lona fitu. Na fasiotia e le fanauga a Isaraelu i le aso e tasi o ʻautau e savavali a Suria e toʻa 100,000.
30 A o i latou ua totoe, ua latou sosola i Afeka+ i le aai, ae ua solo i lalo le pā i luga o tagata e toʻa 27,000 na totoe. Ua sola foʻi Peniata i le aai ma lafi ai i se potu pito i totonu.
31 Ona fai atu lea o ana auauna iā te ia: “Vaai, ua matou faalogo e ese le alolofa mutimutivale o* tupu o le aiga o Isaraelu. Faamolemole, seʻi fusi o matou sulugātiti i ʻie talatala ma tuu maea i luga o o matou ulu, ma ō atu i le tupu o Isaraelu. Atonu o le a ia faasaoina lou ola.”+
32 Ona fusi lea o o latou sulugātiti i ʻie talatala ma tuu maea i luga o o latou ulu, ma ō atu i le tupu o Isaraelu, ua fai atu: “Ua faapea mai lau auauna o Peniata, ‘Faamolemole, ia e faaola mai iā te aʻu.’” Ona fai mai lea o Aapo: “Po o ola pea o ia? O ia o loʻu uso.”
33 Ua manatu tagata o se faailoga lelei lea ma ua faamaoni o ia i ana upu, ua latou faapea atu: “O Peniata, o lou uso lea.” Ona fai mai lea o Aapo: “Inā ō ia, ma aumai o ia.” Ona sau lea o Peniata iā Aapo; ma ua ave aʻe o ia e Aapo i lana kariota.
34 Ua faapea mai Peniata iā te ia: “Ou te toe faafoʻi atu aai na ave e loʻu tamā mai i lou tamā, ma e mafai ona e faia ni maketi* mo oe lava i Tamaseko, e pei lava ona faia e loʻu tamā i Samaria.”
Ona tali atu lea o Aapo: “Ou te auina ese atu oe ona o lenei maliega.”*
Ona ia faia lea o se maliega ma ia ma auina ese atu o ia.
35 E tusa ai ma le afioga a Ieova, ua fai atu se tasi o atalii o le ʻauperofeta*+ i lana uō: “Faamolemole, ia e tā mai iā te aʻu.” Ae ua musu le tagata e tā o ia.
36 Ona ia toe fai atu lea iā te ia: “Talu ai ua e lē faalogo i le siʻufofoga o Ieova, o le taimi lava e te alu ese atu ai mai iā te aʻu, o le a faaumatia oe e se leona.” Ina ua alu ese o ia mai iā te ia, ona maua lea o ia e se leona ma ua faaumatia ai o ia.
37 Ua ia maua foʻi se isi tagata, ma faapea atu: “Faamolemole, ia e tā mai iā te aʻu.” Ona tā lea o ia e le tagata ma manu‘a ai.
38 Ona alu lea o le perofeta ma faatalitali i le auala mo le tupu, ma ua ia lē faailoa atu ona foliga e ala i le fusi o ona mata.
39 A o alu ane le tupu, ua ia valaau atu i le tupu e faapea: “Na alu lau auauna i le lotolotoi o le taua, ma ua sau se tasi mai i le taua ma aumai se tagata iā te aʻu ma fai mai, ‘Ia e leoleo i lenei tagata. Afai e leiloa o ia, o le a sui lona ola i lou ola,+ a lē o lenā, e te totogiina mai se taleni* siliva.’
40 Peitaʻi, a o pisi lau auauna i lea mea ma lea mea, vaai! ua leai o ia.” Ona fai atu lea o le tupu o Isaraelu iā te ia: “O lou lava faasalaga lenā. Ua e faia lou lava faamasinoga.”
41 Ona ia aveesea faavave lea o le fusi mai i ona mata, ma ua iloa atu e le tupu o Isaraelu, o ia o se tasi o le ʻauperofeta.+
42 Ua fai atu o ia i le tupu: “O le mea lenei na fetalai mai ai Ieova, ‘Talu ai ua e tuu atu e alu le tagata sa i lou lima na ou fai atu e faaumatia,+ o le mea lea e sui ai lona ola i lou ola,+ ma lona nuu e sui i lou nuu.’”+
43 Ona alu ai lea o le tupu o Isaraelu i lona fale i Samaria,+ ua tigā ma ua lē fiafia.
Faamatalaga Pito i Lalo
^ Epe., “Ia faia e atua ma ia latou faaopoopo i ai.”
^ Po o “fale lauvao.”
^ Po o “le fale lauvao.”
^ Po o le “matuā fasiotia.”
^ E faasino atu i le isi tau e totogo ai mea.
^ Epe., “faitauina.”
^ E faasino atu i le tau e totogo ai mea.
^ Po o le “faalogo o ni tupu alolofa faamaoni.”
^ Po o le “feagaiga.”
^ Po o le “ona e tofia ni auala.”
^ E foliga mai e faasino atu “atalii o le ʻauperofeta,” i se aʻoga e saunia mai ai faatonuga mo perofeta, po o se faalapotopotoga o perofeta.
