O le Tusi Muamua o Tupu 21:1-29
21 Ina ua mavae nei mea, sa iai se mea na tupu e tusa ai o le togāvine a Napota le tagata Isereelu, lea sa i Isereelu+ i tafatafa o le maota o Aapo le tupu o Samaria.
2 Ua fai atu Aapo iā Napota: “Ia aumai iā te aʻu lou togāvine ina ia faia ai soʻu togālaau ʻaina, auā e latalata mai i loʻu fale; ona ou avatu lea iā te oe se togāvine e sili atu ona lelei. Ae afai e lelei i lou manatu, ou te avatu iā te oe tupe e faatau mai ai.”
3 Ae ua fai mai Napota iā Aapo: “Ia mamao iā te aʻu i le silafaga a Ieova, ona ou avatu iā te oe le tofi o oʻu augātamā.”+
4 Ona alu lea o Aapo i lona fale, ua tigā ma ua lē fiafia i upu a Napota le tagata Isereelu na fai mai iā te ia e faapea: “Ou te lē avatua iā te oe le tofi o oʻu augātamā.” Ua taoto o ia i lona moega ma faasaga ese, ua musu fo‘i e ʻai.
5 Ua sau lana avā o Iesepela+ ma faapea mai iā te ia: “Aiseā ua e faanoanoa ai, ma e musu ai e te ʻai?”
6 Ona ia fai atu lea i lana avā: “Talu ai na ou fai atu iā Napota le tagata Isereelu, ‘Ia e faatau mai iā te aʻu lou togāvine. Afai foʻi e te manaʻo i ai, ou te avatu iā te oe se isi togāvine e sui ai.’ Ae ua fai mai o ia, ‘Ou te lē avatua iā te oe loʻu togāvine.’”
7 Ona fai mai lea o Iesepela lana avā iā te ia: “Pe e lē o oe ea o le tupu o Isaraelu? Inā tulaʻi ia, ia ʻai ma ia faafiafia lou loto. O le a ou avatu iā te oe le togāvine a Napota le tagata Isereelu.”+
8 Ona tusia lea e Iesepela o tusi i le igoa o Aapo, ma faamau i le faamaufaailoga a le tupu,+ ma ia avatu tusi i toeaina+ ma tamālii o le aai o loo nofo ai Napota.
9 Ua ia tusia i tusi e faapea: “Ia talaʻi se anapogi, ma ia faanofo Napota i se nofoaga faapitoa i luma o le nuu.
10 Ia faanonofo fo‘i i ona luma ni tagata lē aogā se toʻalua, ia la molimau faasaga iā te ia+ e faapea, ‘Na e faifai i le Atua ma le tupu!’+ Ona outou ave lea o ia i fafo o le aai ma fetogi iā te ia i maa ina ia oti ai.”+
11 Ona faia lea e tagata o lona aai, o toeaina ma tamālii o loo nonofo i lona aai, e pei ona tusia i tusi na avatu e Iesepela iā i latou.
12 Ua latou talaʻi le anapogi ma faanofo Napota i se nofoaga faapitoa i luma o le nuu.
13 Ona ō mai lea o tagata lē aogā e toʻalua, ua saofafaʻi i luma o Napota, ma ua la molimau e faasaga iā te ia i luma o le nuu, e faapea: “Na faifai Napota i le Atua ma le tupu!”+ Ona latou ave lea o ia i le faatausiʻusiʻuga o le aai, ma fetogi iā te ia ma ua oti ai.+
14 Ona latou auina atu lea o le feʻau iā Iesepela e faapea: “Na fetogia Napota i maa, ma ua oti ai.”+
15 Ina ua faalogo Iesepela ua fetogia Napota i maa ma ua oti ai, ona ia fai atu loa lea iā Aapo: “Inā tulaʻi ia, ma ave mo oe le togāvine a Napota le tagata Isereelu,+ lea na musu e faatau atu iā te oe i tupe; auā ua lē o toe ola Napota, ae ua oti.”
16 Ina ua faalogo Aapo ua oti Napota, ona tulaʻi lea o Aapo ma alu ifo i le togāvine a Napota le tagata Isereelu, ma ave mo ia.
17 Ae ua oo mai le afioga a Ieova iā Elia+ le tagata Tisepi, ua faapea mai:
18 “Ia e tulaʻi, ma alu ifo e faafetaiaʻi iā Aapo le tupu o Isaraelu lea o loo i Samaria.+ O loo iai o ia i le togāvine a Napota, ua alu o ia e ave mo ia.
19 Ia e fai atu iā te ia, ‘O le mea lenei ua fetalai mai ai Ieova: “Po ua e fasiotia ea se tagata+ ma ave mo oe lona fanua?”’+ E te faapea atu foʻi iā te ia, ‘O le mea lenei ua fetalai mai ai Ieova: “O le mea na etoeto ai e taʻifau le toto o Napota, e etoeto ai foʻi e taʻifau lou lava toto.”’”+
20 Ona fai mai lea o Aapo iā Elia: “O oe lenā loʻu fili,+ po ua e maua ea aʻu?” Ona ia fai atu lea: “Ua ou maua oe. ‘Auā ua e maumaua‘i* e faia le mea leaga i le silafaga a Ieova,+
21 o lenei, ou te faaoo atu puapuaga iā te oe; ou te tafiesea lava mai iā te oe ma faaumatia tane uma* mai i le aiga o Aapo,+ e aofia ai sē e leai se fesoasoani ma faatauvaa i Isaraelu.+
22 Ou te faia lava lou aiga ia pei o le aiga o Ierepoamo+ le atalii o Nepata, ia pei foʻi o le aiga o Paasa+ le atalii o Akia, ona ua e faatupuina loʻu toʻasā ma faapogaia Isaraelu e agasala.’
23 Ua fetalai mai foʻi Ieova e faatatau iā Iesepela e faapea, ‘E ʻaina lava e taʻifau Iesepela i le fanua lea e i Isereelu.+
24 O so o se tasi o le aiga o Aapo e oti i le aai, e ʻaina e taʻifau; a o se tasi e oti i le fanua, e ʻaina e manufelelei o le lagi.+
25 O le mea moni, e leai lava se tasi ua tutusa ma Aapo,+ o lē na maumauaʻi* e faia le mea leaga i le silafaga a Ieova, o lē na faaoso e lana avā o Iesepela.+
26 Ua ia faia mea ua matuā leaga i lona mulimuli atu i tupua inosia,* e pei o mea uma na faia e tagata Amorī o ē na tuliesea e Ieova i luma o le fanauga a Isaraelu.’”+
27 Ina ua faalogo Aapo i ia upu, ona ia saeia lea o ona ofu ma ofu i le ʻie talatala; ua ia anapogi foʻi ma taoto pea i le ʻie talatala, ma fesavaliaʻi solo ma le matuā mafatia.
28 Ona oo mai lea o le afioga a Ieova iā Elia le tagata Tisepi, e faapea:
29 “Po ua e iloa ua faamaulalo Aapo ona o aʻu?+ Talu ai ua faamaulalo o ia i oʻu luma, o le a ou lē faaoo ai puapuaga i ona aso. Ae o le a ou faaoo mai puapuaga i lona aiga i aso o lona atalii.”+
Faamatalaga Pito i Lalo
^ Epe., “ua e faatauina atu oe lava.”
^ Epe., “so o se tasi e tulaʻi e fai sana feʻaulata i le pā.” O se faaupuga Eperu e faaalia ai le ʻinoʻino, e faasino atu i tauleleʻa ma tamāloloa.
^ Epe., “o lē na faatauina atu o ia lava.”
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
