O le Tusi Lona Lua i le Faapotopotoga i Korinito 1:1-24
1 O aʻu o Paulo o le aposetolo a Keriso Iesu i le finagalo o le Atua, ma Timoteo+ lo tatou uso, o le tusi lenei i le faapotopotoga a le Atua i Korinito, atoa ma le ʻaupaia uma o ē o i Akaia+ uma:
2 Tau ina iā te outou le agalelei faifua ma le filemu mai i le Atua lo tatou Tamā, ma le Alii o Iesu Keriso.
3 Ia viia le Atua o le Tamā o lo tatou Alii o Iesu Keriso,+ le Tamā o le alofa mutimutivale,+ ma le Atua o faamāfanafanaga uma,+
4 o lē e na te faamāfanafanaina* i tatou i o tatou puapuaga* uma,+ ina ia mafai foʻi ona tatou faamāfanafana atu+ i ē ua oo i ai so o se puapuaga,* i le faamāfanafanaga ua tatou maua mai i le Atua.+
5 Auā e pei ona tele o o tatou mafatiaga ona o Keriso,+ ua faapena foʻi ona tele faamāfanafanaga ua tatou maua ona o Keriso.
6 Pe a matou feagai ma puapuaga,* e faamāfanafanaina ma faaolaina ai outou; ma pe a faamāfanafanaina i matou, e faamāfanafanaina ai foʻi outou, lea e mafai ai ona outou tumau i mafatiaga o loo matou mafatia ai foʻi.
7 O le mea lea, e tumau ai lo matou faamoemoe iā te outou i le iloa e faapea, e pei ona oo o mafatiaga iā te outou, e faapea foʻi ona maua e outou o faamāfanafanaga.+
8 Le ʻauuso e, e matou te mananaʻo ina ia outou iloa puapuaga na oo iā i matou i le itumalo o Asia.+ Na matuā mafatia i matou e sili atu i lo o le mea na matou lavātia, na oo foʻi ina matou popole neʻi o matou feoti.+
9 O le mea moni, na matou manatu ua faasalaina i matou i le oti. Na tupu lenā mea ina ia matou faatuatuaina ai, e lē o i matou lava, a o le Atua+ o lē e na te faatutūina o ē ua feoti.
10 Na ia laveaʻi foʻi i matou mai i le mataʻutia o le oti, ma o le a ia laveaʻi lava i matou, ma ua matou faamoemoe iā te ia e na te laveaʻia pea i matou.+
11 E mafai foʻi ona outou fesoasoani mai e ala i a outou tatalo faatauanau mo i matou,+ ina ia tuuina atu le faafetai e tagata e toʻatele mo i matou, mo mea ua foaʻi mai ma le agalelei ona o tatalo a le toʻatele.+
12 Auā o le mea lenei ua matou mitamita ai, lea ua molimau i ai o matou lotofuatiaifo, o le paia ma le faamaoni i le Atua sa matou amioaʻi ai i le lalolagi, aemaise lava iā te outou, ae e lē tusa ai ma le atamai faaletagata,+ a o le agalelei faifua o le Atua.
13 Auā e matou te lē o tusi atu iā te outou i nisi mea, a o mea e mafai ona outou faitau* ma malamalama i ai, ma ou te faamoemoe o le a faaauau ona outou malamalama atoatoa i nei mea,*
14 e pei ona iloa e nisi o outou, ua fai i matou ma mea e tou te mitamita ai, e pei foʻi o le a matou mitamita ona o outou i le aso o lo tatou Alii o Iesu.
15 O loʻu mautinoa i lenei mea, na ou fuafua ai ou te alu atu muamua iā te outou, ina ia maua se mea e tou te olioli faalua ai;*
16 auā na ou fuafua e afe atu iā te outou i laʻu malaga i Maketonia, ma toe foʻi mai Maketonia iā te outou, ona outou momoli lea o aʻu* i Iutaia.+
17 Ae ina ua ou faia lea fuafuaga, pe na ou manatu māmā ea i ai? Pe na ou fuafua ea e tusa ma manatu faaletagata, ma ou fai atu “Ioe, o lea lava” ona ou toe fai atu lea “Leai, e leai lava”?
18 Ae e faamaoni le Atua, e matou te leʻi fai atu iā te outou, “ioe,” ona toe fai atu lea e “leai.”
19 Auā o Iesu Keriso le Alo o le Atua, lea na matou talaʻiina atu iā te outou, o aʻu, ma Siluano,* ma Timoteo,+ e leʻi avea o ia ma “ioe” ma toe “leai,” ae e na o le “ioe” lava.
20 Auā po o le ā lava le tele o folafolaga a le Atua, ae ua “ioe” uma ona o ia.+ E ala iā te ia, ua tatou faapea atu ai “Amene” i le Atua,+ ina ia tatou faamamaluina ai o ia.
21 Ae o lē ua faamaoniaina o outou ma i matou o tagata o Keriso, ma o lē na faauuina i tatou, o le Atua lea.+
22 Ua ia faamaufaailogaina i tatou,+ ma tuuina mai iā i tatou le faamaoniga* o le mea o le a oo mai, o le agaga lea,+ i o tatou loto.
23 Ou te manaʻo e fai le Atua ma molimau iā te aʻu,* ou te leʻi alu atu i Korinito ina neʻi atili ai ona outou mafatia.
24 E matou te lē fia pule i lo outou faatuatua,+ ae o i matou o le ʻaufaigaluega faatasi ma outou mo lo outou olioli, auā o lo outou faatuatua ua outou tutumau ai.
Faamatalaga Pito i Lalo
^ Po o “tofotofoga.”
^ Po o “se tofotofoga.”
^ Po o le “faalaeiauina.”
^ Po o “tofotofoga.”
^ Pe atonu “o mea ua outou iloa lelei.”
^ Po o le “malamalama i ai e oo i le i‘uga.”
^ Pe atonu “ina ia outou manuia faalua ai.”
^ Ele., “momoli lea o aʻu i se vaega o le auala.”
^ E igoa foʻi iā Sila.
^ Po o le “uluaʻi totogi.”
^ Po o “i loʻu nei ola.”
