O le Tusi Lona Lua i le Faapotopotoga i Korinito 10:1-18
10 O aʻu o Paulo, ou te ʻaiʻoi atu iā te outou i le agamalu ma le agalelei o Keriso,+ e ui ina ou faatauvaa i la outou vaai pe a ou iai iā te outou,+ ae ou te lototele pe a ou lē iai iā te outou.+
2 Ou te faamoemoe pe a ou faatasi ma outou, ou te lē faia faamalosi se mea, ma matuā aʻoaʻi nisi o outou e pei ona ou manatu ai, o ē o manatu e peiseaʻī o loo matou savavali faaletino.
3 Auā e ui lava ina matou savavali i le tino, ae e matou te lē o tauina se taua faaletino.
4 Auā e lē faaletino auupega o la matou taua,+ ae e faamalosia i matou e le Atua+ e lepetia ai mea ua matuā mautū.
5 Auā ua matou faatoʻilaloina manatu sesē ma mea maualuluga uma e tetee i le poto i le Atua,+ ma ua matou faatoʻilaloina manatu uma* ina ia usiusitaʻi i le Keriso;
6 ua matou nofosauni foʻi e faaoo le faasalaga i so o se tasi e lē usiusitaʻi pea,+ pe a uma ona faaalia ua atoatoa lo outou usiusitaʻi.
7 Ua outou vaavaai i mea e tusa ma o latou foliga. Afai e mautinoa se tasi iā te ia lava ma faapea ane o ia o se auauna a Keriso, inā toe mafaufau ia o ia i lenei mea: E pei ona avea o ia ma auauna a Keriso, e faapea foʻi i matou.
8 Auā e tusa po ou te soona mitamita i le pule ua tuuina mai e le Alii iā i matou, e atiaʻe ai outou ae e lē faavaivaia ai,+ e lē o se mea lea ou te mā ai.
9 Ou te lē manaʻo e tou te manatu o loo oʻu taumafai e faafefe outou i aʻu tusi.
10 Auā ua latou faapea mai: “O ana tusi e mamafa ma malolosi, ae a faatasi mai o ia e vaivai, o ana upu foʻi e faatauvaa ia.”
11 Ia manatua e lea tagata, o mea e matou te fai atu ai* i a matou tusi pe a matou lē iai, o mea lava ia e matou te faia* pe a matou faatasi atu.+
12 Auā e matou te lē manatu e tutusa i matou ma isi, pe faatusatusa i matou i isi o ē e taʻuleleia i latou lava.+ Ae e lē malamalama i latou pe a faamasinoina i latou e i latou lava e tusa ai ma o latou manatu, pe faatusatusa i latou iā i latou lava.+
13 Peitaʻi, e matou te lē mitamita i oganuu e leʻi tofia mai iā i matou, ae i mea ua matou faia i oganuu ua tofia mai iā i matou e le Atua, ua matou faaoo atu ai foʻi iā te outou.+
14 E moni, e matou te leʻi sopoʻia o matou tuaoi ina ua matou ō atu iā te outou, e peiseaʻī e leʻi aofia outou i la matou oganuu, auā o i matou na muamua oo atu iā te outou ma le tala lelei i le Keriso.+
15 E leai, e matou te lē o mitamitavale i galuega ua faia e se isi tagata i oganuu e leʻi tofia mai iā i matou, ae e matou te faamoemoe e faapea, a o tupu pea lo outou faatuatua, ia faateleina pea le galuega na matou faia i la matou oganuu. O le a atili ai ona matou
16 folafola atu le tala lelei i atunuu i tala atu o outou, ina ia matou lē mitamita fua i le oganuu ua uma ona galueaʻiina e se tasi.
17 “Ae o lē e mitamita, ia mitamita o ia iā Ieova.”*+
18 Auā e lē talia le tagata e na te taʻuleleia o ia lava,+ ae e talia le tagata e taʻuleleia e Ieova.*+
Faamatalaga Pito i Lalo
^ Ele., “faatoʻilaloina manatu uma e pei ona noanoatia o se pagota.”
^ Ele., “o o matou uiga e faaalia i upu.”
^ Ele., “o uiga lava ia e matou te faaalia.”
