O le Tusi Lona Lua i le Faapotopotoga i Korinito 3:1-18
3 Po o le a toe amata ea ona matou ta‘uleleia i matou lava? Pe e pei i matou o isi tagata e manaʻomia ni tusi e ta‘uleleia ai e avatu iā te outou, pe e mai iā te outou?
2 O outou o la matou tusi+ ua tusia i o matou loto, ma ua iloa ma faitauina e tagata uma.
3 Auā ua faaalia outou, o outou o le tusi a Keriso na tusia e i matou o auauna,+ e leʻi tusia i se vaitusi a o le agaga o le Atua soifua, e leʻi tusia i papamaa+ a o loto.*+
4 E ala iā Keriso, ua matou mautinoa ai i lenei mea i luma o le Atua.
5 E matou te lē manatu ua matou agavaa ma ausia lenei mea ona o i matou lava, ae ua matou agavaa ona o le Atua,+
6 o ia foʻi ua faaagavaaina i matou o ni auauna o le feagaiga fou,+ e lē o le tulafono na tusia,+ a o le agaga; auā o le tulafono na tusia e faasala ai i le oti,+ a o le agaga e faaolaina ai.+
7 Afai foʻi na mamalu le tuuina mai o le Tulafono lea na oo mai ai le oti, lea na tusia i mataʻitusi i maa,+ ma e leʻi mafai ai e le fanauga a Isaraelu ona pulatoʻa atu i fofoga o Mose ona o le mamalu o le pupula o ona fofoga,+ o le mamalu lea e faaumatia,
8 pe e lē sili atu ea la le mamalu pe a tuuina mai le agaga?+
9 Auā afai na mamalu+ le tuuina mai o le Tulafono+ lea na iʻu ai i le faasalaga, e sili atu la ona tele le mamalu o le tuuina mai o le amiotonu!+
10 O le mea moni, e oo lava i le mea na faamamaluina, ua aveesea mai ai le mamalu, ona o le mamalu e sili atu.+
11 Auā afai na mamalu le aumaia o le mea e faaumatia,+ e sili atu la ona mamalu le mea e tumau!+
12 Talu ai o lo tatou faamoemoe lenā,+ o le mea lea ua tatou matuā saʻoloto ai e tautatala atu,
13 ma e lē pei o le mea na fai e Mose ina ua ia ufiufia ona fofoga,+ ina ia lē pulatoʻa atu i ai le fanauga a Isaraelu i le iʻuga o le mea e faaumatia.
14 Ae na pogisa o latou mafaufau.+ E oo mai lava i aso nei, e lē o aveesea le ufiufi lava lenā e tasi pe a faitauina le feagaiga tuai,+ auā ua na o Keriso ua mafai ona faaumatia ai.+
15 O le mea moni, e oo mai lava i aso nei, pe a faitauina tusi a Mose,+ o loo iai pea le ufiufi i o latou loto.+
16 Ae afai e liliu atu se tasi iā Ieova,* ona aveesea lea o le ufiufi.+
17 O lenei, o Ieova* o le Agaga,+ ma o le mea e iai le agaga o Ieova,* e iai le saʻolotoga.+
18 O i tatou uma, a o atagia atu i o tatou foliga e lē ufiufia le mamalu o Ieova* e pei o ni faata, ua liua i tatou i foliga lava na mai i le mamalu e oo ina atili mamalu ai,* e pei lava ona faia e Ieova* le Agaga.*+
Faamatalaga Pito i Lalo
^ Po o “e le‘i tusia i papamaa, a o papa aano o loto.”
^ Ele., “mai i le mamalu e oo i le mamalu.”
^ Pe atonu “e le agaga o Ieova.”
