O le Tusi Lona Lua o Nofoaiga a Tupu 10:1-19
-
Fouvalega a Isaraelu faasaga iā Reopoamo (1-19)
10 Ua alu atu Reopoamo i Sekema,+ auā na ō mai tagata Isaraelu uma i Sekema e fai o ia ma tupu.+
2 Ina ua faalogo i ai Ierepoamo+ le atalii o Nepata i lea mea (o le taimi lea o loo iai o ia i Aikupito, auā na sola ese ona o le tupu o Solomona)+ ona toe fo‘i mai ai lea o Ierepoamo mai i Aikupito.
3 Ona latou aami lea o ia, ona ō mai lea o Ierepoamo ma Isaraelu uma, ua fai mai iā Reopoamo e faapea:
4 “Na faamamafa e lou tamā a matou avega.+ Ae afai e te faafaigofie le galuega faigatā a lou tamā ma faamāmā le avega mamafa na ia faaee mai iā i matou, ona matou auauna atu lea iā te oe.”
5 Ona ia fai atu lea iā i latou: “Ia outou toe foʻi mai iā te aʻu pe a mavae aso e tolu.” Ona ō ai lea o le nuu.+
6 Ona talatalanoa lea o le tupu o Reopoamo faatasi ma toeaina, o ē na avea ma faufautua iā Solomona lona tamā a o ola o ia, ua faapea atu: “O le ā sa outou fautuaga e tali atu ai i lenei nuu?”
7 Ona latou fai mai lea iā te ia: “Afai e te agalelei i lenei nuu ma e faafiafia i latou, ma e tali atu foʻi iā i latou i se auala lelei, ona avea ai pea lea o i latou ma au auauna.”
8 Peitaʻi, ua ia teena le fautuaga a toeaina na avatu iā te ia, ae ua ia talatalanoa ma tauleleʻa na ola aʻe faatasi ma ia, ma ua avea nei ma ana faufautua.+
9 Ua ia fai atu iā i latou: “O le ā sa outou fautuaga e tatou te tali atu ai i lenei nuu, o ē na faapea mai iā te aʻu, ‘Ia faamāmā le avega na faaee mai e lou tamā iā i matou’?”
10 Ona fai mai lea o tauleleʻa na ola aʻe faatasi ma ia: “Ia faapea ona e fai atu i lenei nuu o ē na fai mai iā te oe, ‘Na faamamafa e lou tamā a matou avega, ae ia e faamāmāina mo i matou’; ia faapea ona e fai atu iā i latou, ‘O le a sili atu ona mamafa le avega ou te tuu atu iā te outou nai lo o loʻu tamā.*
11 Na faaee atu e loʻu tamā iā te outou se avega mamafa, ae o le a ou faaopoopo la outou avega. Na aʻoaʻi outou e loʻu tamā i sasa, ae o le a ou aʻoaʻia outou i sasa matuitui.’”
12 Ona ō mai lea o Ierepoamo ma le nuu uma iā Reopoamo i le aso lona tolu, e pei ona fai mai ai le tupu, e faapea: “Ia outou toe foʻi mai iā te aʻu i le aso lona tolu.”+
13 Ona tali atu lea o le tupu iā i latou ma le sauā. O lea, ua teena ai e le tupu o Reopoamo le fautuaga a toeaina.
14 Ua ia tautala atu iā i latou e tusa ai ma fautuaga a tauleleʻa, e faapea: “Ou te faamamafa atili a outou avega ma faaopoopo i ai. Na aʻoaʻi outou e loʻu tamā i sasa, ae o le a ou aʻoaʻia outou i sasa matuitui.”
15 E leʻi faalogo le tupu i le nuu, auā o lenei mea e mai i le Atua moni,+ ina ia taunuu ai le afioga a Ieova na fetalai mai ai e ala iā Akia+ le tagata Sailo, e fai atu iā Ierepoamo le atalii o Nepata.
16 Talu ai ua musu le tupu e faalogo iā Isaraelu uma, ona tali atu lea o le nuu i le tupu, ua faapea atu: “Pe e iai ea so matou tofi mai iā Tavita? E leai so matou tofi mai i le atalii o Iese. Isaraelu e, inā taʻitasi ia ma toe foʻi atu i ou atua. Tavita e, faitalia oe ma lou aiga!”+ Ona ō ai lea o Isaraelu uma i o latou fale.*+
17 Ae ua pule pea Reopoamo i le fanauga a Isaraelu, o ē o loo nonofo i aai o Iuta.+
18 Ona auina atu lea e le tupu o Reopoamo o Aturamo,+ o lē na vaavaaia tagata na faatonuina e faia galuega mamafa, ae ua fetogia o ia i maa e Isaraelu ma oti ai. Ona alu lea o le tupu o Reopoamo i lana kariota, ua sola atu i Ierusalema.+
19 Ua faaauau pea ona fouvale tagata Isaraelu i le aiga o Tavita e oo mai i le aso nei.
Faamatalaga Pito i Lalo
^ Epe., “O le a sili atu ona mafiafia loʻu limatamatama, nai lo o suilapalapa o loʻu tamā.”
^ Epe., “faleʻie.”