O le Tusi Lona Lua o Nofoaiga a Tupu 11:1-23
11 Ina ua taunuu Reopoamo i Ierusalema, ona ia faapotopoto loa lea o le aiga o Iuta ma Peniamina,+ e toʻa 180,000 tagata totoa ua toleniina,* ina ia tau ma Isaraelu ina ia toe faafoʻi mai le malo iā Reopoamo.+
2 Ona tulei mai lea o le afioga a Ieova iā Semaia+ le tagata o le Atua moni, ua faapea mai:
3 “Ia fai atu iā Reopoamo le atalii o Solomona le tupu o Iuta, ma Isaraelu uma o loo i Iuta ma Peniamina, e faapea,
4 ‘O le mea lenei na fetalai mai ai Ieova: “Aua tou te ō aʻe e tau ma o outou uso. Ia taʻitasi ma foʻi atu i lona fale, auā e mai iā te aʻu lenei mea.”’”+ Ona latou usiusitaʻi ai lea i le afioga a Ieova, ma ua toe foʻi mai e leʻi siitaua atu iā Ierepoamo.
5 Na nofo Reopoamo i Ierusalema, ma fausia aai malupuipuia i Iuta.
6 Ua ia fausia Peteleema,+ o Etama, o Tikoa,+
7 o Petesura, o Suka,+ o Atulame,+
8 o Kata,+ o Maresa, o Sifi,+
9 o Aturaima, o Lakisa,+ o Aseka,+
10 o Soraa, o Ailona,+ ma Heperona,+ o aai malupuipuia ia sa iai i Iuta ma Peniamina.
11 Ua ia toe faamalosia foʻi aai malupuipuia, ma tuu atu i ai o latou taʻitaʻi ma avatu iā i latou meaʻai, o suāuu, ma uaina,
12 ua ia avatu foʻi i aai eseese uma o talipupuni tetele ma tao; ma ua ia matuā toe faamalosia aai malupuipuia. Ua faaauau pea ona fai mo ia Iuta ma Peniamina.
13 O ositaulaga fo‘i ma sa Levī sa i Isaraelu uma, ua latou ō mai mai i o latou nuu uma, ma ua ‘au faatasi ma ia.
14 Ua tuua e sa Levī o latou fanua e aai ai lafumanu ma a latou meatotino,+ ae ō mai i Iuta ma Ierusalema, auā ua faateʻaese i latou e Ierepoamo ma ona atalii mai i le auauna o ni ositaulaga iā Ieova.+
15 Ua tofia foʻi e Ierepoamo ana lava ositaulaga mo mea maualuluga,+ ma mo temoni e pei o ni ‘oti,*+ ma tamaʻi povi poʻa na ia faia.+
16 O i latou uma fo‘i mai i ituaiga uma o Isaraelu, o ē na ua‘i atu o latou loto e saʻili iā Ieova le Atua o Isaraelu, ua latou mulimuli mai i le ‘auositaulaga ma sa Levī, ua latou ō mai i Ierusalema e fai taulaga ai iā Ieova le Atua o o latou augātamā.+
17 Ua latou faamalosia le malo o Iuta ma lagolagoina Reopoamo le atalii o Solomona mo tausaga e tolu, auā na latou savavali i ala o Tavita ma Solomona mo tausaga e tolu.
18 Ona faia lea e Reopoamo o Maalata ma ana avā. O Maalata o le afafine o Ierimota le atalii o Tavita, ma o le tama teine a Aviaila le afafine o Eliapo+ le atalii o Iese.
19 Ona la* fanaua lea o ni atalii: o Iuso, o Semaria, ma Saamo.
20 Ina ua mavae atu Maalata, ona faiavā lea o Reopoamo iā Maaka le tama a le afafine o Apisaloma.+ Ona ia fanaua ai lea mai iā te ia o Avia,+ o Atai, o Sise, ma Selomita.
21 Sa sili atu ona alofa Reopoamo iā Maaka le tama a le afafine o Apisaloma, nai lo o isi ana avā uma ma ana palake;+ auā e toʻa 18 ana avā na iai, ma palake e toʻa 60, ma na ia fanaua ai atalii e toʻa 28 ma afafine e toʻa 60.
22 Ona tofia lea e Reopoamo o Avia le tama a Maaka, e fai ma matai ma taʻitaʻi i ona uso, auā na ia fuafua e fai Avia ma tupu.
23 Peitaʻi, na gaoioi o ia ma le faautauta, ma auina atu nisi o ona atalii i vaipanoa uma o Iuta ma Peniamina, i aai malupuipuia uma,+ ma avatu iā i latou le tele o meaʻai ma le tele o avā.
Faamatalaga Pito i Lalo
^ Epe., “filifilia.”
^ Epe., “ma ʻoti.” Atonu na manatu i latou na tapuaʻi i ai o ni meaola taufulufulua ma foliga e pei o ni ʻoti poʻa.
^ E faasino atu iā Reopoamo ma Maalata.
