O le Tusi Lona Lua o Nofoaiga a Tupu 12:1-16
12 Ina ua matuā faatumauina+ le malo o Reopoamo ma ua malosi o ia, ona ia tuua ai lea o le Tulafono a Ieova,+ ma e faapena foʻi Isaraelu uma o loo faatasi ma ia.
2 O le tausaga lona lima o le nofoaiga a le tupu o Reopoamo, na alu aʻe ai Sesaka+ le tupu o Aikupito e faasagatau iā Ierusalema, auā na latou lē faamaoni iā Ieova.
3 Na iai iā te ia kariota e 1,200, o tagata tiʻetiʻe solofanua e toʻa 60,000, ma le lē mafaitaulia o tagata na ō mai faatasi ma ia mai i Aikupito, o tagata Lipua, o tagata Suki, ma tagata Aitiope.+
4 Ua ia faatoʻilaloina aai malupuipuia sa iā Iuta, ona oo atu ai lea i Ierusalema.
5 Ona alu atu lea o Semaia+ le perofeta iā Reopoamo ma alii sili o Iuta, o ē na faapotopoto faatasi i Ierusalema ona o Sesaka, ua ia faapea atu iā i latou: “O le mea lenei ua fetalai mai ai Ieova, ‘Talu ai ua outou tuua aʻu, o le mea lea ou te tuua ai foʻi outou+ i le lima o Sesaka.’”
6 Ona faamaulalo ai lea o alii sili o Isaraelu ma le tupu,+ ua faapea atu: “E amiotonu Ieova.”
7 Ina ua silasila mai Ieova ua faamaulalo i latou, ona fetalai mai lea o Ieova iā Semaia, e faapea: “Ua faamaulalo i latou. Ou te lē faaumatia i latou,+ ae ua toeitiiti ona ou faasaoina loa lea o i latou. E lē oo atu foʻi loʻu ita iā Ierusalema e ala iā Sesaka.
8 Ae o le a fai i latou ma ana auauna, ina ia o latou iloa ai le eseesega o le auauna mai iā te a‘u, ma le auauna i tupu* o isi nuu.”
9 Ona alu aʻe lea o Sesaka le tupu o Aikupito e faasagatau iā Ierusalema. Ua ia ave ʻoa o le fale o Ieova+ ma ʻoa o le fale o le tupu. Ua ia ave mea uma lava, e aofia ai talipupuni auro na faia e Solomona.+
10 Ona faia lea e le tupu o Reopoamo o talipupuni ʻapamemea e sui aʻi na mea, ma ua ia tuuina atu e pule ai alii sili o le ʻauleoleo,* o ē e leoleoina faitotoʻa o le fale o le tupu.
11 O taimi uma e alu atu ai le tupu i le fale o Ieova, e ō mai le ʻauleoleo ma ave na mea, ona latou toe faafoʻi mai lea o na mea i le potu o le ʻauleoleo.
12 Talu ai ua faamaulalo o ia, ua liliuese ai le toʻasā o Ieova mai iā te ia,+ ma e na te leʻi matuā faaumatia i latou.+ E lē gata i lea, sa iai mea lelei na faia e tagata o Iuta.+
13 Ua faamalosia pea e le tupu o Reopoamo lona tulaga i Ierusalema ma pule ai pea; e 41 tausaga o Reopoamo ina ua fai o ia ma tupu, ma e 17 tausaga na pule ai o ia i Ierusalema, i le aai na filifilia e Ieova mai i ituaiga uma o Isaraelu e tuu ai lona suafa. O le igoa o le tinā o le tupu, o Naana le fafine Amonī.+
14 Ae na faia e Reopoamo mea leaga, auā e leʻi maumauaʻi lona loto e saʻili atu iā Ieova.+
15 A o le olaga uma o Reopoamo, e mai i le amataga e oo i le faaiʻuga, po ua lē o tusia ea i upu a Semaia+ le perofeta ma Ito+ lē e faamatalaina faaaliga, o loo i le tusi o gafa? Na iai pea taua i le vā o Reopoamo ma Ierepoamo.+
16 Mulimuli ane, ua taoto Reopoamo faatasi ma ona augātamā, ma ua tanu i le Aai a Tavita;+ ona avea lea o Avia+ lona atalii ma tupu e sui iā te ia.
