O le Tusi Lona Lua o Nofoaiga a Tupu 13:1-22
13 I le tausaga lona 18 o le nofoaiga a le tupu o Ierepoamo, na fai ai Avia ma tupu i Iuta.+
2 E tolu tausaga na pule ai o ia mai i Ierusalema. O le igoa o lona tinā o Mekaio+ le afafine o Urielu mai i Kipea.+ Sa iai foʻi taua i le vā o Avia ma Ierepoamo.+
3 Ona alu atu lea o Avia i le taua faatasi ma le ʻautau e toʻa 400,000 tagata totoa malolosi ua toleniina.*+ Ua sauni foʻi Ierepoamo ma tagata totoa malolosi ua toleniina,* e toʻa 800,000, e tau le taua faasaga iā Avia.
4 Ua tulaʻi Avia i luga o le mauga o Semaraima o loo i le vaega maugā o Efaraima, ua faapea atu: “Ierepoamo e, ma Isaraelu uma, inā faalogo mai ia iā te aʻu.
5 Pe e tou te lē iloa ea ua foaʻi mai e Ieova le Atua o Isaraelu iā Tavita le malo e pule ai iā Isaraelu e faavavau,+ o ia ma ona atalii+ e ala i le feagaiga o le masima?*+
6 Ae na tulaʻi Ierepoamo+ le atalii o Nepata, le auauna a Solomona le atalii o Tavita, ma fouvale i lona alii.+
7 Na faapotopoto faatasi atu pea iā Ierepoamo o tagata e leai ni mea e faia ma e leai so latou aogā. Na sili atu foʻi i latou nai lo o Reopoamo le atalii o Solomona, o sē na laʻitiiti ma lotovaivai, ma e leʻi mafai ona tetee atu iā i latou.
8 “O lenei, ua outou manatu e mafai ona outou tetee atu i le malo o Ieova i le lima o atalii o Tavita, ona ua toʻatele outou ma ua iā te outou tamaʻi povi poʻa auro na faia e Ierepoamo e avea ma o outou atua.+
9 Pe e tou te leʻi tuliesea ea ositaulaga a Ieova,+ o le fanauga a Arona, ma sa Levī, ma pe e tou te leʻi tofia ea a outou lava ositaulaga e pei o tagata o isi nuu?+ O so o se tasi na sau ma se tamaʻi povi poʻa, ma ni mamoe poʻa se fitu, na mafai ona avea ma ositaulaga i mea e lē o ni atua.
10 A o i matou, o Ieova o lo matou Atua ia,+ ma matou te leʻi tuua o ia; o loo auauna iā Ieova o matou ositaulaga, o le fanauga a Arona, ma o loo fesoasoani le ʻau sa Levī i le galuega.
11 O loo latou faamūina taulaga mū iā Ieova ina ia asu i taeao taʻitasi ma afiafi taʻitasi,+ faatasi ma mea manogi,+ ma o loo iai falaoa ua faaputuina*+ i luga o le laulau e faia i le auro māoʻi, o loo latou faamumū fo‘i le tuugāmolī auro+ ma ona molī i afiafi ta‘itasi,+ auā o loo matou tausia lo matou tiute tauave iā Ieova lo matou Atua; ae ua outou tuua o ia.
12 Faauta! o loo faatasi le Atua moni ma i matou, ma o loo ia taʻitaʻia i matou. O loo iai i inei ana ositaulaga e iliina pū e faailo mai ai le taua faasaga iā te outou. Tagata o Isaraelu e, aua tou te tau faasaga iā Ieova le Atua o o outou augātamā, auā e tou te lē taulau manuia.”+
13 Ae ua auina atu e Ierepoamo se ʻautau e faalalafi i tua o le ‘autau a Iuta, ina ia iai lana ‘autau autū i luma o Iuta, ma le isi ‘autau i o latou tua.
14 Ina ua tetepa i tua ʻautau a Iuta, ona latou iloa ai lea ua iai ʻautau i o latou luma ma o latou tua. Ona latou alalaga atu lea iā Ieova,+ a o ili leotetele pū e ositaulaga.
15 Ua alalaga tagata o Iuta i le alaga o le taua, ma ina ua alagaina e tagata o Iuta le alaga o le taua, ona faatoʻilaloina lea e le Atua moni o Ierepoamo ma Isaraelu uma, i luma o Avia ma Iuta.
16 Ua sosola le fanauga a Isaraelu mai i luma o Iuta, ona tuuina atu lea e le Atua o i latou i o latou lima.
17 Ua ō atu Avia ma ona tagata ua fasiotia i latou i le fasi e matuā tele lava; ma e toʻa 500,000 tane ua toleniina* o Isaraelu, na paʻuʻū ina ua fasia i latou.
18 O lea na faalumaina ai tane o Isaraelu i lenā taimi, ae ua sili atu ona malolosi tane o Iuta, auā na latou faalagolago iā Ieova le Atua o o latou augātamā.+
19 Ua tuliloa pea e Avia ia Ierepoamo ma faoa aai nei mai iā te ia, o Peteli+ ma ona tamaʻi aai, o Iesana ma ona tamaʻi aai, ma Efaraima+ ma ona tamaʻi aai.
20 E leʻi toe malosi foʻi le pule a Ierepoamo i aso o Avia; ona taia ai lea o ia e Ieova ma ua oti ai.+
21 Ae ua faaauau pea ona faamalosia e Avia lona malo. Mulimuli ane, ona faiavā ai lea o ia i fafine+ e toʻa 14, ma ua ia fanauina ai atalii e toʻa 22 ma afafine e toʻa 16.
22 A o le olaga uma o Avia, o ana gaoioiga ma ana upu, ua faamauina ia i tusitusiga a le perofeta o Ito.+
Faamatalaga Pito i Lalo
^ Epe., “filifilia.”
^ Epe., “filifilia.”
^ E faasino atu i se feagaiga tumau ma e lē mafai ona suia.
^ E faasino atu i le falaoa e laulauina.
^ Epe., “filifilia.”
