O le Tusi Lona Lua o Nofoaiga a Tupu 17:1-19
17 Ona avea lea o Iosefatu+ lona atalii ma tupu e sui iā te ia, ma ua faamalosia e Iosefatu lana pule i Isaraelu.
2 Ua ia tuuina ʻautau i aai malupuipuia uma o Iuta, ma tuuina atu foʻi leoleoga i le nuu o Iuta ma aai o Efaraima na faoa e lona tamā o Asa.+
3 Sa faatasi pea Ieova ma Iosefatu auā na savali o ia i ala o Tavita lona augātamā,+ ma e leʻi saʻili atu iā Paala.
4 Auā na ia saʻili atu i le Atua o lona tamā,+ ma mulimuli* i ana poloaʻiga, ae e leʻi mulimuli atu i mea na faia e Isaraelu.+
5 Ua matuā faatumauina pea e Ieova le malo i ona lima;+ ua avatu pea e Iuta uma o meaalofa iā Iosefatu, ma ua tele ana oloa ma lona mamalu.+
6 Ua lototele o ia e mulimuli i ala o Ieova, ma na ia aveesea foʻi mea maualuluga+ ma pou paia*+ mai i Iuta.
7 I le tausaga lona tolu o lana nofoaiga, na ia aami ai ona alii sili o Peniaila, o Opetaia, o Sakaria, o Netanielu, ma Mekaio, ina ia aʻoaʻo atu i aai o Iuta.
8 Ua faatasi foʻi ma i latou le ʻau sa Levī: o Semaia, o Netanaia, o Sepatia, o Asaelu, o Semiramota, o Ionatana, o Atonia, o Topia, ma Topa-atonia, faapea foʻi ma ositaulaga o Elisama ma Ioramo.+
9 Ona amata lea ona latou aʻoaʻo atu i Iuta, ma sa iā i latou le tusi o le Tulafono a Ieova,+ ua latou ō faataamilo i aai uma o Iuta ma aʻoaʻo atu i le nuu.
10 O malo uma o nuu sa siʻomia Iuta, ua latou matataʻu ona o Ieova, e latou te leʻi siitaua foʻi iā Iosefatu.
11 Na aumaia e tagata Filisitia meaalofa iā Iosefatu ma tupe e fai ma meaalofa. Na aumai foʻi e tagata Arapi mai i a latou lafu, o mamoe poʻa e 7,700, ma ʻoti poʻa e 7,700.
12 Ua matuā faatuputeleina le pule a Iosefatu;+ ua ia fausia pea aai malupuipuia+ ma aai e teu ai oloa+ i Iuta.
13 Na ia faia foʻi le matuā tele o galuega i aai o Iuta, ma sa iai ana fitafita, o tagata totoa malolosi i Ierusalema.
14 Na vaevaeina i latou e tusa ai ma aiga o o latou tamā: e mai iā Iuta, o taʻitaʻi o le taʻitoʻaafe, o Atana le taʻitaʻi, ma sa iā te ia tagata totoa malolosi e toʻa 300,000.+
15 Na pule o ia iā Iokana le taʻitaʻi, ma sa iā Iokana tagata e toʻa 280,000.
16 Na pule foʻi Atana iā Amasea le atalii o Sekari, o lē na galue tauofo mo Ieova, ma sa iā te ia tagata totoa malolosi e toʻa 200,000.
17 E mai iā Peniamina,+ sa iai le tagata toa malosi o Eliata, sa iā te ia tagata e toʻa 200,000 ua faaauupegaina i ʻaufana ma talita.+
18 Na pule o ia iā Iosapa, ma sa iā Iosapa tagata e toʻa 180,000 ua faaauupegaina mo le ʻautau.
19 O i latou nei na auauna atu i le tupu, e ese mai iā i latou o ē na tuu e le tupu i aai malupuipuia i Iuta atoa.+