O le Tusi Lona Lua o Nofoaiga a Tupu 23:1-21
23 I le tausaga lona fitu, na gaoioi ai ma le lototele Ioiata ma ua ia osia se feagaiga ma taʻitaʻi o le taʻitoʻaselau,+ o Asaraia le atalii o Ieroama, o Isamaeli le atalii o Iokana, o Asaraia le atalii o Opeta, o Maaseia le atalii o Ataia, ma Elisafata le atalii o Sekari.
2 Ona latou ō atu lea i Iuta uma ma faapotopoto faatasi le ʻau sa Levī+ mai i aai uma o Iuta, ma alii sili o aiga o tamā o Isaraelu. Ina ua latou ō mai i Ierusalema,
3 ona osia ai lea e le faapotopotoga uma o se feagaiga+ ma le tupu i le fale o le Atua moni, ona faapea atu lea o Ioiata iā i latou:
“Faauta! O le a pule le atalii o le tupu, e pei ona folafola mai e Ieova e faatatau i atalii o Tavita.+
4 O le mea lenei e tou te faia: O le tasi vaetolu o ositaulaga ma sa Levī o ē o le a tiute+ i le aso Sapati, e fai ma leoleo faitotoʻa;+
5 o le isi tasi vaetolu e iai i le fale o le tupu;+ ma le isi tasi vaetolu e iai i le faitotoʻa ua taʻua o le Faavae; a o le nuu uma o le a iai i lotoā o le fale o Ieova.+
6 Aua neʻi outou faataga se tasi e ulu atu i le fale o Ieova, seʻi vaganā ai ositaulaga ma le ʻau sa Levī o loo auauna atu.+ O i latou na e mafai ona ulufale atu, auā o i latou o se vaega paia, a o le nuu uma e latou te tausia la latou matafaioi iā Ieova e ala i le lē ulufale atu.
7 Ia siʻosiʻomia e le ʻau sa Levī le tupu i itu uma, ma ia tofu le tagata ma lana auupega i lona lima. O so o se tasi e sau i totonu o le fale, e fasiotia lava o ia. Ia outou faatasi pea ma le tupu i so o se mea e alu i ai.”*
8 Ua faia e sa Levī ma Iuta uma o mea uma na poloaʻi atu ai Ioiata le ositaulaga. Ua latou taʻitasi ma ave i ona tagata o ē na tiute i le aso Sapati, faatasi ma i latou o ē e lē tiute i le aso Sapati,+ auā e leʻi faatagaina e le ositaulaga o Ioiata ona ō ese nei vaega+ mai i o latou tiute.
9 Ona avatu lea e le ositaulaga o Ioiata i taʻitaʻi o le taʻitoʻaselau,+ o tao, o talita* ma talita lapotopoto a le tupu o Tavita+ sa i le fale o le Atua moni.+
10 Ua ia tofia foʻi tane uma e tutū e taʻitasi ma lana auupega i lona lima, e mai i le itu taumatau o le fale e oo i le itu tauagavale o le fale, i tafatafa ane o le fata faitaulaga ma le fale, e siʻosiʻomia ai le tupu.
11 Ona latou aumaia lea o le atalii o le tupu+ ma faaee iā te ia le palealii ma le Tusi o le Tulafono,*+ ua latou faia o ia ma tupu ma ua faauuina o ia e Ioiata ma ona atalii. Ona latou faapea atu lea: “Ia soifua le tupu!”+
12 Ina ua faalogo Atalia i le leo o le fetaufetulia‘i ma le vivii atu o le nuu i le tupu, ona sau ai lea o ia i le nuu i le fale o Ieova.+
13 Ona ia vaaia lea o le tupu o loo tū i tafatafa o lona poutū i le mea e ulufale ai. Ua iai foʻi le tupu faatasi ma perenise+ ma ē e iliina pū, ma o loo fiafia le nuu uma+ ma ili a latou pū, o loo ta‘ita‘ia viiga e tagata pepese o loo iai meafaifaaili. Ona saeia lea e Atalia o ona ofu, ua alaga: “O le fouvalega! O le fouvalega!”
14 Ae ua aumaia e le ositaulaga o Ioiata taʻitaʻi o le taʻitoʻaselau, o ē ua tofia e vaavaaia le ʻautau, ua faapea atu iā i latou: “Inā ave ia o ia i fafo mai i le laina o fitafita, ma o so o se tasi foʻi e mulimuli atu iā te ia, ia fasiotia i le pelu!” Auā ua faapea atu le ositaulaga: “Aua neʻi fasiotia o ia i le fale o Ieova.”
15 Ua latou puʻea o ia, ma ina ua oo mai i le nofoaga e ulu atu ai i le Faitotoʻa o Solofanua i le fale o le tupu, ona latou fasiotia loa lea o ia i inā.
16 Ona faia lea e Ioiata se feagaiga i le vā o ia, o le nuu uma, ma le tupu ina ia avea pea i latou ma nuu o Ieova.+
17 Mulimuli ane, ua ō atu le nuu uma i le fale* o Paala ma talepe i lalo;+ ua latou matuā nutililiia foʻi ona fata faitaulaga ma ona faatusa,+ ma ua latou fasiotia Matana le ositaulaga a Paala+ i luma o fata faitaulaga.
18 Ona tuuina atu lea e Ioiata le vaavaaiga o le fale o Ieova i ositaulaga ma le ‘au sa Levī, o ē na tofia e Tavita i vaega e vaavaaia le fale o Ieova, e ofo atu taulaga mū iā Ieova+ e tusa ma mea ua tusia i le Tulafono a Mose,+ ma le olioli ma pese na saunia e Tavita.
19 Na ia tofia fo‘i leoleo faitotoʻa+ i faitotoʻa o le fale o Ieova, ina neʻi ulufale atu se tasi e lē mamā.
20 Ona ia ave lea o taʻitaʻi o le taʻitoʻaselau,+ o alii tāua, o pule o le nuu, ma tagata uma o le nuu, ua latou ave ifo le tupu mai i le fale o Ieova. Ona latou ui mai lea i le faitotoʻa i luga aga‘i i le fale o le tupu, ma faanofo le tupu i le nofoālii+ o le malo.+
21 Ua olioli pea tagata o le nuu ma ua filemu foʻi le aai, auā ua latou fasiotia Atalia i le pelu.
Faamatalaga Pito i Lalo
^ Epe., “i lona ulufafo atu ma lona ulufale mai.”
^ O se talita laʻitiiti, e masani ona tauaveina e tagata fanafana ū.
^ Atonu o se tusi tāʻai o loo iai le Tulafono a le Atua.
^ Po o le “malumalu.”