O le Tusi Lona Lua o Nofoaiga a Tupu 24:1-27
24 E fitu tausaga o Ioasa ina ua fai o ia ma tupu,+ ma e 40 tausaga na pule ai o ia mai i Ierusalema. O le igoa o lona tinā o Sevi mai i Peresepa.+
2 Ua faia pea e Ioasa le mea ua tonu i le silafaga a Ieova i aso uma o Ioiata le ositaulaga.+
3 Ua filifilia e Ioiata avā e toʻalua mo Ioasa, ma na ia fanaua ai o atalii ma afafine.
4 Mulimuli ane, ua naunau le loto o Ioasa e toe faafou le fale o Ieova.+
5 Ona ia faapotopoto faatasi lea o ositaulaga ma le ʻau sa Levī, ua faapea atu iā i latou: “Ia outou ō atu i aai o Iuta ma ao mai tupe mai iā Isaraelu uma, ina ia toe faaleleia ai le fale o lo outou Atua+ mai i lea tausaga i lea tausaga; ma ia vave ona outou gaoioi e fai le galuega.” Ae e leʻi vave ona gaoioi le ʻau sa Levī.+
6 Ua aami e le tupu le ositaulaga sili o Ioiata ma faapea atu iā te ia:+ “Aiseā ua e lē poloaʻi atu ai i le ʻau sa Levī ina ia aumai mai i Iuta ma Ierusalema, lafoga paia a le faapotopotoga o Isaraelu na faatonuina e Mose+ le auauna a Ieova, mo le faleʻie o le atolaau o le feagaiga?*+
7 Auā ua osofaʻia e le fanau a Atalia+ le fafine amioleaga le fale o le Atua moni,+ ma ua latou ofoina atu iā Paala mea paia uma o le fale o Ieova.”
8 Ona faia lea o se pusa+ ma tuu i fafo o le faitotoʻa o le fale o Ieova,+ e tusa ai ma le faatonuga a le tupu.
9 Ona auina atu lea o se feʻau i Iuta uma ma Ierusalema, ina ia aumai iā Ieova le lafoga paia+ na faatonuina e Mose le auauna a le Atua moni mai iā Isaraelu, a o iai i le toafa.
10 Ua olioli perenise uma ma le nuu uma,+ ma na latou aumaia pea tupe ma lafo i totonu o le pusa, seʻia oo ina tumu.*
11 O so o se taimi e aumaia ai e le ʻau sa Levī le pusa i le tupu, ma ua latou vāai ua matuā tele tupe o loo iai, ona ō mai lea o le failautusi a le tupu ma lē e fesoasoani i le ositaulaga sili, ua la sasaa le pusa+ ma toe faafoʻi i lona tulaga. O le mea lenā na latou faia i lea aso ma lea aso, ma ua tele foʻi tupe na latou aoina mai.
12 Ona tuuina atu lea e le tupu ma Ioiata o le tupe i ē e vaavaaia le galuega o le auaunaga o le fale o Ieova, ma ua latou totogiina ē e tipiina maa ma tufuga e toe faafouina le fale o Ieova,+ faapea le ʻaufaigaluega i uʻamea ma ʻapamemea ina ia toe faaleleia le fale o Ieova.
13 Ua amata le galuega e ē na vaavaaia le galuega, ma ua alualu i luma le toe faaleleia o le fale i lalo o la latou vaavaaiga. Ua latou toe faaleleia le fale o le Atua moni e pei o lona fausaga e tatau ona iai, ma ua latou faamalosia foʻi le fale.
14 Ina ua māeʻa la latou galuega, ona latou aumaia lea i le tupu ma Ioiata o le tupe na totoe, ma ua latou faaaogā foʻi e faia ai ipu mo le fale o Ieova, o ipu mo le auaunaga ma le ofoina atu o taulaga, o ipu tī, o ipu auro ma ipu siliva.+ Ua latou ofoina atu fo‘i e lē aunoa taulaga mū+ i le fale o Ieova i aso uma o Ioiata.
15 Ina ua toeaina lava Ioiata ma faamalieina o ia i le olaga, ona oti ai lea o ia; e 130 ona tausaga ina ua oti o ia.
16 Ua latou tanu o ia i le Aai a Tavita faatasi ma tupu,+ auā na ia faia mea lelei i Isaraelu,+ mo le Atua moni ma Lona fale.
17 Ua mavae le maliu o Ioiata, ona ō mai lea o perenise o Iuta ma ifo i le tupu. Ua faalogo atu foʻi le tupu iā i latou.
18 Ua latou tuua le fale o Ieova le Atua o o latou augātamā, ae auauna atu i pou paia* ma tupua, ona oo mai ai lea o le toʻasā o le Atua* iā Iuta ma Ierusalema ona o a latou agasala.
19 Na aauina atu pea e Ieova perofeta iā i latou ina ia latou toe foʻi mai iā te ia, ma na lapataʻia pea i latou e perofeta ae na latou mumusu e faalogo.+
20 Ua iai le agaga o le Atua iā Sakaria le atalii o Ioiata+ le ositaulaga, ona ia tulaʻi lea i luma o le nuu ma faapea atu iā i latou: “O le mea lenei na fetalai mai ai le Atua moni, ‘Aiseā ua outou solia ai poloaʻiga a Ieova? E tou te lē taulau lava! Talu ai ua outou tuua Ieova, o le mea lea o le a ia tuua ai foʻi outou.’”+
21 Ae ua latou fouvale iā te ia+ ma fetogi o ia i maa i le lotoā o le fale o Ieova,+ e tusa ai ma le poloaʻiga a le tupu.
22 Ua lē manatua e le tupu o Ioasa le alofa faamaoni na faaali atu e Ioiata le tamā o Sakaria iā te ia, ae ua ia fasiotia le atalii o Ioiata o lē na faapea ane ina o le a oti: “Ia faasalaina oe e Ieova ona o le mea ua e faia.”+
23 I le amataga o le tausaga na sosoo ai, na siitaua mai ai iā Ioasa le ʻautau a Suria, ma ua latou osofaʻia Iuta ma Ierusalema.+ Ona latou fasiotia lea o perenise+ uma o le nuu, ma ua latou auina atu i le tupu o Tamaseko mea uma na latou vetea.
24 Auā e ui ina toʻaitiiti le aofaʻi o le ʻautau a Suria na osofaʻi mai, ae na tuuina atu e Ieova i o latou lima le ʻautau e matuā toʻatele+ a Iuta, auā ua latou tuua Ieova le Atua o o latou augātamā; ua faaoo foʻi e tagata Suria le faasalaga iā Ioasa.
25 Ina ua latou ō ese mai iā te ia (auā na latou tuua o ia ua matuā faamanu‘alia*), ona fouvale lea o ana auauna iā te ia ona o lona faamasaaina o le toto o atalii* o Ioiata+ le ositaulaga. Ua latou fasiotia o ia i luga o lona moega+ ma ua oti ai. Ona latou tanu lea o ia i le Aai a Tavita,+ ae e latou te leʻi tanuina o ia i fanuatanu o tupu.+
26 O i laʻua nei na fouvale+ iā te ia: o Sapata le tama a Semea le fafine Amonī, ma Iosapa le tama a Someri le fafine Moapi.
27 O tala e faatatau i ona atalii, o le tele o feʻau faafaamasinoga e faatatau iā te ia,+ ma le toe faaleleia* o le fale o le Atua moni,+ ua tusia ia i faamaumauga i le Tusi o Tupu. Ona avea lea o Amasia lona atalii ma tupu e sui iā te ia.
Faamatalaga Pito i Lalo
^ Pe atonu “seʻia oo ina uma mai i latou.”
^ Tagaʻi i le Uiga o Upu.
^ Epe., “ona iai lea o le toʻasā.”
^ Po o le “ma le tele o maʻi.”
^ Po o “o le atalii.” Atonu o loo faaaogā i le gagana Eperu le numera tele e faailoa mai ai le tāua o Sakaria le atalii o Ioiata.
^ Epe., “le faavaeina.”
