O le Tusi Lona Lua o Nofoaiga a Tupu 25:1-28
25 E 25 tausaga o Amasia ina ua avea o ia ma tupu, ma e 29 tausaga na ia pule ai mai i Ierusalema. O le igoa o lona tinā, o Ioatana mai i Ierusalema.+
2 Na ia faia pea mea ua tonu i le silafaga a Ieova, ae e leʻi faia ma lona lotoatoa.
3 Ina ua ia faatumauina lana pule i le malo, ona ia fasiotia loa lea o ana auauna na fasiotia lona tamā le tupu.+
4 Ae e na te leʻi fasiotia a latou fanau, auā na ia faia e tusa ai ma le mea ua tusia i le Tulafono, i le tusi a Mose lea na poloaʻi mai ai Ieova, e faapea: “Aua neʻi feoti tamā e sui ai atalii, aua foʻi neʻi feoti atalii e sui ai tamā; ae e taʻitasi le tagata ma oti ona o lana lava agasala.”+
5 Ona faapotopoto faatasi lea e Amasia o Iuta, ma faatonu i latou ina ia tutū e tusa ai ma aiga o tamā, o taʻitaʻi o le taʻitoʻaafe, ma taʻitaʻi o le taʻitoʻaselau o Iuta uma ma Peniamina.+ Ua ia lesitala i latou e taʻi 20 tausaga ma matutua atu,+ ma o le aofaʻi o tane na ia lesitalaina mo le ʻautau, e toʻa 300,000 tane ua toleniina* o ē e aveina tao ma talipupuni tetele.
6 Ua ia totogi foʻi tagata totoa malolosi e toʻa 100,000 mai i le ‘autau a Isaraelu i taleni* siliva e 100, ina ia ʻau faatasi ma ia.
7 Ae ua sau se tagata o le Atua moni iā te ia, ua faapea atu: “Le tupu e, aua neʻi outou ō faatasi ma le ʻautau a Isaraelu, auā e lē o faatasi Ieova ma Isaraelu,+ e lē o faatasi ma le fanauga uma a Efaraima.
8 Ae ia alu na o oe, ia e gaoioi ma ia e lototele i le taua. Auā a leai, e mafai ona faatoʻilaloina oe e le Atua moni i luma o le fili, auā e iai le mana i le Atua e fesoasoani+ ai ma faatoʻilaloina ai.”
9 Ona faapea mai lea o Amasia i le tagata o le Atua moni: “Ae e faapefea taleni e 100 ia na ou avatu i le ʻautau a Isaraelu?” Ua faapea atu le tagata o le Atua moni: “E mafai lava e Ieova ona foaʻi mai iā te oe mea e sili atu nai lo o lenā.”+
10 Ona vavaeese lea e Amasia o le ʻautau na ō mai iā te ia mai i Efaraima, ma aauina atu i lo latou nuu. Ae ua matuā feita i latou iā Iuta, ona latou toe foʻi lea i lo latou nuu ma le feita tele.
11 Ua lototele Amasia ma ua ia taʻitaʻia lana ʻautau ma ō atu i le vanu o Masima,+ ma ua ia fasiotia tane o Seira e toʻa 10,000.+
12 Ae e toʻa 10,000 na puʻe ola e tane o Iuta. Ona latou ave lea o i latou i le tumutumu o le papa, ma lafo ifo i latou mai i le tumutumu o le papa, ma ua pāpā ai i latou uma.
13 A o fitafita o le ‘autau na toe faafoʻi e Amasia mai i le ō atu ma ia i le taua,+ ua latou osofaʻia aai o Iuta, e amata mai i Samaria+ e oo i Pete-orana;+ ua latou fasiotia le toʻa 3,000 o i latou ma faoa foʻi le tele o mea.
14 Ae ina ua toe foʻi mai Amasia mai i le fasiotiga o tagata Etoma, ona ia aumaia lea o atua o le fanauga a Seira ma faatutū e fai ma ona atua,+ ua ia ifo foʻi i ai ma faamū i ai taulaga.
15 Ona matuā toʻasā lea o Ieova iā Amasia, ua ia auina atu iā te ia se perofeta ma faapea atu: “Aiseā ua e tapuaʻi ai i atua o le nuu, o ē e leʻi laveaʻia o latou lava tagata mai i lou lima?”+
16 A o fai atu le perofeta iā te ia, ae fai mai le tupu: “Pe na matou tofia ea oe e avea o se faufautua a le tupu?+ Tuu ia. Aiseā o le a latou fasiotia ai oe?”+ Ona tuu lea o le tala a le perofeta, ae ua ia toe faapea atu: “Ua ou iloa lava ua finagalo le Atua e faaumatia oe, auā ua e faia lenei mea ma ua e lē faalogo i laʻu fautuaga.”+
17 Ina ua uma ona talatalanoa Amasia le tupu o Iuta ma ana faufautua, ona ia auina atu lea o se feʻau iā Ioasa le tupu o Isaraelu, le atalii o Ioasasa le atalii o Ie‘u, e faapea: “Inā sau ia e ta te tau.”*+
18 Ae ua auina mai e Ioasa le tupu o Isaraelu se feʻau iā Amasia le tupu o Iuta, ua faapea mai: “Na auina atu e le vao tuitui i Lepanona se feʻau i le laau o le arasi i Lepanona, ua faapea atu: ‘Inā aumaia lou afafine i loʻu atalii e fai ma ana avā.’ Peitaʻi, na ui ane se manufeʻai o le vao sa i Lepanona ma soli le vao tuitui.
19 Ua e faapea ifo, ‘Faauta! Ua ou* fasia Etoma.’+ O lea ua faamaualuga ai lou loto ma e manaʻo ai e viia oe. O lea, ia e nofo pea i lou fale. Aiseā e te faatupuina ai mala ma e paʻū ai, faatasi ma Iuta o loo iā te oe?”
20 Ae e leʻi faalogo Amasia,+ auā e mai i le Atua moni lenei mea ina ia tuuina atu ai i latou i lima o le fili,+ ona sa latou tapuaʻi i atua o Etoma.+
21 Ona alu aʻe lea o Ioasa le tupu o Isaraelu, ua la tau ma Amasia le tupu o Iuta i Pete-semesa,+ le aai o Iuta.
22 Ua faatoʻilaloina Iuta e Isaraelu, ma ua taʻitasi le tagata ma sola i lona fale.*
23 Ua puʻea foʻi i Pete-semesa e Ioasa le tupu o Isaraelu, o Amasia le tupu o Iuta, le atalii o Ioasa, o le atalii o Ioasasa.* Ona aumaia lea e Ioasa o Amasia i Ierusalema, ma ua ia faaleagaina le pā o Ierusalema, e amata mai i le Faitotoʻa o Efaraima+ e oo atu i le Faitotoʻa o le Tulimanu,+ e 400 kupita.*
24 Ua ave foʻi e Ioasa auro ma siliva uma, o mea uma na maua i le fale o le Atua moni ia sa vaavaaia e Opete-etoma, o ʻoa i le fale o le tupu,+ ma ē na ave faamalosia. Ona toe foʻi atu lea o Ioasa i Samaria.
25 E 15 tausaga na ola ai pea Amasia+ le atalii o Ioasa le tupu o Iuta, ina ua oti Ioasa+ le atalii o Ioasasa le tupu o Isaraelu.+
26 A o le olaga uma o Amasia, e mai i le amataga seʻia oo i le faaiʻuga, po ua lē o tusia ea i le Tusi o Tupu o Iuta ma Isaraelu?
27 E mai i le taimi na liliuese ai Amasia mai i le mulimuli atu iā Ieova, na latou faufau+ ai i Ierusalema e foua o ia. Ona sola lea o ia i Lakisa, ae ua latou aauina atu nisi e tuliloa o ia i Lakisa, ma ua fasiotia ai o ia i inā.
28 Ua latou ave o ia i solofanua, ma tanu faatasi ma ona augātamā i le aai o Iuta.
Faamatalaga Pito i Lalo
^ Epe., “filifilia.”
^ Po o le “feiloaʻi.”
^ Epe., “Ua e.”
^ Epe., “faleʻie.”
^ E igoa foʻi iā Aasaia.
