O le Tusi Lona Lua o Nofoaiga a Tupu 26:1-23
26 Ona ave lea o Usia+ e le nuu uma o Iuta, o le taimi lenā ua 16 ona tausaga, ma ua latou fai o ia ma tupu e sui i lona tamā o Amasia.+
2 Ua ia toe fausia Elata+ ma toe faafoʻi mai iā Iuta, ina ua taoto le tupu* faatasi ma ona augātamā.+
3 E 16 tausaga o Usia+ ina ua fai o ia ma tupu, ma e 52 tausaga na pule ai o ia mai i Ierusalema. O le igoa o lona tinā o Iekalia mai i Ierusalema.+
4 Na faia pea e Usia mea ua tonu i le silafaga a Ieova, e pei lava ona faia e lona tamā o Amasia.+
5 Na auauna pea Usia i le Atua i aso o Sakaria, o lē na aʻoaʻoina o ia e mataʻu i le Atua moni. I aso na auauna ai o ia iā Ieova, na faamanuia+ ai o ia e le Atua moni.
6 Ua alu atu o ia ua tau ma Filisitia+ ma lepeti le pā o Kata,+ o le pā o Iapene,+ ma le pā o Asetota,+ ona ia fausia lea o aai i laueleele o Asetota ma Filisitia.
7 Na faaauau foʻi ona fesoasoani le Atua moni iā te ia e tau ma tagata Filisitia, o tagata Arapi+ na nonofo i Kuropaala, ma tagata Meunima.
8 Ua aumai e tagata Amonī+ meaalofa iā Usia. Ua lauiloa o ia e oo atu lava i Aikupito auā na malosi tele o ia.
9 E lē gata i lea, ua fausia e Usia ʻolo malolosi+ i Ierusalema i tafatafa o le Faitotoʻa o le Tulimanu,+ o le Faitotoʻa o le Vanu,+ ma le Tulimanu o le Pā.
10 Na ia fausia foʻi ʻolo+ i le toafa, ma eli* le tele o vaieli (auā na matuā tele ana lafumanu); na ia faia foʻi faapea i laufanua o Sefila* ma fanua laugatasi.* Na iai foʻi lana ʻaufaifaato‘aga ma ē e galulue vine i mauga ma i Karamelu, auā na fiafia o ia i le faia o faatoʻaga.
11 Na iai foʻi iā Usia se ʻautau ua faaauupegaina mo le taua, ma e latou te ō atu i taua i se auala maopoopo. Na faitauina i latou ma lesitalaina+ e Ieielu le failautusi+ ma Maaseia le leoleo, i le vaavaaiga a Hanania o se perenise a le tupu.
12 O le aofaʻiga atoa o alii sili o aiga o tamā na vaavaaia nei tagata totoa malolosi, e toʻa 2,600.
13 O le aofaʻi o i latou na iai i ʻautau na latou vaavaaia, e toʻa 307,500 tane ua nofosauni mo le taua, o se ʻautau malosi e fesoasoani i le tupu e tau ma ona fili.+
14 Na faaauupegaina e Usia le ʻautau atoa i talipupuni, o tao,+ o puloutau, o ofutau uʻamea,+ o ʻaufana, ma maatā.+
15 Ua ia faia foʻi i Ierusalema o masini tau, ia na faia e tagata inisinia; na tuu nei masini tau i luga o ʻolo+ ma tulimanu o le pā, ma e mafai ona fana ai aū ma maa tetele. Na lauiloa o ia i nofoaga mamao, auā na ia maua le tele o le fesoasoani ma na oo ina malosi ai o ia.
16 Peitaʻi, ina ua malosi o ia, ona faamaualuga lea o lona loto ma na iʻu ina malaia ai o ia. Ua ia gaoioi foʻi ma le lē faamaoni iā Ieova lona Atua, e ala i lona ulu atu i le malumalu o Ieova, ina ia faamū ai mea manogi i luga o le fata faitaulaga o mea manogi.+
17 Ona ulu atu foʻi lea o Asaraia le ositaulaga ma isi ositaulaga lototetele a Ieova e toʻa 80, e mulimuli atu iā Usia.
18 Ona latou tetee atu lea i le tupu o Usia ma faapea atu iā te ia: “Usia e, e lē tatau ona e faamū mea manogi iā Ieova!+ E na o ositaulaga e tatau ona faamūina mea manogi, auā o i latou na tupuga mai iā Arona,+ o ē ua faapaiaina. Ia e alu i fafo mai i le malumalu, auā ua e gaoioi ma le lē faamaoni, ma e leai se mamalu e tuuina atu e Ieova le Atua iā te oe.”
19 Ae ua matuā ita Usia a o i lona lima le ipu e faamū ai mea manogi; ma a o ita+ o ia i ositaulaga, ona sosolo lea o le lepela+ i lona muāulu i luma o ositaulaga i le fale o Ieova, i tafatafa o le fata faitaulaga o mea manogi.
20 Ina ua liliu atu Asaraia le ositaulaga sili ma ositaulaga uma iā te ia, vaai, ua taia o ia i le lepela i lona muāulu! Ona latou aveese faavave lea o ia mai i inā, ma ua faatopetope foʻi ona alu o ia i fafo, auā ua taia o ia e Ieova.
21 Ua avea pea le tupu o Usia ma lepela e oo lava i le aso na oti ai, ma sa nofo ese pea o ia i lona fale o se lepela,+ auā ua faateʻaeseina o ia mai i le fale o Ieova. A o Iotama lona atalii, na ia vaavaaia le aiga o le tupu ma faamasinoina tagata o le nuu.+
22 A o le olaga uma o Usia, e mai i le amataga seʻia oo i le faaiʻuga, na faamauina ia e le perofeta o Isaia+ le atalii o Amota.
23 Ona taoto lea o Usia faatasi ma ona augātamā, ma ua latou tanu o ia faatasi ma ona augātamā, ae i se fanua o tupu,* auā ua latou faapea ane: “O ia o le lepela.” Ona avea lea o Iotama+ lona atalii ma tupu e sui iā te ia.
Faamatalaga Pito i Lalo
^ E faasino atu i lona tamā o Amasia.
^ Po o “fanua maualuluga laugatasi.”
^ Po o le “tuʻi,” atonu e tuʻi papa.
^ Po o “le fanua maulalo.”
^ E foliga mai o lenei fanuatanu na lata ane i le fanuatanu o tupu.
