O le Tusi Lona Lua o Nofoaiga a Tupu 3:1-17
3 Ua amata ona fausia e Solomona le fale o Ieova+ i Ierusalema i le mauga o Moria,+ i le mea na faaali mai ai Ieova iā Tavita+ lona tamā, i le nofoaga na saunia e Tavita i le mea e soli ai saito a Oruna+ le tagata Iepusē.
2 Ua amata ona ia fausia le fale i le aso lona lua o le masina lona lua, i le tausaga lona fā o lana nofoaiga.
3 O le faavae na faia e Solomona mo le fale o le Atua moni, e 60 kupita lona umi, ma e 20 kupita lona lautele+ e tusa ai ma le umi o le kupita sa fuaina muamua ai.*
4 O le faapaologa sa i luma o le fale, e tutusa lona lautele ma le lautele o le fale e 20 kupita le umi, ma o lona maualuga e 20 kupita;* ma ua ia ufitia totonu o le fale i le auro māoʻi.+
5 Ua ia ufitia le fale tele i laupapa o le perosi, ona ia ufitia ai lea i le auro lelei,+ ma ia teuteuina i ata o laau o le pama+ ma filifili.+
6 Ua ia ufitia foʻi le fale i maa tāua matagofie,+ ma o auro+ na ia faaaogā o auro mai i Parovaima.
7 Ua ia ufitia foʻi i le auro le fale, o iviivi, o mea e ui atu ai, o ona puipui ma ona faitotoʻa;+ na ia vane ai foʻi i puipui ata o kerupi.+
8 Ua ia faia le potu* o le Mea e Sili Ona Paia,+ o lona umi e tutusa ma le lautele o le fale e 20 kupita, o lona lautele foʻi e 20 kupita; ona ia ufitia lea i le auro lelei e 600 taleni.*+
9 O le mamafa o le auro mo fao, e 50 sekeli;* ua ia ufitia foʻi potu pito i luga i le auro.
10 Ua ia faia foʻi i totonu o le potu* o le Mea e Sili Ona Paia ni kerupi se lua, ma ua ia ufitia kerupi i le auro.+
11 O le uumi o apaʻau o kerupi+ pe a tuufaatasi, e 20 kupita. O le tasi apaʻau o le kerupi muamua, e lima kupita le umi ma e paʻi atu i le puipui o le fale, a o le isi apaʻau e lima kupita le umi ma e paʻi atu i le apaʻau o le isi kerupi.
12 O le tasi apaʻau o le isi kerupi e lima kupita le umi ma e paʻi atu i le isi puipui o le fale, a o le isi apaʻau e lima kupita le umi ma e paʻi atu i le apaʻau o le kerupi muamua.
13 E 20 kupita e faaloloa atu ai apaʻau o nei kerupi; e tutū i o la vae ma e la te faasasaga i totonu.*
14 Ua ia faia foʻi le ʻie pupuni+ i le filo lanu moana, o le fulufulu mamoe lanu violē ma le mūmū sesega, ma le ʻie lelei, ma teuteuina i kerupi.+
15 Ona ia faia lea i luma o le fale o poutū e lua,+ e 35 kupita le uumi, ma o tumutumu o poutū taʻitasi, na iai ulupou e lima kupita.+
16 Ua ia faia foʻi filifili e pei o ni asoa ma faataamilo i ulupou, ua faia foʻi rimoni e 100 ma tuu i luga o filifili.
17 Ua ia faatutū foʻi poutū i luma o le malumalu, o le tasi i le itu taumatau* ma le isi i le itu tauagavale;* ua ia faaigoa le poutū sa i le itu taumatau o Iakinu,* a o le igoa o le isi sa i le itu tauagavale, o Poasa.*
Faamatalaga Pito i Lalo
^ E masani lava o le kupita e tusa ma le 44.5 senitimita, ae e manatu nisi o le “umi o le kupita sa fuaina muamua ai,” e faasino atu i le kupita umī lea e tusa ma le 51.8 senitimita. Tagaʻi i le Faa. E14.
^ O loo taʻua i isi manusikulipi e “120,” ae o loo taʻua i isi manusikulipi ma faaliliuga e “20 kupita.”
^ Epe., “fale.”
^ Epe., “fale.”
^ E faasino atu i le faasasaga agaʻi i le Mea Paia.
^ Po o “i le itu i saute.”
^ Po o le “itu i mātū.”
^ Lona uiga “Tau Ina ia Matuā Faamausalīina e Ia [e faasino atu iā Ieova].”
^ Atonu e uiga atu “I le Malosi.”
