O le Tusi Lona Lua o Nofoaiga a Tupu 34:1-33
34 E valu tausaga o Iosia+ ina ua fai o ia ma tupu, ma e 31 tausaga na pule ai o ia mai i Ierusalema.+
2 Na ia faia mea ua tonu i le silafaga a Ieova ma savali i ala o Tavita lona augātamā, e leʻi liliuese foʻi o ia i le itu taumatau po o le itu tauagavale.
3 I le tausaga lona valu o lana nofoaiga a o talavou lava o ia, na amata ai ona ia saʻili i le Atua o Tavita lona augātamā;+ ma i le tausaga lona 12, na amata ai ona ia faamamā mai i Iuta ma Ierusalema+ o mea maualuluga,+ o pou paia,* o faatusa ua tā,+ ma tupua uʻamea.
4 Ua latou talepe foʻi i lalo fata faitaulaga a Paala i ona luma, ma ua ia talepe i lalo fata faitaulaga e faamū ai mea manogi sa i luga aʻe o fata faitaulaga a Paala. Ua ia tuʻininiia pou paia,* o faatusa ua tā, ma tupua uʻamea, ma faaliuefuefu, ona lūlū lea i luga o fanuatanu o i latou sa fai taulaga atu i ai.+
5 Ua ia susunu foʻi ponaivi o ositaulaga i luga o fata faitaulaga sa latou fai taulaga ai.+ Ua ia faamamāina ai Iuta ma Ierusalema.
6 O aai foʻi o Manase, o Efaraima,+ o Simeona, e oo atu lava i Nafatali, ma nofoaga uma ua faatafunaina na siʻomia ai ia aai,
7 ua ia talepe ai i lalo fata faitaulaga, o pou paia,* ma faatusa ua tā,+ ua ia nutililiia ma faaliuefuefu; ua ia talepe foʻi i lalo fata faitaulaga uma e faamū ai mea manogi i le nuu atoa o Isaraelu,+ ona ia toe foʻi mai lea i Ierusalema.
8 I le tausaga lona 18 o lana nofoaiga, ina ua ia faamamāina le nuu ma le malumalu,* na ia auina atu ai Safana+ le atalii o Asalaia, o Maaseia le taʻitaʻi o le aai, ma Ioaa le atalii o Ioaasa o lē e faia faamaumauga, ina ia toe faaleleia le fale o Ieova lona Atua.+
9 Ua latou ō mai iā Hilikia le ositaulaga sili, ma avatu iā te ia tupe na aumaia i le fale o le Atua, ia na aoaoina e le ʻau sa Levī na leoleoina faitotoʻa, mai i ē na ō mai mai i Manase, o Efaraima, o ē uma na totoe o Isaraelu,+ faapea Iuta, o Peniamina, ma ē na nonofo i Ierusalema.
10 Ona tuuina atu lea o tupe iā i latou na tofia e vaavaaia le galuega i le fale o Ieova. Ona faaaogā lea o tupe e i latou na faia le galuega i le fale o Ieova, ina ia toe faaleleia ai le fale.
11 Ua latou tuu atu tupe i le ʻautufuga ma le ʻaukamuta, ina ia faatau mai ai maa ua tipiina, o laupapa e faia ai sooga, ma faia ai laau faalava mo fale na tuulafoa‘ia e tupu o Iuta, ma iʻu ai ina faaleagaina.+
12 Sa faamaoni tagata i le faia o le galuega.+ Na tofia Iata ma Opetaia o sa Levī mai i le fanauga a Merari+ e vaavaaia i latou, ma Sakaria ma Mesulama mai i le fanauga a Koato,+ e auauna o ni ovasia. A o le ʻau sa Levī uma, o ē e popoto i le tāina o meafaifaaili,+
13 ua latou vaavaaia o ē e faia galuega masani,* ma taʻimua i ē e faia le galuega mo auaunaga eseese; sa avea foʻi nisi o le ʻau sa Levī ma failautusi, o leoleo, ma leoleo faitotoʻa.+
14 A o latou ō atu e aumai tupe na avatu i le fale o Ieova,+ na maua ai e Hilikia le ositaulaga le tusi o le Tulafono a Ieova+ na tuuina mai e ala iā* Mose.+
15 Ona fai atu lea o Hilikia iā Safana le failautusi: “Ua ou maua le tusi o le Tulafono i le fale o Ieova.” Ona avatu lea e Hilikia o le tusi iā Safana.
16 Ona aumai ai lea e Safana le tusi i le tupu, ma faapea mai iā te ia: “O mea uma ua tofia i ai au auauna, ua latou faia lava.
17 Ua latou aoina* tupe na maua i le fale o Ieova, ma ua latou tuuina atu i ē ua tofia ma ē o loo faia le galuega o le fale.”
18 Ua fai mai fo‘i Safana le failautusi i le tupu e faapea: “E iai se tusi na aumai e Hilikia le ositaulaga iā te aʻu.”+ Ona faitau atu lea e Safana o le tusi i luma o le tupu.+
19 Ina ua faalogo le tupu i upu o le Tulafono, ona ia saeia loa lea o ona ofu.+
20 Ua poloaʻi atu le tupu iā Hilikia, o Aikamo+ le atalii o Safana, o Apetonu le atalii o Mika, o Safana le failautusi, ma Asaia le auauna a le tupu e faapea:
21 “Inā ō ia ma fesili atu iā Ieova mo aʻu ma ē ua totoe i Isaraelu ma Iuta, e faatatau i upu o le tusi na maua; auā ua matuā tele le toʻasā o Ieova o le a oo mai iā i tatou, auā e leʻi tausia e o tatou augātamā le afioga a Ieova. E latou te le‘i faia mea uma o loo tusia i lenei tusi.”+
22 Ona ō atu lea o Hilikia faatasi ma i latou na aauina atu e le tupu iā Ulata le perofeta fafine.+ O ia o le avā a Saluma o lē e vaavaaia ofu,* o le atalii o Tikeva, le atalii o Areasa, ma sa nofo Ulata i Ierusalema i le itumalo lona lua; ona latou talanoa atu lea iā te ia i inā.+
23 Ua fai mai Ulata iā i latou: “O le mea lenei ua fetalai mai ai Ieova le Atua o Isaraelu, ‘Ia outou fai atu i le tagata na aauina mai outou iā te aʻu:
24 “O le mea lenei ua fetalai mai ai Ieova, ‘O le a ou faaoo atu puapuaga i luga o lenei nuu ma ē o loo nonofo ai,+ o mala uma ia o loo tusia i le tusi+ na latou faitauina i luma o le tupu o Iuta.
25 Talu ai ua latou tuua aʻu,+ ma faamū taulaga i isi atua ina ia o latou faatigā ai iā te aʻu+ i galuega uma a o latou lima, o le a oo atu ai loʻu ita tele i luga o lenei nuu, ma e lē toe tineia lava.’”+
26 Ae o le mea lenei e tou te fai atu ai i le tupu o Iuta o lē na aauina mai outou e fesili iā Ieova, “O le mea lenei ua fetalai mai ai Ieova le Atua o Isaraelu e tusa ma upu na e faalogo i ai:+
27 ‘Talu ai ua e agamalu ma ua e faamaulalo i luma o le Atua, i lou faalogo i ana upu e faatatau i lenei nuu ma ē o loo nonofo ai, ua e faamaulalo foʻi i oʻu luma ma ua e saeia ai ou ofu ma e tagi i oʻu luma, o lea ua ou faalogo ai iā te oe,+ ua fetalai mai ai Ieova.
28 O le mea lea ou te tuufaatasia ai oe ma ou augātamā,* o le a tanu fo‘i oe ma le filemu i lou tuugamau, ma e te lē vaai i puapuaga uma ou te aumaia i lenei nuu ma ē o loo nonofo ai.’”’”+
Ona latou taʻu mai lea o le tali i le tupu.
29 Ua alu atu le feʻau a le tupu, ma ua latou aami toeaina uma o Iuta ma Ierusalema.+
30 Ona alu aʻe lea o le tupu i le fale o Ieova, ua latou ō faatasi ma tagata uma o Iuta, o tagata o loo nonofo i Ierusalema, o ositaulaga, o le ʻau sa Levī, ma le nuu uma, o ē e matutua ma tamaiti. Ua ia faitauina upu uma o le tusi o le feagaiga na maua i le fale o Ieova,+ a o latou faalogologo i ai.
31 Ua tū le tupu i lona tulaga ma ua ia osia se feagaiga*+ i luma o Ieova, e mulimuli atu iā Ieova ma tausia ana poloaʻiga, o ana faamanatuga, ma ana tulafono ma le lotoatoa ma le ola atoa,+ e ala i le faia o upu o le feagaiga o loo tusia i lenei tusi.+
32 Ua ia faalaeiauina foʻi i latou uma na iai i Ierusalema ma Peniamina, ina ia tausia na mea. Ona gaoioi lea o i latou o loo nonofo i Ierusalema e tusa ma le feagaiga a le Atua, o le Atua o o latou augātamā.+
33 Ona aveesea lea e Iosia o mea inosia* uma mai i laueleele uma o Isaraelu,+ ma ua ia fesoasoani i tagata uma i Isaraelu ina ia auauna iā Ieova lo latou Atua. E latou te leʻi liliuese foʻi mai i le mulimuli atu iā Ieova le Atua o o latou augātamā, i aso uma o Iosia.
Faamatalaga Pito i Lalo
^ Tagaʻi i le Uiga o Upu.
^ Tagaʻi i le Uiga o Upu.
^ Tagaʻi i le Uiga o Upu.
^ Epe., “fale.”
^ Po o “ē e ave avega.”
^ Epe., “e ala i le lima o.”
^ Epe., “sasaa atu.”
^ E foliga mai na ia vaavaaia ofu o le ‘auositaulaga po o le tupu.
^ O se faaupuga faafatusolo lea mo le oti.
^ Po o le “ua ia faafouina le feagaiga.”
^ Po o “tupua.”
