O le Tusi Lona Lua o Nofoaiga a Tupu 8:1-18
8 E 20 tausaga na faia ai e Solomona le fale o Ieova ma lona lava fale.+
2 Ona toe fausia lea e Solomona o aai na tuuina atu e Hiramo+ iā te ia, ma faanonofo ai i inā le fanauga a Isaraelu.*
3 Ona alu atu lea o Solomona ma faatoʻilalo Amato-sopa.
4 Na ia toe fausia Tatemora i le toafa, ma fausia aai uma e teu ai oloa+ i Amato.+
5 Ua ia toe fausia foʻi Pete-orana i luga+ ma Pete-orana i lalo,+ e fai ma aai malupuipuia e iai pā, o faitotoʻa ma faamaufaalava,
6 faapea Paalata+ ma aai uma o Solomona e teu ai oloa, o aai uma o kariota,+ o aai mo tagata tiʻetiʻe solofanua, ma mea uma ua finagalo i ai Solomona e fausia i Ierusalema ma Lepanona, ma nuu uma na pule ai o ia.
7 A o tagata uma na totoe mai i tagata Hetī, o tagata Amorī, o tagata Perisē, o tagata Hivī, ma tagata Iepusē+ o ē e lē o ni Isaraelu,+
8 o a latou fanau na totoe i le nuu, o ē e leʻi faaumatia e le fanauga a Isaraelu,+ na faatonuina e Solomona e faia galuega mamafa seʻia oo mai i le aso nei.+
9 Ae ua lē faia e Solomona se tasi o le fanauga a Isaraelu o se pologa e faia ana galuega,+ auā o i latou o ana tagata tau, o taʻitaʻi o ona alii ave ʻau, ma alii e pule i ana kariota ma tagata tiʻetiʻe solofanua.+
10 E toʻa 250 alii na pule i pule lagolago a le tupu o Solomona, o fomeni na vaavaaia tagata.+
11 Ua ave aʻe foʻi e Solomona mai i le Aai a Tavita le afafine o Farao+ i le fale na ia faia mo ia,+ auā ua ia faapea ane: “E ui o ia o laʻu avā, ae e lē tatau ona nofo o ia i le fale o Tavita le tupu o Isaraelu, auā o mea ua aumai i ai le Atolaau a Ieova, o ni mea e paia.”+
12 Ona ofo atu lea e Solomona o taulaga mū+ iā Ieova, i le fata faitaulaga+ a Ieova sa ia faia i luma o le faapaologa.+
13 Ua faia foʻi e ia i aso taʻitasi e pei ona masani ai, o taulaga e tusa ma le poloaʻiga a Mose mo Sapati,+ o masina faatoʻā vaaia,+ ma tausamiga e tolu ua faatulaga e faia i le tausaga,+ o le Tausamiga o Falaoa e Lē Faafefeteina,+ o le Tausamiga o Vaiaso,+ ma le Tausamiga o Fale Lauvao.*+
14 Ua ia tofia foʻi vaega o ositaulaga+ i a latou auaunaga e tusa ma le poloaʻiga a Tavita lona tamā, ma le ʻau sa Levī i o latou tiute, e vivii+ ma auauna i luma o ositaulaga i aso taʻitasi e pei ona masani ai, ma ua tofia foʻi leoleo faitotoʻa i o latou vaega mo faitotoʻa eseese,+ auā o le poloaʻiga lea a Tavita le tagata o le Atua moni.
15 E leʻi liliuese foʻi i latou mai i le poloaʻiga a le tupu i ositaulaga ma sa Levī, e faatatau i so o se mataupu pe e faatatau i fale teuoloa.
16 O lea, na lelei ona faamaopoopoina galuega uma a Solomona, e amata mai i le aso na fai ai le faavae o le fale o Ieova+ seʻia oo ina uma le fale. Ona māeʻa ai lea o le fale o Ieova.+
17 Ona alu atu lea o Solomona i Esiokape+ ma Elata,+ i le matafaga i le nuu o Etoma.+
18 Ua auina mai e Hiramo+ iā te ia o vaa ma tautai e masani lelei i le sami, o loo taʻitaʻia mai e ana auauna. Ua latou ō faatasi ma auauna a Solomona i Ofeira,+ ma aumai mai i inā o taleni* auro+ e 450, ma aumai i le tupu o Solomona.+