O le Tusi Lona Lua o Samuelu 10:1-19
-
Manumalo iā Amoni ma Suria (1-19)
10 Mulimuli ane, ina ua oti le tupu o le fanauga a Amoni,+ ona pule ai lea o Anuni lona atalii e sui iā te ia.+
2 Ua faapea ane Tavita: “Ou te alofa faamaoni iā Anuni le atalii o Naasa, e pei ona alofa faamaoni o lona tamā iā te aʻu.” Ona aauina atu lea e Tavita o ana auauna e faamāfanafana iā te ia ona o lona tamā. Ae ina ua oo atu auauna a Tavita i le nuu o le fanauga a Amoni,
3 ona fai atu lea o ta‘ita‘i o le fanauga a Amoni iā Anuni lo latou alii: “E te manatu ea ua faaaloalo Tavita i lou tamā, ua ia aauina mai ai o ē e faamāfanafana iā te oe? Pe e lē māfua ea ona aauina mai e Tavita ana auauna iā te oe, ina ia vaavaai solo ma mataʻi le aai, ina ia faatoʻilaloina ai?”
4 Ona ave lea e Anuni o auauna a Tavita ma tafi itutasi a latou ʻava,+ ma selei o latou ofu e gata ifo i o latou nofoaga, ona aauina ese lea o i latou.
5 Ina ua taʻu atu lenei mea iā Tavita, ona ia aauina atu lea o ni tagata e faafetaiaʻi iā i latou, auā ua matuā māsiasi tamāloloa; ua faapea atu le tupu: “Ia outou nonofo i Ieriko+ seʻia toe tutupu a outou ʻava, ona outou foʻi mai ai lea.”
6 Ua iloa e tagata Amonī ua inosia e Tavita i latou, ona totogi lea e tagata Amonī o tagata Suria o Pete-reopa+ ma tagata Suria o Sopa+ ina ia ʻau ma i latou, e toʻa 20,000 fitafita e savavali; o le tupu o Maaka,+ e toʻa 1,000 tagata; ma e mai i Isetopa,* e toʻa 12,000 tagata.+
7 Ina ua faalogo i ai Tavita, ona ia aauina atu lea o Ioapo ma le ʻautau uma, ma ona tagata totoa e sili ona malolosi.+
8 Ua ō ane le fanauga a Amoni ma faapotopoto faatasi e tau i le faitotoʻa o le pā o le aai, a o tagata Suria o Sopa ma Reopa, faapea Isetopa* ma Maaka, ua na o i latou i le fanua.
9 Ina ua iloa atu e Ioapo ua osofa‘i mai le fili mai i ona luma ma ona tua, ona ia tofia lea o nisi o fitafita sili o Isaraelu, ma faapotopoto faatasi i latou e tau ma tagata Suria.+
10 A o isi na totoe o le nuu, ua ia tuuina atu i le taʻitaʻiga a* Apisai lona uso,+ ina ia faapotopoto faatasi e ia o i latou e faafetaiaʻi le fanauga a Amoni.+
11 Ona ia fai atu lea: “Afai e malolosi tele tagata Suria iā te aʻu, ona e sau lea e laveaʻi aʻu; ae afai e malolosi tele le fanauga a Amoni iā te oe, ona ou alu atu lea e laveaʻi oe.
12 Ia tatou faamalolosi ma lototetele+ mo o tatou tagata ma aai a lo tatou Atua; e faia lava e Ieova le mea e lelei i lana silafaga.”+
13 Ua ō atu Ioapo ma ona tagata e tau ma Suria, ona sosola ese ai lea o Suria mai i ona luma.+
14 Ua vāai atu le fanauga a Amoni ua sosola ese tagata Suria, ona latou sosola ai foʻi lea mai i luma o Apisai, ma ō atu i le aai. Mulimuli ane, ua toe foʻi mai Ioapo mai i le fanauga a Amoni, ua sau i Ierusalema.
15 Ina ua vāai atu tagata Suria ua faatoʻilaloina i latou e Isaraelu, ona latou toe faapotopoto faatasi lea.+
16 Ona aami lea e Atatesa+ o tagata Suria na i le vaipanoa o le Vaitafe,*+ ma ua latou ō mai i Ailama, faatasi ma Sopaka le taʻitaʻiʻau a Atatesa na taʻitaʻia i latou.
17 Ina ua taʻu mai iā Tavita le tala, ona ia vave faapotopoto lea o Isaraelu uma ma sopoʻia atu Ioritana, ua oo atu i Ailama. Ua faapotopoto faatasi foʻi tagata Suria e faafetaiaʻi iā Tavita, ona latou tau lea ma ia.+
18 Ona sosola lea o Suria mai i luma o Isaraelu; ua fasiotia foʻi e Tavita o tagata Suria e tau i kariota e toʻa 700, ma ē e tiʻetiʻe i solofanua e toʻa 40,000. Na ia fasia foʻi Sopaka lo latou taʻitaʻiʻau, ma ua oti ai o ia i inā.+
19 Ina ua iloa e tupu uma o ē e auauna iā Atatesa, ua faatoʻilaloina i latou e Isaraelu, ona latou faia loa lea o se leleiga ma Isaraelu ma auauna iā i latou;+ na fefefe foʻi tagata Suria e toe fesoasoani i le fanauga a Amoni.
Faamatalaga Pito i Lalo
^ Po o “i tagata o Topa.”
^ Po o “tagata o Topa.”
^ Epe., “i le lima o.”
^ E faasino atu i le vaitafe o Eufirate.
