O le Tusi Lona Lua o Samuelu 16:1-23
16 Ina ua sopo teisi atu Tavita i tala atu o le tumutumu o le mauga,+ ona sau ai lea o Sipa+ le auauna a Mefiposeta+ e faafeiloaʻi iā te ia, o loo aumai asini e lua ua uma ona faanofoa, ma i luga o asini o loo iai falaoa e 200, o keke vine e 100, o keke o fualaau ʻaina o le tau māfanafana* e 100, ma se fagu uaina lapo‘a.+
2 Ona faapea atu lea o le tupu iā Sipa: “Aiseā ua e aumaia ai nei mea?” Ae ua tali mai Sipa: “O asini e tiʻetiʻe ai le aiga o le tupu, o falaoa ma fualaau ʻaina o le tau māfanafana e aai ai tauleleʻa, ma le uaina e feinu ai ē e lē lavavā i le toafa.”+
3 Ua fai atu le tupu: “O fea o iai le atalii* o lou matai?”+ Ona fai mai lea o Sipa i le tupu: “O loo nofo o ia i Ierusalema; auā ua ia faapea mai, ‘O le asō e toe faafoʻisia mai ai iā te aʻu e le aiga o Isaraelu le pulega o le malo o loʻu tamā.’”+
4 Ona fai atu lea o le tupu iā Sipa: “Faauta! Ia fai mo oe mea uma a Mefiposeta.”+ Ona fai mai lea o Sipa: “Ou te ifo lava iā te oe. Tau ina ia e manatu mai pea iā te aʻu loʻu alii e, le tupu.”+
5 Ua oo atu le tupu o Tavita i Pauri, faauta! ua alu ane mai i inā se tagata o le aiga o Saulo, o Semi+ lona igoa, o le atalii o Kera, ua alu ane o ia ma fetuu iā Tavita.+
6 Ua ia fetogi Tavita i maa ma auauna uma a le tupu o Tavita, faapea le nuu uma ma tagata totoa sa i lona itu taumatau ma lona itu tauagavale.
7 O upu nei a Semi na fai a o fetuu atu: “Alu ese ia, alu ese ia, o oe le tagata ua nofosala i le toto, ma o oe o le tagata e leai se aogā!
8 Ua taui atu e Ieova iā te oe le toto uma ua e nofosala ai i le aiga o Saulo ina o fai oe ma tupu; ma ua tuuina atu foʻi e Ieova le tofi o le tupu i lima o lou atalii o Apisaloma. O lenei ua e puapuagatia, ona o oe o le tagata ua nofosala i le toto!”+
9 Ona fai mai lea o Apisai le tama a Seruia+ i le tupu: “Aiseā ua fetuu mai ai e lenā taʻifau mate+ loʻu alii le tupu?+ Faamolemole, tuu mai aʻu seʻi oʻu alu atu e vavaeese lona ulu.”+
10 Ae ua fai atu le tupu: “O le ā ea laʻu mea e fai iā te oulua le fanau a Seruia?+ Tuu ai pea o ia e fetuu mai,+ auā ua fetalai atu Ieova iā te ia,+ ‘Inā fetuu ia iā Tavita!’ O ai ea la e fai atu, ‘Aiseā ua e faia ai lenā mea?’”
11 Ua fai atu Tavita iā Apisai ma ana auauna uma: “O lenei, o loʻu lava atalii o lē na fanau mai i loʻu manava, o loo saʻili e fasioti iā te aʻu;+ ma ua sili atu nei la ona saʻili le tagata Peniamina+ e fasioti iā te aʻu! Tuu ai pea o ia e fetuu mai, auā ua fetalai atu Ieova iā te ia e faia faapea!
12 Atonu e silasila mai Ieova i oʻu puapuaga,+ ma toe faafoʻisia mai ai e Ieova iā te aʻu le lelei, nai lo o fetuu ua faia mai iā te aʻu i le asō.”+
13 Ona ō atu pea lea o Tavita ma ona tagata i le ala, a o savali atu Semi i le itu o le mauga lea e i tala ane o Tavita ina ia fetuu+ iā te ia, ma fetogi pea o ia i maa ma asu atu foʻi le tele o le pefu.
14 Ua taunuu le tupu ma le nuu uma sa iā te ia i le mea na ō i ai ma ua lē lavavā. Ona latou mālōlō ai lea i inā.
15 I le taimi lenā, ua ō atu ai i Ierusalema ia Apisaloma ma tagata Isaraelu uma na lagolagoina o ia; ua faatasi foʻi Aitofele+ ma ia.
16 Ina ua oo atu Usai+ le tagata Araki+ o le uō a Tavita iā Apisaloma, ona fai atu loa lea o Usai iā Apisaloma: “Ia soifua le tupu!+ Ia soifua le tupu!”
17 Ua fai mai Apisaloma iā Usai: “Po o lou alofa faamaoni ea lea i lau uō? Aiseā na e lē alu ai faatasi ma lau uō?”
18 Ae ua fai atu Usai iā Apisaloma: “E leai; o lē ua filifilia e Ieova ma lenei nuu ma tagata uma o Isaraelu, ou te ‘au faatasi ma ia, ou te nofo faatasi foʻi ma ia.
19 Ou te toe faapea atu, O ai ea ou te auauna i ai? Pe e lē o lona alo ea? E pei ona ou auauna i lou tamā, e faapea foʻi ona ou auauna iā te oe.”+
20 Ona faapea mai lea o Apisaloma iā Aitofele: “Inā fai mai ia sau fautuaga.+ O le ā se mea e tatou te faia?”
21 Ona fai atu lea o Aitofele iā Apisaloma: “Inā momoe ia ma palake a lou tamā,+ o ē na ia tuua e leoleoina le fale.+ Pe a faalogo foʻi Isaraelu uma ua e faia lenei mea e ʻinoʻino ai lou tamā iā te oe, ona faamalolosi ai lea o i latou uma o loo lagolagoina oe.”
22 Ona latou faatūina lea o se faleʻie mo Apisaloma i luga o le fale,+ ma ua alu ane Apisaloma ma momoe ma palake a lona tamā+ i luma o Isaraelu uma.+
23 O fautuaga a Aitofele+ sa fautua ai i na aso, sa manatu i ai o* afioga a le Atua moni. Sa faapena foʻi fautuaga uma a Aitofele iā Tavita ma Apisaloma.
Faamatalaga Pito i Lalo
^ Aemaise lava fua o mati ma atonu o fua o pama.
^ Po o le “atalii o le atalii.”
^ Po o le “sa peiseaʻī ua fesili atu se tagata i le.”
