O le Tusi Lona Lua o Samuelu 17:1-29
17 Ua fai atu Aitofele iā Apisaloma: “Faamolemole, seʻi oʻu filifilia ni tagata se toʻa 12,000, ma matou ō atu e tuliloa iā Tavita i le pō nanei.
2 Ou te alu atu iā te ia a o vaivai ma lē lavā,+ ma ou te faamata‘u iā te ia; ona sosola ese lea o le nuu uma ua iā te ia, ae ou fasia na o le tupu.+
3 Ona ou toe faafoʻisia mai lea o tagata uma iā te oe. O le toe foʻi mai o tagata uma, e faalagolago i le mea e tupu i le tagata o loo e saʻilia; ona filemu ai lea o tagata uma.”
4 Ua matuā tonu lava le upu i le manatu o Apisaloma, ma manatu o toeaina uma o Isaraelu.
5 Ae ua fai ane Apisaloma: “Faamolemole, inā valaau atu ia iā Usai+ le tagata Araki, seʻi o tatou faalogo i sana upu.”
6 Ona alu ane lea o Usai iā Apisaloma. Ua fai mai Apisaloma iā te ia: “O le fautuaga lenei a Aitofele. Pe e tatou te faia ea? Afai e leai, inā e fai mai ia.”
7 Ona fai atu lea o Usai iā Apisaloma: “E lē lelei le fautuaga a Aitofele e tusa ai ma lenei mea!”+
8 Ua fai atu Usai: “Ua e silafia lava o lou tamā ma ona tagata, o toa i latou,+ ua tigā foʻi o latou loto e pei o se pea fafine ua leiloloa lana toloa‘i i le fanua.+ O lou tamā foʻi o le tagata e tau,+ e lē moe o ia i le pō faatasi ma le nuu.
9 O loo lafi nei o ia i se ana* po o se isi nofoaga;+ ma afai e na te osofa‘i muamua mai, o le a salalau atu le tala e faapea, ‘Ua faatoʻilaloina le nuu o loo mulimuli atu iā Apisaloma!’
10 E oo lava i le tagata toa o lē e pei lona loto o le loto o le leona,+ e vaivai lava o ia ona o le fefe; auā ua iloa e Isaraelu uma o lou tamā o se tagata malosi,+ ma e totoa foʻi tagata uma o loo faatasi ma ia.
11 Ae ou te fautua atu: Ia faapotopoto mai iā te oe o Isaraelu uma, e amata mai i Tanu seʻia oo i Peresepa,+ e pei o le oneone o le sami lo latou toʻatele,+ ma ia e afio atu e ta‘ita‘ia i latou i le taua.
12 Po o fea lava e tatou te maua ai o ia, o le a tatou osofa‘ia o ia e pei o le totō ifo o le sau i le eleele; e leai fo‘i se tagata e tasi e totoe, o ia ma tagata uma ua iā te ia.
13 Ae afai e lafi o ia i se aai, ona ave lea e Isaraelu uma o maea i lenā aai, ma o le a tatou toso ifo lea aai i le vanu, seʻia leai lava se tamaʻi maa e totoe ai.”
14 Ona fai ane lea o Apisaloma ma tagata uma o Isaraelu: “E sili atu le fautuaga+ a Usai le tagata Araki nai lo o le fautuaga a Aitofele!” O Ieova lava ia na maumauaʻi* ia faalēaogāina le fautuaga lelei a Aitofele,+ ina ia faaoo ai e Ieova le mala iā Apisaloma.+
15 Mulimuli ane, ua fai atu Usai i ositaulaga o Satoka ma Aviata:+ “Na faapea ma faapea le fautuaga a Aitofele iā Apisaloma ma toeaina o Isaraelu, ae na faapea ma faapea laʻu fautuaga.
16 O lenei, ia auina faavave atu se feʻau iā Tavita ma lapataʻia o ia e faapea, ‘Aua e te nofo i le pō nanei i le toafa i vaega e sopo‘ia ai le vaitafe* o Ioritana, ae ia e sopo‘ia le vaitafe ina neʻi faaumatia le tupu ma le nuu uma o iā te ia.’”+
17 Na nonofo Ionatana+ ma Aimaasu+ i fafo atu o le aai, i Ene-rokelu,+ ina ia aua ai ne‘i vaaia i la‘ua e se tasi. O lea, ua alu atu ai se auauna teine ma taʻu atu iā i laʻua mea uma, ina ia la ō ai ma taʻu atu i le tupu o Tavita.
18 Ae ua iloa i laʻua e se tauleʻaleʻa ma ua ia taʻu atu iā Apisaloma. Ona la vave ō ese lea ma ō atu i le fale o se tamāloa i Pauri,+ o lē e iai se vaieli i lona lotoā. Ua la ō ifo i le vaieli,
19 ma ua ave e le avā a le tamāloa se ufiufi ma fofola i le gutu o le vaieli, ma faaputu ai fatu saito ua uma ona olo; e leʻi iloa foʻi e se tasi lea mea.
20 Ona ō atu lea o auauna a Apisaloma i le fale o le fafine, ma faapea atu iā te ia: “O fea o iai Aimaasu ma Ionatana?” Ua tali mai le fafine iā i latou: “O la ua ō atu aga‘i i le vaitafe.”+ Ua latou saʻili pea ae ua lē maua i laʻua, ona latou toe foʻi lea i Ierusalema.
21 Ina ua latou ō ese atu, ona la ō aʻe lea mai i le vaieli, ua ō ma taʻu i le tupu o Tavita e faapea: “Inā outou tutulaʻi ia ma sopoʻia faavave atu le vaitafe,” ona la ta‘u atu lea iā te ia o le fautuaga a Aitofele.+
22 Ona tulaʻi loa lea o Tavita ma tagata uma ua iā te ia, ua latou sopoʻia atu Ioritana. E malama aʻe le taeao, ua latou sopo uma atu i le isi itu o Ioritana.
23 Ua iloa e Aitofele e leʻi faia e pei ona ia fautua atu ai, ona ia faanofoa lea o le asini, ma alu atu i lona fale i lona aai.+ Ina ua uma ona ia avatu faatonuga i lona aiga,+ ona ia sisi lea o lona ua ma ua oti ai.+ Ua tanu o ia i le fanuatanu o ona augātamā.
24 O le taimi lea ua oo atu Tavita i Maanaima,+ ae ua sopoʻia atu e Apisaloma le vaitafe o Ioritana, faatasi ai ma tagata uma o Isaraelu sa iā te ia.
25 Ua tofia e Apisaloma Amase+ e pule i le ʻautau e suitulaga iā Ioapo;+ o Amase o le atalii o le tagata e igoa iā Ietera le Isaraelu, o lē na momoe ma Apikaila+ le afafine o Naasa, le uso o Seruia le tinā o Ioapo.
26 Ua tolauapi Isaraelu ma Apisaloma i le nuu o Kiliata.+
27 Ina ua taunuu Tavita i Maanaima, ona ō atu lea o Sopi le atalii o Naasa mai i Rapa+ o le fanauga a Amoni, o Makiro+ le atalii o Amueli mai i Lotapara, ma Pasili+ le tagata Kiliata mai i Rokeli,
28 ua avatu moega, o ipu, o ipu omea, o saito, o karite, o falaoamata, o saito tunu, o pi, o atasema, o saito tao,
29 o meli, o pata, o mamoe, ma sisi.* Na latou avatu nei mea uma mo Tavita ma tagata ua iā te ia e aai ai,+ auā ua latou faapea ane: “Ua fia aai tagata, ua lē lavavā ma ua fia feinu foʻi i le toafa.”+
Faamatalaga Pito i Lalo
^ Po o le “lua; mafa.”
^ Po o le “poloaʻi.”
^ Po o “i asaga.”
^ Epe., “suāsusu toʻa o povi.”