O le Tusi Lona Lua o Samuelu 19:1-43
19 Ua taʻu atu iā Ioapo e faapea: “O loo tagi le tupu ma faavauvau ona o Apisaloma.”+
2 Ua avea le manumalo* i lenā aso ma mea e faavauvau ai le ‘autau, auā ua latou faalogo ua faavauvau le tupu ona o lona atalii.
3 Ona toe fo‘i filemu atu lea o le ‘autau i le aai+ i lenā aso, e pei o ni tagata ua māsiasi ona ua sosola mai i le taua.
4 Ua ufiufi e le tupu ona fofoga, ma ua tagi leotele pea o ia: “Loʻu atalii e, Apisaloma! Apisaloma loʻu atalii e, loʻu atalii e!”+
5 Ona ulufale atu lea o Ioapo i le tupu, ua faapea atu: “Ua e faamāsiasi au auauna uma i le asō, o ē na laveaʻia lou ola i le aso nei, ma ola o ou atalii,+ o ou afafine,+ o au avā, ma au palake.+
6 Ua e alofa i ē e ita mai iā te oe ae ua e ʻinoʻino i ē e alolofa iā te oe; auā ua e faaalia mai i le asō, e leai se aogā o au ta‘ita‘i‘au ma auauna iā te oe, auā ou te mautinoa, pe ana ola Apisaloma ae matou feoti uma i le asō, semanū ua lelei lea iā te oe.
7 O lenei, inā tulaʻi ia ma alu atu e faamalosiau i* au auauna, auā ou te tautō iā Ieova, afai e te lē alu atu, e leai se tagata e toe nonofo ma oe i le pō nanei; ona sili atu lea ona leaga o lenei mea iā te oe, nai lo o mea leaga uma na oo iā te oe a o e tauleʻaleʻa e oo mai i le taimi nei.”
8 Ona tulaʻi lea o le tupu ma nofo i le faitotoʻa o le aai, ma ua taʻu atu foʻi i le nuu uma e faapea: “O loo nofo le tupu i le faitotoʻa.” Ona ō mai lea o le nuu uma i luma o le tupu.
A o tagata Isaraelu, ua taʻitasi ma sola i lona fale.+
9 Ona fefinaua‘i lea o tagata uma mai i ituaiga uma o Isaraelu, e faapea: “Na laveaʻiina i tatou e le tupu mai i o tatou fili,+ o ia foʻi na laveaʻiina i tatou mai iā Filisitia; a o lenei ua sola ese o ia mai i le nuu ona o Apisaloma.+
10 A o Apisaloma lea na tatou faauuina e pule iā i tatou,+ ua oti o ia i le taua.+ O lenei, aiseā ua outou lē faia ai se mea e toe faafoʻi mai ai le tupu?”
11 Ona avatu lea o le feʻau a le tupu o Tavita i ositaulaga o Satoka+ ma Aviata+ e faapea: “Ia oulua tautatala atu i toeaina o Iuta,+ ia faapea atu, ‘Aiseā ua tuai ai ona outou toe faafoʻi mai le tupu i lona fale, ae o lea ua oo atu upu a Isaraelu uma i le tupu i le mea o loo nofo ai?
12 O oʻu uso outou; o oʻu ivi ma aano* foʻi outou. Aiseā la ua outou faatuai ai ona toe faafoʻi mai le tupu?’
13 Ia oulua fai atu foʻi iā Amase,+ ‘Pe e lē o oe ea o oʻu ivi ma oʻu aano? Ia matuā faasala a‘u e le Atua,* pe afai e lē avea oe ma taʻitaʻiʻau o la‘u ʻautau e amata atu i le asō, nai lo o Ioapo.’”+
14 Ona faaliliuina lea e Tavita* o loto o tagata uma o Iuta e pei o se tagata e toʻatasi, ma ua latou auina atu le feʻau i le tupu: “Inā foʻi mai ia, o oe ma au auauna uma.”
15 Ona toe foʻi lea o le tupu, ma ua oo atu i Ioritana. Ua ō mai tagata o Iuta i Kilikala+ e faafetaiaʻi le tupu, ma avatu o ia i le isi itu o Ioritana.
16 Ona faavave ifo lea o Semi+ le tagata Peniamina mai i Pauri, o le atalii o Kera, ua ō ifo faatasi ma tagata o Iuta e faafetaiaʻi le tupu o Tavita,
17 ma sa faatasi ma ia o tagata e toʻa 1,000 mai i Peniamina. Na ō mai foʻi Sipa+ le auauna a le aiga o Saulo ma ona atalii e toʻa 15, ma ana auauna e toʻa 20, ua faavave ifo ma ua muamua taunuu i Ioritana, a o leʻi taunuu atu le tupu.
18 Ua ia* sopo ane i vaega e sopoʻia ai le vaitafe* ina ia avatu le aiga o le tupu i le isi itu, ma faia mea ua lelei i le finagalo o le tupu. A o Semi le atalii o Kera, ua ia faapaʻū faō i luma o le tupu, a o leʻi sopoʻia atu Ioritana.
19 Ona ia fai mai lea i le tupu: “Aua neʻi tauia mai e loʻu alii laʻu agasala, ma aua neʻi e manatua le mea sesē na faia e lau auauna,+ i le aso na maliu ese ai loʻu alii le tupu mai i Ierusalema. Aua foʻi neʻi teuina lenei mea i le finagalo o le tupu,
20 auā ua iloa lelei e lau auauna ua ou agasala; o lenei, ua ou sau muamua ai i le asō mai i le aiga uma o Iosefa, e alu ifo e faafetaiaʻi i loʻu alii le tupu.”
21 Ona tali vave atu lea o Apisai+ le tama a Seruia+ e faapea: “Pe e lē o le mea ea lea e tatau ai ona oti Semi, ona na ia fetuu i lē ua faauuina a Ieova?”+
22 Ae ua fai atu Tavita: “Le fanau e, a Seruia,+ o le ā la oulua aiā i lenei mea, ua oulua tetee mai ai iā te aʻu i le asō? Pe e fasiotia ea se tasi i Isaraelu i le asō? Po ou te leʻi iloa ea ua avea aʻu ma tupu o Isaraelu i le asō?”
23 Ua fai atu le tupu iā Semi: “E te lē oti lava.” Ona tautō lea o le tupu iā te ia.+
24 Ua alu ifo foʻi Mefiposeta+ le atalii o le atalii o Saulo, e faafetaiaʻi i le tupu. E na te leʻi fufuluina ona vae, pe seleina lana ʻavaaluga, pe tāina foʻi ona ofu mai i le aso na alu ese ai le tupu, seʻia oo i le aso na toe foʻi mai ai ma le filemu.
25 Ina ua sau o ia i* Ierusalema e faafetaiaʻi le tupu, ona fai atu lea o le tupu iā te ia: “Mefiposeta, aiseā na ta lē ō faatasi ai?”
26 Ua fai mai o ia: “Loʻu alii le tupu e, na ʻolegia aʻu e laʻu auauna.+ Auā na fai ane lau auauna, ‘Seʻi faanofoa le asini mo aʻu ina ia ou tiʻetiʻe ai, ma ō atu faatasi ma le tupu,’ auā ua pipili lau auauna.+
27 Ae ua ia faaleaga lau auauna i loʻu alii le tupu.+ A o loʻu alii le tupu, ua pei o se agelu a le Atua moni, o lea, ia e faia e tusa ma lou finagalo.
28 O aiga uma o loʻu tamā, na tatau ona feoti i loʻu alii le tupu, ae ua e tofia lau auauna e aai faatasi ma i latou e aai i lau laoai.+ O le ā ea se isi mea e tatau ai ona ou toe tagi atu ai i le tupu?”
29 Ae ua fai atu le tupu iā te ia: “Aiseā ua e tautala mai ai i na upu? Ua uma ona ou faia le faaiʻuga e te lua vaelua ma Sipa i le fanua.”+
30 Ona fai mai lea o Mefiposeta i le tupu: “Ave mea uma lava mo ia, auā o lea ua oo mai ma le filemu loʻu alii le tupu i lona fale.”
31 Ona alu ifo lea o Pasili+ le tagata Kiliata mai i Rokeli aga‘i i Ioritana, e momoli atu le tupu i Ioritana.
32 Ua toeaina lava Pasili, ua 80 ona tausaga; ma na ia saunia foʻi meaʻai mo le tupu a o nofo o ia i Maanaima,+ auā o Pasili o se tagata e mauʻoa tele.
33 Ona fai atu lea o le tupu iā Pasili: “Sau ta sopo faatasi atu ma aʻu, ona ou saunia lea o meaʻai e ta te aai faatasi ai i Ierusalema.”+
34 Ae ua fai mai Pasili i le tupu: “Pe e toe fia nisi aso* o totoe o loʻu ola, ou te alu aʻe ai faatasi ma le tupu i Ierusalema?
35 Ua 80 oʻu tausaga i le asō.+ Pe e mafai ea ona ou toe iloa se lelei ma se leaga? Pe e mafai ea e lau auauna ona iloa le tofo o mea e ʻai ma inu ai? Pe e mafai foʻi ona ou toe lagona le leo o tane ma fafine pepese?+ Aiseā ea e avea ai lau auauna o se avega mamafa i loʻu alii le tupu?
36 Le tupu e, e lē mana‘omia ona e tauia a‘u. Auā ua lava ma totoe mo a‘u le faaeaga o le momoli o le tupu i Ioritana.
37 Faamolemole, inā tuu mai ia o lau auauna e toe foʻi, ina ia ou oti i loʻu aai e latalata i le fanuatanu o loʻu tamā ma loʻu tinā.+ Ae o lau auauna lenei o Kimeama.+ Ia sopo atu o ia faatasi ma loʻu alii le tupu; ma ia e faia iā te ia le mea e lelei i lou finagalo.”
38 Ona fai atu lea o le tupu: “O le a ma sopo atu ma Kimeama, ma ou te faia iā te ia o mea ua e loto i ai; o mea uma foʻi e te talosaga mai ai, ou te faia lava mo oe.”
39 Ona sopoʻia atu lea e le nuu uma o Ioritana, ma ina ua maliu atu le tupu, ua sogi atu o ia iā Pasili+ ma faamanuia atu iā te ia, ona toe foʻi ai lea o Pasili i lona nuu.
40 Ina ua sopoʻia e le tupu le vaitafe e alu atu i Kilikala,+ na la ō atu faatasi ma Kimeama, atoa ma tagata uma o Iuta, ma le ʻafa o le nuu o Isaraelu, ua latou sopoʻia le vaitafe faatasi ma le tupu.+
41 Ona ō mai lea o isi tagata uma o Isaraelu i le tupu, ua latou faapea mai: “Aiseā na ave faananā ai oe e o matou uso, o tagata o Iuta, ma latou aumaia le tupu ma lona aiga uma, ma tagata uma o Tavita i le isi itu o Ioritana?”+
42 Ona tali atu lea o tagata uma o Iuta i tagata o Isaraelu: “Auā e matou te aiga ma le tupu.+ Aiseā ua outou feita ai i lenei mea? Po ua matou aai ea i ni meaʻai a le tupu, pe aumai foʻi se meaalofa iā i matou?”
43 Ae ua tali mai tagata o Isaraelu i tagata o Iuta, e faapea: “E sefulu o matou ituaiga, e sili atu la ona telē la matou aiā iā Tavita nai lo o outou. Aiseā la ua outou lē faaaloalo ai iā i matou, ma aiseā na lē muamua ai i matou e toe faafoʻi mai le tupu?” Ae ua sili atu ona malolosi* upu a tagata o Iuta, nai lo o upu a tagata o Isaraelu.
Faamatalaga Pito i Lalo
^ Po o le “faaolataga.”
^ Epe., “e tautala i loto o.”
^ Po o “oʻu aiga i le toto.”
^ Epe., “Ia faia e le Atua iā te aʻu, ma ia faaopoopo i ai.”
^ Pe atonu o Amase.
^ Pe atonu “latou.”
^ Po o le “i asaga o le vaitafe.”
^ Pe atonu “mai i.”
^ Epe., “aso o tausaga.”
^ Po o le “sili atu ona tugā.”
