O le Tusi Lona Lua o Samuelu 20:1-26
20 Sa iai se tagata Peniamina e faatupu vevesi e igoa iā Sepa,+ o le atalii o Pikeri; ua ili e ia le pū+ ma faapea atu: “E leai se aiā a Tavita iā i tatou, e lē o so tatou tofi foʻi le atalii o Iese.+ Isaraelu e, ia taʻitasi ma toe foʻi i ona atua!”*+
2 Ona lē toe mulimuli lea o tagata uma o Isaraelu iā Tavita, ae ua mulimuli atu iā Sepa le atalii o Pikeri;+ a o tagata o Iuta, ua tumau pea ona latou mulimuli i lo latou tupu mai i Ioritana e oo atu i Ierusalema.+
3 Ina ua alu atu Tavita i lona fale i Ierusalema,+ ona ia ave lea o palake e to‘asefulu na ia tuua e leoleoina le fale,+ ma tuu i se fale e leoleoina ai. Ua ia avatu pea meaʻai mo i latou, ae e leʻi alu ane o ia e momoe ma i latou.+ Ua leoleoina pea i latou seʻia oo i le aso na feoti ai, e pei o ni fafine ua oti a latou tane, e ui o loo ola pea le tane.
4 Ua fai atu le tupu iā Amase:+ “Ia faapotopoto faatasi mai tagata o Iuta iā te aʻu i aso e tolu, ma ia e iai foʻi ma oe i inei.”
5 Ona alu lea o Amase e faapotopoto mai Iuta; ae na tuai mai o ia e tusa ma le taimi na atofaina mo ia.
6 Ua fai atu Tavita iā Apisai:+ “E ono sili atu ni mea leaga e faia iā i tatou e Sepa+ le atalii o Pikeri, nai lo o Apisaloma.+ Ia e ave auauna a lou alii ma tuliloa iā te ia, ina ia lē maua e ia ni aai malupuipuia, ma sola ese atu ai mai iā i tatou.”
7 Ona ō ai lea o tagata o Ioapo,+ o tagata Kereti, o tagata Peleti,+ ma tagata malolosi uma, ua tuliloa atu iā te ia; ua latou ō atu mai i Ierusalema e tuliloa iā Sepa le atalii o Pikeri.
8 Ua latalata atu i latou i le maa tele o loo i Kipeona,+ ona latou fetaiaʻi ai lea ma Amase.+ Sa ofu Ioapo i lona ofutau, ma na fusia foʻi i lona sulugātiti le pelu o loo i lona faamoega. Ina ua alu ane o ia iā Amase, ona paʻū ese lea o lana pelu.
9 Ua fai atu Ioapo iā Amase: “Loʻu uso e, o ā mai oe?” Ona tago atu lea o le lima taumatau o Ioapo i le ʻava a Amase, e pei o le a sogi atu iā te ia.
10 A o Amase, ua lē manatu o ia i le pelu sa i le lima o Ioapo; ua tutu‘i e Ioapo iā te ia i le manava,+ ma masaa ai lona ga‘au i le eleele. E na te leʻi tutu‘i faalua foʻi iā te ia, auā na oti lava i le tutu‘i muamua. Ona tuliloa lea e Ioapo ma lona uso o Apisai, o Sepa le atalii o Pikeri.
11 Sa iai se tasi o tauleʻaleʻa a Ioapo na tū i tafatafa o le tino o Amase, ma faapea ane: “O so o se tasi e iai i le itu a Ioapo ma e ʻau ma Tavita, ia mulimuli atu o ia iā Ioapo!”
12 O le taimi lea ua lilofia Amase i le toto i le ogatotonu o le ala tele. Ina ua vaai atu le taule‘ale‘a ua tutū le nuu uma, ona ia aveese lea o le tino o Amase mai i le ala tele ma tuu i le fanua. Ua ia fofola i ona luga se ofu, ina ua vaai atu ua tutū tagata uma na ō aʻe iā te ia.
13 Ina ua ia aveese le tino o Amase mai i le ala tele, ona mulimuli atu lea o tagata uma iā Ioapo, e tuliloa iā Sepa+ le atalii o Pikeri.
14 Ua ui ane Sepa i ituaiga uma o Isaraelu, ua oo atu i Apela o Pete-maaka.+ A o tagata uma o Pikeri, ua latou faapotopoto faatasi ma mulimuli atu iā te ia.
15 Ua ō atu Ioapo ma ona tagata ma siʻosiʻo iā te ia i Apela o Pete-maaka, ma faia se mea maupu‘epu‘e i palapala ina ia mafai ai ona osofa‘ia le pā o le aai. Ua eli foʻi e tagata uma na iā Ioapo le pā, ina ia malepe ai.
16 Ona valaau mai lea o se fafine atamai mai i le aai: “Faalogo mai ia outou, faalogo mai ia! Faamolemole, seʻi fai atu iā Ioapo, ‘Ia faalatalata mai i nei, seʻi oʻu tautala atu iā te oe.’”
17 Ona faalatalata atu lea o ia i le fafine ma ua fai mai le fafine: “O oe ea o Ioapo?” Ona ia fai atu lea: “O lea lava.” Ua fai mai le fafine iā te ia: “Inā faalogo mai ia i upu a lau auauna.” Ona ia fai atu lea: “O lea ou te faalogo atu.”
18 Ua fai mai le fafine: “Sa masani ona latou faapea mai i aso anamua, ‘Ia latou fesili atu i Apela,’ ona latou faauma ai lea o le mataupu.
19 Ua fai aʻu ma sui o tagata filemu ma faamaoni i Isaraelu. Ua e saʻili e faaumatia se aai lea e pei o se tinā i Isaraelu. Aiseā e te faaumatia ai le tofi o Ieova?”+
20 Ona tali atu lea o Ioapo: “Ia matuā mamao lava iā te aʻu ona ou faaumatia ma faatamaʻia le aai.
21 E lē faapena le mataupu, ae o le tagata mai i le vaega maugā o Efaraima,+ o lona igoa o Sepa,+ o le atalii o Pikeri, ua fouvale o ia* i le tupu o Tavita. Ia outou aumai tau lava o ia iā te aʻu, ona ou alu ese ai lea mai i le aai.” Ona fai mai lea o le fafine iā Ioapo: “Faauta! O le a lafoina atu lona ulu iā te oe i luga o le pā!”
22 Ona alu lea o le fafine atamai ma tautala atu i le nuu uma, ona latou vavaeese lea o le ulu o Sepa le atalii o Pikeri, ma lafo atu iā Ioapo. Ua ili foʻi e Ioapo le pū, ona latou taapeape ai lea mai i le aai, ua taʻitasi ma alu i lona fale;+ ae ua toe foʻi Ioapo i Ierusalema i le tupu.
23 Ua pule Ioapo i ʻautau uma a Isaraelu;+ a o Penaia+ le atalii o Ioiata,+ ua pule i tagata Kereti ma tagata Peleti.+
24 Ua pule Aturamo+ i ē na aumai e faia galuega mamafa; ae ua avea Iosefatu+ le atalii o Ailuta ma lē e faia faamaumauga.
25 O Seva o le failautusi, a o Satoka+ ma Aviata+ o ositaulaga.
26 A o Ira le tagata Iairo na fai ma alii sili* a Tavita.
Faamatalaga Pito i Lalo
^ Pe atonu “i lona faleʻie.”
^ Epe., “ua sii aʻe lona lima.”
^ Epe., “fai ma ositaulaga.”
