O le Tusi Lona Lua o Samuelu 21:1-22
21 Sa iai se oge+ i aso o Tavita mo tausaga sosoo e tolu, ma ua fesili atu Tavita iā Ieova. Ona fetalai mai lea o Ieova: “Ua nofosala Saulo ma lona aiga i le toto, auā na ia fasiotia tagata Kipeona.”+
2 Ona aami lea e le tupu o tagata Kipeona+ ma talanoa atu iā i latou. (O tagata Kipeona, e lē o ni fanauga a Isaraelu, a o tagata Amorī+ na totoe; na tautō foʻi le fanauga a Isaraelu e faasaoina i latou,+ ae ua saʻili Saulo e fasia i latou, ona o lona maelega valea mo le fanauga a Isaraelu ma Iuta.)
3 Ua fai atu Tavita i tagata Kipeona: “O le ā se mea ou te faia mo outou, o le ā foʻi se mea ou te faia ai se togisala ina ia outou faamanuia mai ai i tagata* o Ieova?”
4 Ona fai mai lea o tagata Kipeona iā te ia: “E matou te lē mananaʻo i ni siliva po o ni auro+ mai iā Saulo ma lona aiga, e lē mafai foʻi ona matou fasiotia se tagata i Isaraelu.” Ona ia fai atu lea: “O mea uma e tou te fai mai ai, ou te faia lava mo outou.”
5 Ona latou fai mai lea i le tupu: “O le tagata na faaumatiaina i matou, ma faufau e aveesea i matou mai i le nonofo ai i so o se mea i le nuu o Isaraelu,+
6 ia tuuina mai iā i matou ni ona atalii se toʻafitu. E matou te faatautauina o latou tino oti+ i luma o Ieova i Kipea+ o Saulo, o lē na filifilia e Ieova e fai ma tupu.”+ Ona fai atu lea o le tupu: “Ou te avatua lava i latou.”
7 Peitaʻi, na alofa mutimutivale le tupu iā Mefiposeta+ le atalii o Ionatana, le atalii o Saulo, ona o le tautoga na faia i luma o Ieova, i le vā o Tavita ma Ionatana+ le atalii o Saulo.
8 Ua ave e le tupu Aremoni ma Mefiposeta, o le fanau tama e toʻalua a Risepa+ le afafine o Aia, lea na ia fanaua mai iā Saulo, ma le fanau tama e toʻalima a Mekala*+ le afafine o Saulo, lea na ia fanaua mai iā Atarielu+ le atalii o Pasili le tagata Meola.
9 Ona ia avatu lea o i latou i tagata Kipeona, ma ua latou faatautau o latou tino oti i le mauga i luma o Ieova.+ Na feoti faatasi foʻi le toʻafitu o i latou; na fasiotia i latou i uluaʻi aso o le seleselega, i le amataga o le seleselega o karite.
10 Ona ave lea e Risepa+ le afafine o Aia le ʻie talatala ma fofola i luga o le papa, i le amataga o le seleselega seʻia oo ina maligi ifo le timu mai i le lagi i o latou tino; e na te leʻi faataga foʻi manufelelei o le lagi e mālōlō ai i o latou luga i le ao, pe faalatalata mai fo‘i i ai manufe‘ai o le fanua i le pō.
11 Ona taʻu atu lea iā Tavita o le mea ua faia e Risepa le afafine o Aia, le palake a Saulo.
12 Ua alu atu Tavita ma ave ivi o Saulo ma ivi o lona atalii o Ionatana, mai i ta‘ita‘i* o Iapese-kiliata,+ o ē na gaoia i laʻua mai i le nofoaga faitele o Petesani, lea na faatautau ai e Filisitia i laʻua i le aso na fasia ai Saulo i Kilepoa e Filisitia.+
13 Ua ia ave aʻe mai i inā ivi o Saulo ma ivi o Ionatana lona atalii; ua latou ave aʻe foʻi ma ivi o tagata na faatautauina.+
14 Ona latou tanu lea o ivi o Saulo ma lona atalii o Ionatana i le nuu o Peniamina, i Sela+ i le tuugamau o Kiso+ lona tamā. Ina ua uma ona latou faia o mea uma na poloaʻi atu ai le tupu, ona faafofoga lea o le Atua i a latou talosaga mo le laueleele.+
15 Ua toe ō atu foʻi Filisitia e tau ma Isaraelu.+ Ona ō ifo lea o Tavita ma ana auauna faatasi ma ia e tau ma Filisitia, ae ua oo ina vaivai Tavita.
16 O Ise-penopa foʻi o lē na fanau mai iā Rafaimi,+ o le mamafa o lana tao ʻapamemea e 300 sekeli,*+ ma na faaauupegaina foʻi o ia i se pelu fou, na mafaufau e na te fasiotia Tavita.
17 Ona faavave atu lea o Apisai+ le tama a Seruia e fesoasoani iā Tavita,+ ma taia le Filisitia ma fasiotia ai o ia. O le taimi lenā, na tautō atu ai tagata o Tavita iā te ia, e faapea: “E lē tatau ona e toe alu ma i matou i le taua.+ E lē tatau ona e tineia le malamalama o Isaraelu!”+
18 Mulimuli ane, ona toe tau ai lea o le taua ma Filisitia+ i Kopa. Ona fasia ai lea e Sepekai+ le tagata Usa, o Sapa lea e fanau mai i le aiga o Rafaimi.+
19 Ua toe tau le taua ma Filisitia+ i Kopa, ona fasia lea e Eleana le atalii o Arioreki le Peteleema o Koliata le Kata, o lē e pei le telē o le ‘au o lana tao o le laau faalava a ē e lalaga ʻie.+
20 Ua toe tau foʻi le taua i Kata, sa iai le tagata tino ese e ta‘i 6 ona tamatama‘ilima, e ta‘i 6 foʻi ona tamatama‘ivae, e 24 le aofaʻiga; na fanau mai fo‘i o ia i le tagata Rafaimi.+
21 Ua faifai pea o ia iā Isaraelu.+ Ona fasiotia lea o ia e Ionatana le atalii o Semi,+ le uso o Tavita.
22 O i latou nei e toʻafā na fananau mai i le tagata Rafaimi i Kata; na fasiotia i latou i le lima o Tavita ma lima o ana auauna.+