O le Tusi Lona Lua o Samuelu 24:1-25
24 Ua toe tupu le toʻasā tele o Ieova iā Isaraelu,+ ina ua faaoso e se tasi Tavita* e faapea: “Alu ia inā faitau+ Isaraelu ma Iuta.”+
2 Ona fai atu lea o le tupu iā Ioapo+ le taʻitaʻi o le ʻautau na faatasi ma ia: “Faamolemole, seʻi e alu atu i ituaiga uma o Isaraelu, e amata mai i Tanu e oo i Peresepa,+ ma lesitala le nuu* ina ia ou iloa ai lo latou faitau aofaʻi.”
3 Ae ua fai mai Ioapo i le tupu: “Ia faatoʻateleina e Ieova lou Atua le nuu ia ta‘isautuaselau, a o silasila i ai loʻu alii le tupu. Aiseā la e manaʻo ai loʻu alii le tupu e faia lenei mea?”
4 Ae ua manumalo upu a le tupu iā Ioapo ma taʻitaʻi o le ʻautau. Ona ō atu ai lea o Ioapo ma taʻitaʻi o le ʻautau mai i luma o le tupu, e lesitala le nuu o Isaraelu.+
5 Ua latou sopoʻia Ioritana ma tolauapi i Aroeru,+ i le itu taumatau* o le aai o loo i le ogatotonu o le vanu,* ma ua latou agaʻi atu i Kato ma Iasaru.+
6 Mulimuli ane, ona latou oo atu lea i Kiliata+ ma le nuu o Tate-atesa, ua latou faaauau i Tanuiana ma ō atu faataamilo i Saitonu.+
7 Ona latou ō atu lea i le aai malupuipuia o Turo+ ma aai uma o tagata Hivī,+ ma tagata Kanana, ma faai‘u ai i Nekepi*+ o Iuta, i Peresepa.+
8 Ua latou ō atu i le nuu atoa, ma ua ō mai i Ierusalema i le faaiʻuga o masina e iva ma aso e 20.
9 Ona avatu lea e Ioapo i le tupu o le aofaʻiga o tagata na lesitala; e to‘a 800,000 tagata totoa o Isaraelu e iai a latou pelu, ae o Iuta e to‘a 500,000.+
10 Ae ua tuia le loto* o Tavita+ ina ua ia faitauina le nuu. Ona fai atu lea o Tavita iā Ieova: “Ua ou matuā agasala+ lava i le mea ua ou faia. O lenei, Ieova e, ia e faamagalo le sesē+ o lau auauna faamolemole; auā ua ou matuā valea ina ua ou faia o lenei mea.”+
11 Ina ua tulaʻi Tavita i le taeao, ona oo mai lea o le afioga a Ieova i le perofeta o Kato,+ o lē e faamatalaina faaaliga iā Tavita, ua faapea mai:
12 “Inā alu ia ma fai atu iā Tavita, ‘O le mea lenei na fetalai mai ai Ieova: “E tolu mea ou te tuuina atu iā te oe. Ia e filifili se mea e tasi ou te faia iā te oe.”’”+
13 Ona alu atu lea o Kato iā Tavita ma faapea atu: “O lē fea o mea nei e tolu e te filifilia: O le oo mai o le oge i lou nuu mo tausaga e fitu,+ o lou sola mai i luma o ou fili mo le tolu masina ae latou tuliloa iā te oe,+ po o le oo mai o se faamaʻi i lou nuu mo aso e tolu?+ O lenei, ia e mafaufau lelei po o le ā se upu ou te tali atu ai i Lē na auina mai aʻu.”
14 Ona fai mai lea o Tavita iā Kato: “Ua ou matuā mafatia lava. Ae faamolemole, aua ne‘i faasalaina i tatou e tagata,+ ae ia faasala i tatou e Ieova+ auā e tele lona alofa mutimutivale.”+
15 Ona tuuina mai lea e Ieova o le faamaʻi+ iā Isaraelu, e amata mai i le taeao seʻia oo i le taimi atofaina, ua feoti+ ai tagata e toʻa 70,000 mai i Tanu e oo atu i Peresepa.+
16 Ina ua faaloaloa atu e le agelu lona lima agaʻi i Ierusalema ina ia faaumatia ai, ona faanoanoa ai lea o Ieova ona o le malaia,+ ma ua ia fetalai atu i le agelu na faaumatiaina le nuu: “Ua lava lea! Ia taofi lou lima.” Sa latalata ane foʻi le agelu a Ieova i le mea e soli ai saito a Aruna+ le tagata Iepusē.+
17 Ina ua vaaia e Tavita le agelu na fasia le nuu, ona ia fai atu lea iā Ieova: “O aʻu na agasala ma faia le mea sesē; ae o le ā le mea ua faia e nei mamoe?+ Faamolemole, ia oo mai lou aao iā te a‘u ma le aiga o loʻu tamā.”+
18 Ona alu ane lea o Kato iā Tavita i lenā aso, ma faapea mai iā te ia: “Inā alu aʻe ia ma faatū se fata faitaulaga mo Ieova, i le mea e soli ai saito a Aruna le tagata Iepusē.”+
19 Ona alu aʻe lea o Tavita e pei o upu a Kato, e tusa ai ma le mea na poloaʻi mai ai Ieova.
20 Ina ua vaai ifo Aruna ma iloa atu le tupu ma ana auauna o loo ō mai iā te ia, ona faavave atu lea o Aruna i fafo ma ifo i le tupu, ua ia faapaʻū faō i le eleele.
21 Ua fai mai Aruna: “O le ā le mea ua maliu mai ai loʻu alii le tupu i lana auauna?” Ona fai atu lea o Tavita: “Ou te sau e faatau mai iā te oe le mea e soli ai saito, e fai ai se fata faitaulaga iā Ieova, ina ia taofia ai le faamaʻi mai i le nuu.”+
22 Ae ua fai mai Aruna iā Tavita: “Ia ave e loʻu alii le tupu lea mea, ma ofo atu le mea e lelei e tusa ma lona manatu.* O povi nei mo taulaga mū, faapea ma le laupapa e olo ai saito ma amo a povi e fai ai fafie.
23 Le tupu e, o nei mea uma e foaʻi atu e Aruna i le tupu.” Ona fai mai lea o Aruna i le tupu: “Tau ina ia finagalo malie mai Ieova lou Atua iā te oe.”
24 Peitaʻi, ua fai atu le tupu iā Aruna: “E leai, ou te faatauina lava mai iā te oe i se tau; ou te lē ofoina atu foʻi iā Ieova loʻu Atua ni taulaga mū e aunoa ma se tau.” Ona faatau mai lea e Tavita o le mea e soli ai saito ma povi, mo le 50 sekeli* siliva.+
25 Ona faia lea e Tavita i inā o le fata faitaulaga+ iā Ieova, ma ofo atu ai taulaga mū ma taulaga faifaatasi, ona faafofoga mai lea o Ieova i a latou talosaga mo le laueleele,+ ona taofia ai lea o le mala mai iā Isaraelu.
Faamatalaga Pito i Lalo
^ Po o le “ina ua faaosoosoina Tavita.”
^ E faasino atu i tane ua ausia tausaga e ō ai i le taua.
^ Po o “i le itu i saute.”
^ Po o le “ālia.”
^ Po o “le itu i saute.”
^ Po o le “lotofuatiaifo.”
^ Epe., “le mea e lelei i lana silafaga.”
