O le Tusi Lona Lua o Samuelu 4:1-12
4 Ina ua faalogo Iso-poseta le atalii o Saulo+ ua oti Apineru i Heperona,+ ona lotovaivai ai lea* ma ua matuā popole foʻi Isaraelu uma.
2 Sa iai i le atalii o Saulo o tagata e toʻalua o taʻitaʻi o ʻau e faoa mea, o le igoa o le tasi o Panaa, a o le isi o Rakapa. O i la‘ua o atalii o Rimoni le tagata Perota, o le ituaiga o Peniamina. (Auā sa avea fo‘i Perota+ o se vaega o Peniamina.
3 Na sosola atu tagata o Perota i Kitaima,+ ma aumau ai o ni tagata ese i inā e oo mai i le asō.)
4 Sa iā Ionatana+ le atalii o Saulo se atalii e pipili ona vae.+ E lima ona tausaga ina ua oo mai le tala e uiga iā Saulo ma Ionatana mai i Isereelu.+ Na ave o ia e lē na tausia o ia ma sola, ae a o sola o ia ona o le fefe, ona paʻū lea o le tama ma ua pipili ai. O lona igoa o Mefiposeta.+
5 Ua ō atu atalii o Rimoni le tagata Perota, o Rakapa ma Panaa, ua la oo atu i le fale o Iso-poseta ina ua vevela le aso, a o fai lana mālōlōga i le aoauli.
6 Ua la ō atu i totonu o le fale e peiseaʻī o loo ō atu e aumai ni saito, ma ua la tutuʻi i lona manava i le pelu; ona sosola ai lea o Rakapa ma lona uso o Panaa.+
7 Na la ō atu i le fale, a o taoto o ia i luga o lona moega i lona potumoe, ona la fasia lea o ia ma ua oti ai, ua la vavaeese lona ulu, ua la ō ma ave ma ua savavali i le pō atoa e agaʻi atu i le ala i Arapa.*
8 Ua la aumaia le ulu o Iso-poseta+ iā Tavita i Heperona, ua fai mai i le tupu: “O le ulu lenei o Iso-poseta le atalii o Saulo lou fili+ o lē na saʻili e fasioti iā te oe;+ o le asō ua tauimasui atu ai Ieova iā Saulo ma ana fanau, mo lo ma‘ua alii le tupu.”
9 Peitaʻi, ua tali atu Tavita iā Rakapa ma lona uso o Panaa, o atalii o Rimoni le tagata Perota, ua ia fai atu iā i laʻua: “Ou te tautō iā Ieova le Atua soifua, o lē na laveaʻiina aʻu mai i puapuaga uma,+
10 ina ua ta‘u mai e se tasi iā te aʻu e faapea, ‘O lea ua oti Saulo,’+ na manatu o ia ua ia aumaia se tala lelei, ae na ou tago atu ma fasioti o ia+ i Sekeleka. O le taui lenā na ia maua mai iā te a‘u!
11 Pe e lē sili ea ona leaga ina ua fasiotia e tagata leaga se tagata amiotonu i lona fale i luga o lona moega? Pe e lē tatau ea ona ou taui atu lona toto iā te oulua,+ ma soloiesea oulua mai i le laueleele?”
12 Ona faatonu lea e Tavita o tauleleʻa e fasioti i laʻua.+ Ua latou tipiesea o la lima ma o la vae, ma faatautau o la tino+ i tafatafa o le vai tāʻele i Heperona. Ua latou ave foʻi le ulu o Iso-poseta ma tanu i le fanuatanu o Apineru i Heperona.
