O le Tusi Lona Lua o Samuelu 5:1-25
5 Mulimuli ane, ona ō mai ai lea o ituaiga uma o Isaraelu iā Tavita i Heperona,+ ua faapea mai: “Faauta! O i matou nei o ou ivi ma ou aano.*+
2 A o fai Saulo ma o matou tupu i aso ua mavae, o oe lava na taʻitaʻiina Isaraelu i taua.*+ Na fetalai mai foʻi Ieova iā te oe, ‘O oe lava e te leoleoina loʻu nuu o Isaraelu, e avea foʻi oe ma taʻitaʻi iā Isaraelu.’”+
3 Ona ō mai lea o toeaina uma o Isaraelu i le tupu i Heperona, ma ua osia ai e le tupu o Tavita se feagaiga ma i latou+ i luma o Ieova i Heperona; ona latou faauuina lea o Tavita e fai ma tupu iā Isaraelu.+
4 E 30 tausaga o Tavita ina ua fai o ia ma tupu, ma e 40 tausaga+ na ia pule ai o se tupu.
5 Sa pule o ia o se tupu i Heperona iā Iuta mo tausaga e 7 ma masina e 6; ae i Ierusalema+ sa pule ai o ia o se tupu iā Isaraelu uma ma Iuta mo tausaga e 33.
6 Ona ō atu lea o le tupu ma ona tagata i Ierusalema e siitaua i tagata Iepusē+ sa nonofo i le nuu, ae ua latou faifai iā Tavita e faapea: “E te lē sao mai i inei! E oo lava i tagata tauaso ma pipili e latou te tuliesea oe.” Na latou manatu: ‘E lē taitai sao mai Tavita i inei.’+
7 Peita‘i, na faoa e Tavita le aai malosi o Siona, lea ua avea nei ma Aai a Tavita.+
8 Ona faapea ane lea o Tavita i lenā aso: “O i latou e fasia tagata Iepusē, e ao ona ui atu i le alāvai e fasia ‘tagata pipili ma tauaso’ o ē ua inosia e Tavita!” O le mea lea ua latou faapea ane ai: “E lē sau lava le pipili ma le tauaso i lenei fale.”
9 Ua nofo foʻi Tavita i le aai malupuipuia, lea ua faaigoa* o le Aai a Tavita; ona amata lea ona fausia e Tavita o pā ma isi fale i le Mea Maupuʻepuʻe*+ ma isi vaega o le aai.+
10 Ua faateleina pea le mamalu o Tavita,+ ma sa faatasi Ieova le Atua o ʻau ma ia.+
11 Ua aauina mai e Hiramo+ le tupu o Turo o avefeʻau iā Tavita, faapea foʻi laau o le arasi,+ o le ʻaukamuta, ma ē e atiina pā maa, ma ua latou fausia se fale mo Tavita.+
12 Ona iloa ai lea e Tavita ua matuā faatumauina e Ieova o ia e fai ma tupu iā Isaraelu,+ ma faaeaina lona malo+ ona o Lona nuu o Isaraelu.+
13 Ua faia foʻi e Tavita o nisi palake+ ma nisi avā i Ierusalema ina ua alu ese mai i Heperona; ua toe fanaua ai foʻi e Tavita nisi o atalii ma afafine.+
14 O igoa nei o i latou na fananau mai iā te ia i Ierusalema: O Samua, o Sopapa, o Natano,+ o Solomona,+
15 o Ivara, o Elisua, o Nefeku, o Iafia,
16 o Elisama, o Eliata, ma Elifaleta.
17 Ua faalogo Filisitia ua faauuina Tavita e fai ma tupu iā Isaraelu,+ ona ō aʻe ai lea o Filisitia uma e saʻili iā Tavita.+ Ina ua faalogo i ai Tavita, ona alu ifo lea o ia i le nofoaga e lafi ai.+
18 Ona ō atu lea o Filisitia ma feoaʻi solo i le vanu* o Rafaimi.+
19 Ua fesili atu Tavita iā Ieova:+ “Po ou te alu aʻe ea e tau ma Filisitia? Pe e te tuuina mai i latou i oʻu lima?” Ona fetalai mai lea o Ieova iā Tavita: “Inā alu aʻe ia, auā ou te tuuina atu lava Filisitia i ou lima.”+
20 Ona alu atu lea o Tavita i Paala-faresa, ma ua fasia ai e Tavita i latou i inā. Ua faapea ane o ia: “Ua muamua atu Ieova i o‘u luma e osofa‘ia o‘u fili,+ e pei o le oso mai o le vai.” O le mea lenā ua ia faaigoa ai lenā nofoaga o Paala-faresa.+
21 Ua tuua e Filisitia a latou tupua i inā, ona aveese ai lea e Tavita ma ona tagata.
22 Mulimuli ane, ua toe ō aʻe Filisitia ma feoaʻi solo i le vanu* o Rafaimi.+
23 Ona fesili atu lea o Tavita iā Ieova, ae ua fetalai mai o Ia: “Aua e te alu atu sa‘o iā i latou, ae ia e taamilo atu i o latou tua, ma ia e osofa‘ia i latou i luma mai o vao peka.
24 Pe a e faalogo i le pa‘ō o le savavali i tumutumu o vao peka, ona e gaoioi vave lea, auā o le taimi lenā ua muamua atu ai Ieova i ou luma e fasia le ʻautau a Filisitia.”
25 Ona faia lea e Tavita e pei ona poloaʻi mai ai Ieova iā te ia, ma ua ia fasia Filisitia+ e amata mai i Kepa+ e oo atu i Kasera.+
Faamatalaga Pito i Lalo
^ Po o “ou aiga i le toto.”
^ Epe., “e taʻitaʻiina atu i fafo ma toe taʻitaʻiina mai i totonu Isaraelu.”
^ Pe atonu “ma ua ia faaigoaina.”
^ Po o le “Milo.” O se upu Eperu o lona uiga o le “faatumu.”
^ Po o “le fanua laugatasi.”
^ Po o “le fanua laugatasi.”