O le Tusi Lona Lua o Samuelu 6:1-23
6 Ua toe faapotopoto uma e Tavita fitafita sili i Isaraelu, e toʻa 30,000.
2 Ona tulaʻi lea o Tavita ma tane uma na iā te ia, ua ō atu i Paala-iuta e ave aʻe mai i inā le Atolaau a le Atua moni,+ lea e valaau ai tagata i le suafa o Ieova o ʻau,+ o lē e afio i luga* o kerupi.+
3 Ae ua latou faaee le Atolaau a le Atua moni i luga o le taavale toso fou,+ ina ia o latou ave aʻe ai mai i le fale o Apinatapa,+ lea e i luga o le aʻega. Na taʻitaʻia foʻi le taavale toso fou e Usa ma Aio, o atalii o Apinatapa.
4 Ona latou ave aʻe lea o le Atolaau a le Atua moni mai i le fale o Apinatapa lea e i luga o le aʻega; ua muamua atu foʻi Aio i luma o le Atolaau.
5 Ua fiafia Tavita ma le aiga uma o Isaraelu i luma o Ieova, ua latou tāina foʻi meafaifaaili eseese e fai mai i le laau o le perosi, o kitara,* o meafaifaaili e iai uaua,+ o topa,*+ o mea lūlū tagitagi, ma sumepalo.*+
6 Ae ina ua latou oo i le mea e soli ai saito a Nakano, ona aapa atu lea o le lima o Usa ma taofi+ le Atolaau a le Atua moni, auā na toetoe lava mafuli le taavale toso ona o povi.
7 Ona matuā toʻasā ai lea o Ieova iā Usa, ua fasia o ia e le Atua moni i inā+ ona o lana gaoioiga lē faaaloalo,+ ona oti ai lea o ia i tafatafa o le Atolaau a le Atua moni.
8 Ae ua ita* Tavita auā ua oo faafuaseʻi mai le toʻasā o Ieova iā Usa; ona faaigoa ai lea o lenā nofoaga, o Faresa-usa* e oo mai i le asō.
9 Ona fefe ai lea o Tavita iā Ieova+ i lenā aso, ua faapea ane: “E faapefea ona ou aumaia le Atolaau a Ieova i lo‘u aai?”+
10 Ua lē manaʻo Tavita e aumai le Atolaau a Ieova iā te ia i le Aai a Tavita.+ Ona ave ai lea e Tavita o le Atolaau i le fale o Opete-etoma+ le tagata Kata.
11 Na iai pea le Atolaau a Ieova i le fale o Opete-etoma le tagata Kata, mo masina e tolu, ma ua faaauau ona faamanuia e Ieova Opete-etoma ma lona aiga uma.+
12 Ua taʻu mai i le tupu o Tavita, e faapea: “Ua faamanuia e Ieova le aiga o Opete-etoma ma mea uma ua iā te ia ona o le Atolaau a le Atua moni.” Ona alu ai lea o Tavita ma le olioli e aumai le Atolaau a le Atua moni mai i le fale o Opete-etoma, ma ave a‘e i le Aai a Tavita.+
13 Ina ua ono laa a i latou na aveina+ le Atolaau a Ieova, ona ia faia loa lea o le taulaga i se povi poʻa ma se manu peti.
14 Ona siva lea o Tavita i luma o Ieova ma lona malosi uma, a o ofu Tavita i le efota e fai i le ʻie lino.+
15 Ua ave aʻe e Tavita ma le aiga uma o Isaraelu le Atolaau+ a Ieova, ma le alalaga o le olioli+ ma le leo o le pū.+
16 Ae ina ua oo mai le Atolaau a Ieova i le Aai a Tavita, ona vaavaai ifo lea o Mekala le afafine o Saulo+ mai i le faamalama, ua iloa atu ai le tupu o Tavita o loo osooso ma sivasiva i luma o Ieova, ona ʻinoʻino ai lea o lona loto iā te ia.+
17 Ua latou avatu le Atolaau a Ieova ma tuu i lona tulaga i totonu o le faleʻie na faatū e Tavita,+ ona faia lea e Tavita o taulaga mū+ ma taulaga faifaatasi+ i luma o Ieova.+
18 Ina ua uma ona faia e Tavita o taulaga mū ma taulaga faifaatasi, ona ia faamanuia lea o le nuu i le suafa o Ieova o ʻau.
19 Ua ia tufatufa atu foʻi i tagata uma i le nuu atoa o Isaraelu, ia tofu tane ma fafine ta‘ito‘atasi ma le falaoa lapotopoto, ma le keke e faia i fua o le pama, ma le keke vine, ona taʻitasi lea o tagata uma ma alu i lona lava fale.
20 Ina ua foʻi atu Tavita e faamanuia i lona aiga, ona sau lea o Mekala le afafine o Saulo+ e faafetaiaʻi iā te ia ma faapea mai: “Ma‘eu lava le faamamaluina e le tupu o Isaraelu o ia lava i le asō, ina ua faalēlavalavā* iā te ia lava a o vaavaai atu teine pologa a ana auauna, e pei ona faalēlavalavā o se tagata valea!”+
21 Ua fai atu Tavita iā Mekala: “O luma o Ieova na ou olioli ai, o lē na filifilia aʻu nai lo o lou tamā ma lona aiga uma, ma tofia aʻu e avea ma taʻitaʻi iā Isaraelu le nuu o Ieova.+ O lea, o le a ou olioli i luma o Ieova,
22 ma ou te ta‘ufaatauvaaina aʻu lava e sili atu i lo o le mea ua iai nei, ma ou te faamaulaloina aʻu lava i oʻu manatu. Ae o teine pologa na e fai mai ai, o le a latou faamamaluina aʻu.”
23 O lea, e leʻi iai se fanau a Mekala le afafine o Saulo+ e oo lava i le aso na oti ai.
Faamatalaga Pito i Lalo
^ Pe atonu “i le vā.”
^ O se meafaifaaili e lua mea lapotopoto e faafetoʻai ona lagona ai lea o le tatagi.
^ O se meafaifaaili e tagitagi. O le upu Peretania, o le tambourine.
^ O se meafaifaaili anamua e ese mai i le kitara i aso nei. O le upu Peretania, o le harp.
^ Po o le “lē fiafia.”
^ Lona uiga “Faasalaga Faasaga iā Usa.”
^ Lona uiga e na o ni nai ofu na fai.
